Oni Wiriki gu Kpiapai Nga ga Anebi—Yoere
1. Wai rengbe ani ka wirika ga Yoere umbasitise gene tungusapai yo?
1 Da nangia nebi Yoere? Ko agumba gupai gbua tipa tiko nga ko ‘angia wiri Petuere.’ (Yoe. 1:1) Gi nebi nadu na bakere umbasitise re anyakasi pa ga Yekova pangbanga angianga pa gu sunge ko aamangaha ninebi ya. Wakina gure a, kuba gupai nga ani nagbata taarimo tipa tirani ho ani atungusapai ni, ani nagbeberã aboro koyo du Yekova ni na kuti Ziazia Kekeapai. (1 Kor. 9:16; 2 Kor. 3:5) Kurigure, gu pangbanga ani atakapandehe nanyakasa rani anyakasa. Gini ga Yoere sangbanebi rengbe ka fu maabangirise furani na ki sa rani ani du zaaza areme?
2. Ginipai si aida pa mbeda ga Yekova uru sarani ani mangihe?
2 “Rago Yekova Nambeda.” (Yoe. 1:15): Wa vura duhe nga i ake agi afugo re bakuru kusayo, gi regbo du ani ti ni awere re si adigisotihe. Wai agu apai namanga rogo zegino agbera kina kumbatayo na wai du aboro kpakpasiraa rogo gaani adagbarago kuti tungusapai nayugo gupai nga ani awere rogo yangara arame nga ga gi gbegberẽ zegino re. (2 Tim. 3:1-5; 2 Pet. 3:3, 4) Ho ani aberã ni kuriipa wai digido gi zegino re nambedi, si nasa gupai nga ani peresipa tungusapai mbatayo rogo gaani raka.—2 Pet. 3:11, 12.
3. Tipagine du tungusapai ti ni na nyanyakipaha gbe wa ani ambeda na bakere gberãngbi?
3 “Yekova Nga Nyanyaki Bagbuko fu Gako Aboro.” (Yoe. 3:16): Gu zigizohe furayo tipaha rogo gi veresi re rengbe kadu sa nga kinagu Yekova nika mangaha ti regbo bakere gberãngbi. Si nipa wasa furani ka ino gupai nga Yekova nika batasa gako ruru amoyambu abatasa ti gu regbo re. (Yugo. 7:9, 14) Wa ani atungusapai na kini bi wai Yekova anyakasa rani, si nanyakasa gaani idapase na ki sarani ani du na hipai nga gu nika undo rani ti regbo bakere gberãngbi.
4. Tipagine rengbe ani ti ni kadu pusiapusia na kidu naa kido wa ani apido digido zegino?
4 Wa vura duhe nga kura aboro nagumba gupai nga ga Yoere sangbanebi nafura sa tipa kina gberãngbi, ono si nafu maabangirise afu nga ga bata fu ga Mbori aboro. (Yoe. 2:32) Sidu tie, ani du naa kido wa ani apido digido gi zegino re na ani takipande wene pangbanga tipa ga Mbori Kindo zaaza wa ani amangapai kuti gupai du rogo Yoere 2:23 nga gu nayaa: “Oni dú pusiapusia, ki ningi rogo Yekova yo, gaoni Mbori.”