Mbakada Gaani Gene Tungusapai​—Kparaka Amagazini ti Aboro

Ndu Gupai Duhe Ti Ni na Nyanyakipa Ha: Badungu agu aboro nageda gaani amagazini na nyemu ani wiriki Ziazia Kekeapai na yo te. Si rengbe ka du wo mbiko gupai nga i na ngbarago na gayo pambori, watadu regbo beyo tipa ka wirika Ziazia Kekeapai te. Ono tie, wa i kaa geda gaani amagazini dedede, si ima rengba ka ba nyemu Fugo Mbori tiyo. (1 Pet. 2:2) I ima rengba ka gedapai rogo gaani amagazini nga gu rengbe ka zio ngbaduyo yo, watadu ariapai ima rengba ka manga rogo gayo raka yo. Ndu kaa biyo dedede niwiri guruhe ima rengba ka sayo i du wenengai na ani na ki undo rani ani ini agu apai ngbatiyo gbiati agu apai i aberãha. Niyangaraha, ani ima rengba ka tona wisigo Ziazia Kekeapai na yo.

Wai Rengbe Boro ka Mangaha:

• Rogo adiwi dunduko, mo mangi mbakadapai tipa kaa ye na vovo Ngbaõbambu Sinziri gbiati Awake! funi. Kura regbo mo rengbe arengba ka karaga tiro fuoni tipa ka sonosa gani nyemu geda gu magazini mo afuhe funi, watadu ka fu gu waraga funi ani akparakaha rogo gu diwi re. Mo naake agu apai du tipa gu boro re.​​—Oni bi gu Gaani Sunge Nga ga Kindo nga ga Ngi 2014, kpe. 3.

• Mo naambakada tiro mbata fu mo ndu fuoni. Kuba gupai nga ka ndu kini mbu kina amagazini gbua fu gu irakporo re, mo di regbo ka fura na ni na ki asadi ka me wene pabakure na ni tipa ka sonosa gaani nyemupai.

• Mo naagbata amamu tipa ka tona wisigo Ziazia Kekeapai na ni. Ka si du nga boro sa dagba agu aboro mo naafu amagazini fuyo sana ro tipa gupai Ziazia Kekeapai apehe tipa kura pai, mo ye na waraga funi dagba agu awaraga ani naawirikaha na aboro nga gu du na karagapai rogoho kuti gupai re, na ki sakihe na ni sa. Mbata fu mo ga, mo mbu sanahe nga gu nandu na gupai re na oni ki sakihe ho mo nika ye ni berewe fuoni. Ka si du nga mo naafura na ni dedede na ti genehe ni manga mo sunge na Ziazia Kekeapai watadu waraga sa dagba agu ani naawirikaha na aboro, gure nga mo nawirika Ziazia Kekeapai na ni. Ya mo mo fu gu burosua nga Wene Pangbanga fu irakporo na ki mangi kpia wirika Ziazia Kekeapai na ni niwiri guruhe? Ya mo mo yugu agu avidio funi nga Gupai Si Aida Mo Wiriki Ziazia Kekeapai Ti Ni? gbiati Wai Du I Naawirika Ziazia Kekeapai? Ka si vura du nga gu boro re ni naaidanga na wirika Ziazia Kekeapai mbata te, apai ima rengba ka aria tihe. Ya mo mo abingo ho ni wenepai ka asada ka sana ni berewe tipa wirika Ziazia Kekeapai te?

Oni Asadi Gipai Re Rogo gi Diwi Re:

• Oni ke pa agu aboro rengbe oni kaa fu amagazini fuyo. Oni naafu vovo amagazini fuyo, na ki gumba gupai fuyo nga oni nika ye aye berewe na agu avovoho nika kura.