Gini Gene Yugopai fu Agude Tipa Mbori Ngba Gbe?

“Ono agi apai re, nga gu mi aruga roni kuti ni areme, si du ku kpotoroni yo; oni ki niyugu he fu awironi sirisiri, ki nipeke pa ha fu yo ho oni ka nisungu ni rogo gaoni bambu, ho oni ka nita ni gene a, ho oni ka nipi ni sande a, na ho oni ka niguari ni ku ari a.”​—Pa Rug. 6:6, 7.

Gu kura regbo, avungu agude rengbe ka bihe nga nyanyaki sunge du nga raba agude. Ho i asanahe ni tipa undo, agu arugute aboro afuhe, si nairiwosi apai bangiri yó kina ku mbatayo. Dedede, agume gbiati abakure nafu aberãpai tipa wai ka raba agude. Abuku, amagazini, gbiati kura abangiri aba rogo Internet nafu agu arugute ti kura aregbo rengbe arengba ka vundo boro.

Ono Ziazia Kekeapai tigaha, si afunga rugute sa tipa kina gupai si aida avunguagude yuguhe fu awiriyo te, ono si nafu ndikidi rugute afu a tipa wai si aida i yugupai fu awiriyo. A wa gumba yó ho rogo gu veresi du kuari re, si naida avunguagude naagbata gene na aʹuru dunduko kaa fura fu awiriyo tipa Mbori. Aberãpai biama gi du kusende re nga gu du mburuhe rii Ziazia Kekeapai nga gu naima undo badungu avunguagude i yugupai fu awiriyo tipa Mbori.

1. Kusikusiahe. Gu mokedi nangia Pauro akepai ki ya: “Bambiko gu gako [Mbori] apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.” (Rom. 1:20) Avunguagude ima rengba ka mangasunge na agu ahe Mbori akusihe ka sa awiriyo i bi Mbori ni ndikidi Boro na ki undo yó i wisigi agu asinoko du ni yuguyuguhe rogo gako kusikusiahe yo.

Gere nga gu birĩ Yesu amangisunge na ni ho ko ayugopai ni fu gako abawiriki. Nikpiapai, ko aya: “Oni bi azire ari yo, ami aru nga ahe te, ami ake nga ahe a te, ka ami aiga nga ahe ku rogo agbamu yo ya; Baroni du ngbangbaturũ yo nariga ra. Genoroni asusa nga genora te?” (Mt. 6:26) Rogo gi gene re, Yesu ayugu gupai nga Mbori na nyemuse tiko gbiati nunga. Ono ko aima manga kurapai berewe. Ko aundo yó i berẽkurii wai Yekova ayugo agu asino re koyo du awiriko ni.

Gu tatamanatatamana bakindo nangia Soromo amangisunge na gu tatamana Mbori afuhe fu angbari ka yugo nyanyakipa pai. Ko akepai ki ya: “Ako iranyomoro, mo ndu koyo du angbari ni; mo berẽ pa gaami mangaapai ka du ni iratatamana. Nga agu ra adu nga gbia ku ri ra ya, babiapai watadu barugupai a te. Ami nambakada gaami riahe kita, ki nidungura gaami riahe ti regbo ke ahe.” (Snz. 6:6-8) Nairiwo gu wene kpiapai ko amangisunge na ni ka yugo gupai furani nga si naida ani moi agu asásá rẽarẽ na ki mangisunge na gu ome Mbori afuhe furani ka da ti agu asásá re!

Avunguagude rengbe ka wirika gu wene gene yugopai nga ga Yesu na bakindo Soromo ka i mangi agi apai re: (1) Ka i sana awiriyo tipa agu angua na anya ngbatiyo. (2) Ka i wirikipai tipa agu angua gbiati anya re. (3) Na ki wisigi gupai rengbe yó ka wirikaha tipa Mbori ti gu kusikusiahe re.

