Waraga Yambahe
1. Gini regbo gu tua du tipa yamba aboro tipa bakere dunguratise nika tona ti ni?
1 Ka mo amanga bawene riahe fu abakureamo watadu gamo aborokporo, nga gu nadia bakere regbo gbiati marã, mo idi na ngbaduro yo dunduko i ye tipa gu riahe re. Teketeke a, bakere sunge i namangihe tipa ka mbakada gu riahe nga ga toro nga gu ani nika rihe ti regbo gu bakere dunguratise nga ga aʹuru biata na ye re. Aposo biata mbata fu gaani bakere dunguratise tona, ani nika du na mamu berani ka yamba aboro tipaha. Ginipai nika undo rani ani yambu aboro zaaza?
2. Ginipai nika fõ rani tipa ani mangi tua na ngbadurani yo dunduko?
2 Ka ani berẽkuriipa gu undo ani agbiaha ti gu riahe nga ga toro Yekova ambakadaha furani ti regbo kikindigi adunguratise, ani mangi gu tua re amanga na ngbadurani yo dũ. (Yes. 65:13, 14) Si naida ani tingidi gupai atingida a nga agu atua ani amangaha na agarã dunduko nayeaye na wene sangbanaha. (Oni bi gu sanduki nga “Si Nakusa Wene sangbanaha Akusa.”) Aboro kinaho dagba agu aboro ani ayambayo nika duadu na ani pati bakere dunguratise, ono aguyo kinaho nikaa dunga yo ya. Zanga bipa bange agu aboro nika ye, ka ani mangi ome nyanyaki ka manga gu tua re na ngbadurani yo dunduko, si nika ye na taarimo fu Yekova na ki yugu gako wene sino.—Tam. 145:3, 7; Yugo. 22:17.
3. Waigu ani nika kparaka waraga yambahe?
3 Si naida gu gbuu nga ga abaakumba ini gupai si aida dungurati mangihe tipa ka kparaka gu waraga yambahe re ti dungu aboro, na ki bihe singia abatungusipai rengbe ka mbuhe fu agu aboro adunga tii kporo ya watadu i rengbe ka kparakaha bangiri agene rogo gayo dagbarago. Ti digido aposo, si naida kaa fuhe wa sa na amagazini. Ka si du nga gu bambata Rago Nzengu nga ga diwi ti ti regbo tua, oni moi berãroni gbe kuti kparaka waraga yambahe kuba tona wisigo Ziazia Kekeapai na aboro. Nairiwo gu ngbarago ani nika du na ni ti digido gu tua re ka bi gupai nga ani aima yamba aboro ni badunguyo tipa i ye kadu na ani pati gu riahe nga ga toro Yekova nambakadihe furani!
[Gu sanduki du ti kpewaraga 4]
Ginipai Oni Nika Gumbaha? Fuo fu oni sene fu boro, oni rengbe ka ya: “Ani nata kaa kparaka gi waraga yambahe re fu aboro dunduko tipa gu nyanyakipa bakere dunguratise nika manga. Ramediwi, regbo, gbiati gu ba si nika manga rogoho ni kekehe vuruhe yo.”
[Gu sanduki du ti kpewaraga 4]
Si Nakusa Wene Sangbanaha Akusa
• Dungu agarã kusayo wirina sa akparaka waraga yambahe, ri aabaka kina bangiri singia gu ome ri amangihe adu na wene sangbanaha. Ri aabakabangiiri nga, ‘Ya mo aboro amangapai kuti gu yambahe re ki ye kadu na ani pati bakere dunguratise?’ Rogo uru bakere dunguratise rago Nzengu wiso, ri angere ki bi kura kumba nasungu pati ri, na ri ki tona fugo na ko. Si awiri gupai nga ko aye tipa bakere dunguratise mbiko ko aima gbia gaani waraga yambuhe. Ko adu na dungu asanahe ngbako nga gu gi wirina re akaragapai kutini. Ko apepa wai gu dunguratise re angbatiko na wai gu vo roko na mangaapai nga ga agu aboro nadu pati ni adu ni wenehe. Rogo kina gu bangisa uru re, gi wirina re atona fugo na kura arogotise nasungu pati ri. I aima gbia waraga yambahe a na i aye tuturũ na tarambiri tipa gu bakere dunguratise re. Gu dunguratise re aima ngbatiyo na si ki sa gupai nga i mangi mbakadapai ka ye rago Poso berewe. Gi wirina re aima ye ka ino pa nyaka gu tua ani naamangaha na agarã dũ.
• Ti regbo gu bakere dunguratise namangi bambeda, wirina na diako nga abazakigene atona fugo na kura sosono arogotise. Agi arogotise re agumba gupai nga gure nangia gayo bambata regbo i ye. Agu abazakigene re asana yo ki ya, “Da nayambu roni?” I akaragapai ki ya, “Ho ani ayego ni rogo kura uru ku kporo yo, ani abi waraga yambahe tii gaani ngbadimo.” I agedi gu waraga yambahe re na ki hiisi gu ba du tipa sanahe tipa wirikapai giihe yo. Kura awirina naadu pati gi bakere dunguratise re ari riahe sa na agi arogotise re. Gi dunguratise re aima ngbatiyo na i ki mangi mbakadapai ka ye rogo gu uru nangbefuo gure. Awirina amangi mbakadapai ka ndu fuoyo berewe.