Mbakada Gaani Gene Tungusapai—Gumba Gupai Ani ka Ndu Berewe Tipaha Fuo Boro

Gupai Nyakipaha Ti Ni: Ho ani agbia gu boro ni du na nyemupai, ani nadu na nyemu ka ndu berewe fuoni ti gu regbo ní nika du kporo yo tipa ka tuda gu tunga rengo ani arũhe. (1 Kor. 3:6) Gere naaida gupai dedede nga mbata fu ani guari, si naida ani pekepa gu regbo apeka na gu boro re ani ka ye ti ni berewe fuoni. Kurigure, si ni wenepai ka mbu ni na sanahe nga gu ani ka sakaha ho ani ka ye ni berewe. Gere rengbe ka sa gupai nga gu boro re nimoi bangirini tipa rani, na ka si du nga gu sanahe ani asanaha re i ima karagapai sani rogo gu waraga ani ambuhe funi, ní rengbe arengba ka gedaha a mburani koyo. Gumba gupai ani ka ndu berewe ka sakaha na boro nasaha taata furani a ani karaga tirani fuoni, bambiko ani aima sia gupai ani ka ndu ka sakaha, na gu boro re ki ima ino gupai nika manga. Ho ani ka ndu ni berewe, ani rengbe ka pe gupai funi nga ani ye ka karagapai sa gu sanahe naadu ti gu regbo ani aye mbata, fuoho, ani ki ndu ku mbatayo na fugo.

Wai ka Mangaha:

Ho mo ambakada gu fugo ni mo ka ndu ka tungusapai na ni rogo akporo, mo mbakadi gu sanahe a mo nika karagatiro fuo boro ka karagapai kuti ni. Si rengbe kadu nga gu sanahe i naima karagapai sani rogo gu waraga mo akparakaha ni gu uru re, watadu gu sanahe i nakaragapai sani rogo waraga sa dagba agu ani naawirikaha na aboro, nga gu mo nika ndu na ni ho mo nika karagatiro ni fuo boro.
Ho mo anyasa fugo ni na gu boro du na nyemupai tiní, mo sa ní ní ini gupai nga mo gu duadu na nyemu ka fura na ni berewe na mo ki fu gu sanahe funi mo nika ye oni sakihe. Rogo kura adagbarago, aboro na bakere asunge tiyo nga gu nasayo i duadu na ndundu ka ida gupai nga ani ye berewe fuoyo. Ka mo gbia gu boro duwo, mo rengbe ka ya funi: “Ya mo gere nga gu regbo mo naasungo kporo dedede? [Mo mbu ní tipa ní karagapai.] Mi naida ka kura bara no ni gu poso naye re tipa karagapai ni wiri guruhe sa gu sanahe nga . . . Ka mo du na bakere sunge tiro ti gu regbo mi ka ye re, mo ki gumbaha agumba fere.”
Ka mo ringbisi regbo fu irakporo nga gu mo nika ndu berewe fuoni ti ni, mo asadi ka ndu ti gu regbo re. (Mt. 5:37) Ho oni anyasa fugo ni na gu boro mo nakaraga tiro fuoni, mo mbu gupai funi mo nika ndu berewe oni sakihe.

Mo Asadingo Gipai Re Rogo gi Diwi Re:

Ho mo ambakada gu fugo ni mo ka ndu ka tungusapai na ni, mo mbakadi gu sanahe a mo nika karagatiro fuo boro ka karagapai kuti ni. Mo gumbapaha fu agu abatungusipai oni atungusapai na yo.