2. Sino Yesu koyo du agu aboro ni ko ayugupai fuyo. Dagba agu aboro dunduko naraki, kina Yesu sa naadu na yangara nyanyakipa apai ngbako ka gumbaha. Ono wa si avura du wo, gupai ko anaamangaha dedede nga kaa sanahe. Ko aida ka ino gu berãpai naadu rii agu aboro yo ko aayugopai fuyo. (Mt. 17:24, 25; Mk. 8:27-29) Wakina Yesu, badungu apai du ngba avunguagude tipa ka yugoho fu awiriyo. Ono tipa i yuguhe ngba wene gene, si naida i wiriki Yesu ningarasa yó awiriyo i gumba gupai i aberãha.

Ginipai si aida i mangihe ka si du nga agu agude re na nyakarii watadu berãyo nazio pai yee? Oni bingo gu gene Yesu amangipai ngbaha na gako abawiriki. Gu kura aregbo kinaho i anaati kango dagbatiyo nikerehe na si aima dia yó na gbanga regbo tipa i wiriki gu maku du ti du boro na umbasitise. Ono wa si avura duwo, Yesu adu na zerangbaduse na kini fura fuyo dedede tipa umbasitise. (Mk. 9:33, 34; Rk. 9:46-48; 22:24, 25) Agu avunguagude nawirika Yesu, i naruga awiriyo na zerangbaduse, na ka gene du, i nadogoda bangisapai sa fu awiriyo daho i ka rugatiyo ni na ni.

3. Yugopai na kpiapai. Si naida avunguagude mangipai amanga kuti gu rugute Pauro afuhe fu agu aKristano naadu Roma yo. Ko aya: “Si du wa mo niyugu pai ti ni fu kura boro, mo nayugo nga pai fu tiro te? Wa mo nitungusi pai fu boro ya ka ni dĩ nga he ya, mo nadĩ he?”—Rom. 2:21.

Gu rugute re na nyanyakipa ha gbe bambiko agude nagbe berãyo gbe sa gupai avunguyo amangaha susi gupai i agumbaha. Nirengo, agu avunguagude namanga gupai i atungusaha, badunguyo awiriyo agia gupai i ayugoho.

4. Mbu gude kindi tooni. Gu ga Pauro badiasunge nangia Timoteo, ko adu na wene rimoko rogo gako dagbarago. (Amo. 16:1, 2) Ndupai sa nga gu ko adu ti ni wo nga ho ko “adu ni ni gude,” i atona yugo “Ziazia Kekeapai” fuko. Anga gupai gbua nako gbiati titako anaamangaha nga kaa geda Ziazia Kekeapai fu ko te, ono i anaaundo ko aundo a ko niberẽkurii gu rengo naadu rogo gupai i aagedaha re.​—2 Tim. 1:5; 3:14, 15.

Gu Ba Oni Narengbe ka Gbia Undo Rogoho

ADezire Yekova nakusa badungu awaraga nga gu i ambakadaha tipa si undo avunguagude i yugu rengo fu awiriyo tipa Mbori. Agu akuraha kinaho i akehe na rukutu agude berãse yo. Agu akuraha tipa ka undo avunguagude na kuru awiriyo tipa i ini wai kaa fura dagbatiyo wenengai.a

Mbata fu avunguagude yugupai fu awiriyo tipa Mbori, si naida i ini akaragapai aino kuti gu kpakarakpakara asanahe rengbe awiriyo ka kusaha. Nikpaipai, waigu regbo mo ka karagapai kuti agi asanahe re: Tipagine Mbori ambu arungo ti ni si nimangi? Ga Mbori ringbisapai nga gine tipa kpotosende? Wari du gu kpikpi yó ni? Akaragapai kuti agi asanahe re na agu akuraha rengbe ka mbedisa roni na awirioni koyo du Yekova ni.​—Yak. 4:8.

[Gu rukutu kekeapai du bandu kpewaraga yo]