Sanduki Sanahe

◼ Ginipai si aida rukutu agude wirikihe tipa ka sona rogo toro yo?

Agu aKristano nga avunguagude namanga nyanyaki asadatise ka sonosa awiriyo rogo “ga Gbia rabahe na rugahe.” (Ef. 6:4) Ni kpiapai, avunguagude ima gbia wene sangbanapai ti wisigo agu averesi du tipa aʹuru nibasasa na awiriyo na awiso dunduko. Ti regbo gu irisombori nga ga aborokporo watadu ti kura aregbo, aborokporo nabi agu avidio kangara moyambu akusaha na kini fura tipaha, i nafura tipa agu apai du rogo gu buku nga Young People Ask, i nagumba agu apangbanga du rogo Ziazia Kekeapai, watadu i namangaha rogo yuguyugu kpiapai yo. Ono tie, tipa agude ‘dati du yo ziazia’ watadu tipa i sono rogo toro yo, si naida i wiriki gu dudunguro arengo nga ga Ziazia Kekeapai.​—Eb. 6:1.

Oni berẽnga pa gupai ani naayugoho fu agu aboro ani agbiayo rogo gaani adagbarago. Ho ani agbia boro ni ti bambata regbo watadu ho ani akaraga tirani ni fuoni, ani naʹasada ka tona wisigo Ziazia Kekeapai na ni rogo gu buku nga Gini Apai Nzunzu Ziazia Kekeapai Ayugoho? Fuo nyasa ani he, ani namangasunge na gu buku nga “Keep Yourselves in God’s Love.” Tipagine? Gu buku nga Ziazia Kekeapai Ayugoho nafu gu bangua inohe nga ga Ziazia Kekeapai fu boro. Gu buku nga “God’s Love” nayugo wai fu boro si aida ni naamangapai kuti gu bangua arugute nga ga Ziazia Kekeapai rogo gaani raka na aʹuru dunduko. Ho boro awirika agu abuku ue re ni dunduko, si naundo ni ‘tarani rimi ni ki du ni duadua ni’ rogo Kristo yo na ki ‘rũ gani idapase nyanyaki.’ (Koro. 2:6, 7) Ya mo gi bangisa abuku re arengbanga ka undo awirani te? Si naida i yugupai ayugo fuyo a tipa motumo tumorii, ga Mbori Kindo, na gupai namanga boro ho ni akpi ni. Si naida i ini ndu gupai aino a Mbori nambugene ti ni fu rungo si naamanga na ki ini gupai nga ani naraka rogo yangara areme. Si naida i ini gupai aino zanga kapa nga aDezire Yekova du na rengo beyo. Si naida i gitiyo agia a na gu bangua arugute nga ga Ziazia Kekeapai na ki ini wai ka raba “gayo berã.” (Eb. 5:14) Si naida avunguagude bere aberã kuriipa garã awiriyo na gayo giarogopai yo. Ono dungu agude du na gu rengba nga ga wirika gu dudunguro arengo nga ga Ziazia Kekeapai mbuyo kindi rukutu.​—Rk. 2:42, 46, 47.