Kparaka Amagazini ti Aboro—Wene Gene Tona Wisigo Ziazia Kekeapai
1. Tipagine ga Yekova riigbu aima digo ningarasi abatungusipai ti ni i naakparaka amagazini ti aboro?
1 Badungu aboro aidanga ka wirika Ziazia Kekeapai na ani ya, ono rago nangba angba tiyo kaa geda gaani amagazini. Sidu, ga Yekova riigbu aima digo ningarasi abatungusipai i naakparaka amagazini ti aboro. Dedede, ho aboro ageda gaani amagazini ni, si naba nyemu Fugo Mbori tiyo. (1 Pet. 2:2) Niyangaraha, i rengbe ka gedapai rogo gaani amagazini nga gu rengbe ka zio ngbaduyo na ki sa yó i idi ka wirika Ziazia Kekeapai.
2. Wai rengbe ani ka sonosa nyemupai rogo agu aboro yo ani naakparaka amagazini tiyo?
2 Oni ‘Tudi’ Tunga Rengo: Ho oni atanga ni ti agu aboro oni naakparaka amagazini tiyo, ka oni ta funga ha afu ki ima guari nibasa ka ndu ya, oni asadi ka fura na ní na ki zi bakure na ní. Gipai re nika undo roni oni ini agu apai du tipa ní, agu apai ngba tiní, gbiati gani aida na si ki saroni oni fura na tatamana. (Snz. 16:23) Oni mbakaditironi mbata fu ndu oni. Ka gene du, niwiri guruhe oni fura tipa pai rogo gu magazini re na gu veresi nasongodaha rogo gu magazini re tipa ka tuda gu tunga rengo kadu rogo ní yo. (1 Kor. 3:6) Ai gu regbo oni akaraga tironi fuo ní, oni ke gu ramediwi re sande, gu waraga oni nafuhe funi, gu riipai gbiati veresi oni nasakipai tipaha.
3. Bara wai si aida ani karagatirani fuo agu aboro ani naakparaka amagazini tiyo?
3 Si Naida Oni Karagatironi Fuo Aˈuru Wai? Si naida oni nikaraga tironi fuoni bara sa rogo diwi yo na vovo amagazini. Ono tie, ringbisihe kuti agu apai du tipa gu boro re na gu nyemupai du ní na ni, oni ima rengba ka dogoda fuoni bara dunguhe. Nikpiapai, fuo poso sa watadu ue tifuo mbu oni magazini funi, oni rengbe ka karagatironi fuoni ki ya, “Mi niye tipa wiri guru regbo ka fura tipa kura pai were rogo gu magazini mi afuhe foro ni gu uru re.” Mangaha wo nika sa ní ní gedi gu kekeapai re. Ka si du nga ní aima gedaha, oni rengbe ka sana ní tipa ní gumbapa wai duhe na ki sakipai na ní tooni. Watadu gu boro ngba geda gaani awaraga tiní, oni rengbe ka karagatironi fuoni na ki yugu gu trakte, burosua, watadu buku nga gu ani akparakaha rogo gu diwi re.
4. Ginipai rengbe ani ka mangaha ka ino singia agu aboro ani naakparaka amagazini tiyo na nyemu ka wirika Ziazia Kekeapai?
4 Ka oni sungungo asungo kina ní sanahe tipa wirika Ziazia Kekeapai ya. Oni gumbapaha funi. Ka si vura du vurũ nga ní aima ka wirika Ziazia Kekeapai mbata, oni nindu kindi kumbatayo kaa yugo gu papara magazini funi nga “Agu Asanahe Ziazia Kekeapai Akaragapai Kutini” na ki bihe singia ní na nyemu ka sakapai na oni. Oni ima rengba ka tona wisigo Ziazia Kekeapai na ní ngbadimo kpuni. Ono tie, ka si du nga gene wa ka oni tona wisigo Ziazia Kekeapai na ní te, si naida oni niye aye na amagazini funi kindi tipa kaa sonosa gani nyemupai.