Oni Mangisunge na jw.org Rogo Gaoni Sunge Tungusapai—“Become Jehovah’s Friend” (Mo Da ni Bakurea Yekova)

Gu papara gaani bangiriba nga ga Internet nga jw.org du rimoho nga “Bible Teachings” na pai rogoho du riihe nga “Mo Da ni Bakurea Yekova” du abia rogoho, na avidio,na gu kura apai. Ya mo oni mangingo sunge na ni gene tungusapai yo? Ka ngia ga bawiriki Ziazia Kekeapai na agude beko kporo, tipagine ka mo ayugongo ho tiní fuyo ya? Si rengbe ka sa bayo ko rimi kura papara gaani abangiriba.

Ti gu regbo ani aakparaka gu Pangbanga Nga ga Kindo Na. 38, wirinarani sa a gbia dee na tona geda gaani trakte nibasa fuo fuyo ho furi. Ri adu na awiiri kinaho nga aguyo na du na bakere nyemu agu atrakte re. Gu wirinarani re asaki bete riipai rogoho na ki yugu bara gaani bangiriba nga ga Internet du gihe yo. Wa Ri adu na nyemupai, ko amoi vidio sa dagba agu nga ga Caleb fu awiiri rogo gako terefuni.

Wirina nidee afura fu gari badiasunge du na agude beri tipa gaani bangiriba nga ga Internet na pa agu apai du yo tipa aborokporo. Gu dee re na awiiri azaki jw.org. Kusa fuo gure ri apegupai fu tameri nga awiiri aata vuru bambu kini bi gu bia nga “Preach the Word,” nga bia sa dagba agu abia du ti gu riipai nga “Mo Da ni Bakurea Yekova.”

Oni inidi tironi na agia apai du rogo jw.org re na kini rogodi agu avidio na abia watadu gu mangimangi apai du rogoho ku rogo gaoni aterefuni, na ka oni bi boro nga guni nape kura fugo kia, oni ki yugu bara gani fugo funi rogo gaani bangiriba nga ga internet, na ni ki ndu kuti gu riipai nga “Mo Da ni Bakurea Yekova,” du tii gu paparaha nga “Bible Teachings.” Ka oni mangihe wo oni rengbe arengba ka mangasunge na gi papara jw.org re gene tungusapai yo. Nangba gi wene nyanyakipa ũsunge nika undo rani tipa ani mangasunge fu gaani gbia re!—Amo. 20:19.