I Nika Kparaka Pangbanga Nga ga Kindo Na. 38 Rogo Ngbangba!

1. Gini apai aboro naabaka bangiriyo na ni tipa agu aboro naima kpi, na wai i nika karagapai kutini rogo Ngbangba?

¹ Kpio nga vura aboro dunduko, ka i vura du kina rogo gini pambori vurũ. (1 Kor. 15:26) Badungu aboro nabaka bangiriyo tipa wari du kpikpi aboro ni na singia i abiyo berewe. Sidu, adungurati dunduko rogo zegino nika kparaka Pangbanga Nga ga Kindo Na. 38, du riihe nga Ya “Mo agu Aboro Naima Kpi Araka Berewe?” tipa diwi sa. Gi kparakpara tua re nika tona rogo Ngbangba 1.Tifuo kparaka yó gu Pangbanga Nga ga Kindo Na. 38 re, ani nika tona mangasunge na ni gene tungusapai yo wa kina kura atrakte.

2. Wai du i nambakadi Pangbanga Nga ga Kindo Na. 38?

² Wai I Nambakadihe: I mbakadi Pangbanga Nga ga Kindo Na. 38 rogo gu gene rengbe boro arengba ka kutukpaha nigbangaha tipa riihe du ti bambata kpehe gbiati agu asanahe du biata nga “Ya mo mo nabihe nga i araka berewe? Ya mo mo nabihe nga i arakanga berewe te? Mo ainongo ginigu nika manga te?” Ho boro nikaa ni zakihe ni, ní ani bi gu karagapai nga ga Ziazia Kekeapai kuti gu sanahe du ti riihe yo na gu undo rengbe ní ka gbiaha ti agu akidohe nga ga Ziazia Kekeapai. Ní nika bi ndu gu pai a rengbe ní arengba ti ni ka kido kuti Ziazia Kekeapai. Wene sanahe kinaho giihe yo nga gu rengbe ka sa ní ní berẽkuriihe na kidu na nyemu ka wirika kura apai berewe.

3. Wai i nika kparaka Pangbanga Nga ga Kindo Na. 38?

³ Wai I Nika Kparakaha: Gi tua re nika manga wakina gu nidu tipa Tingida Pakpio Yesu na bakere dunguratise nga ga aʹuru biata. Abaakumba nika fu rugute nibipa manga gu tua re rogo dagbarago naabaha, ringbisihe kuti gu waraga i akehe fuyo rogo Zerekpe 1, 2013. Agu adungurati du na dagbarago ni umbaha rengbe arengba ka undo agu adungurati du na dagbarago ni bakerehe nga gu du mbembedi na ni. Ho mo nikaa dia Pangbanga Nga ga Kindo Na. 38 ni tipa ka kparakaha, si naida mo di kina gu mo nika kparakaha rogo gu poso re. Ti regbo gu tua re, i rengbe arengba ka kparakaha ti regbo manga dezirepai gbayaga, ka si du nga i ima gamaha rogo akporo dunduko. Ka si du nga i ima gamaha dunduko si ki ima nyasa mbata fu digido diwi, si naida i kparaka kura awaraga. Rogo bambata Rago Nzengu, ani nika maa berãrani sa gi tua re, angianga tona wisigo Ziazia Kekeapai na aboro ya. Ti digido aposo, ani rengbe arengba a ka fuka amagazini fu aboro ka rengba du. Ya mo mo namanga mbakadapai tipa kadu na regbo bero ka manga gi kparakpara tua re wenengai?