Oni Wiriki gu Kpiapai Nga ga Anebi—Nauma
1. Ginipai ani awirikaha rogo gu kitabu nga Nauma?
1 Pa gbarasa Nineve a wa gu nebi nangia Nauma agumbaha nafu gu gopai nga, Yekova naira bape kuti avura ko, na boro ho rengbe ka ru sa ko te, zavura kere airaome vurũ. (Nau. 1:2, 6) Ka ani kparia gu sangbanebi nga ga Nauma, ani ima rengba ka wirikapai ni bakerehe rogo gaani sunge tungusapai.
2. Wai rengbe ani ka sa gaani pangbanga si du ni wenehe?
2 Si Nafu Ngarãsaro na Maabangirise: Ho ani abi gu kitabu ni nga Nauma ni bambataha, si wa ka i ya si nafura sa tipa kina pa gbarasa Nineve, nangia bakere gbata nga ga Asura. (Nau. 1:1; 3:7) Ono tie, gupai si afura tipaha re adu fu ga Yekova aboro ni wene pangbanga. Rogo gu rimo yo nga Nauma nga “Bafu Ngarãsaro,” watadu “Bafu Wasa.” Nauma akido awirinako nangia aYudo nga i nika gbarasa avurayo kpäkäyä! Nauma ape gupai berewe nga Yekova nga “nyanyaki gbata rago fudifudipai.” (Nau. 1:7) Wa ani atungusapai, si naida ani gumba wene pangbanga a fu aboro na ki ngarãsi yo i gbata bagbuko be Yekova.—Nau. 1:15.
3. Wai rengbe ani ka wirika Nauma ni manga ani sunge na akpiapai?
3 Oni Mangisunge na Akpiapai: Ga Yekova toro adu kugii Nauma ko ringbisipa digo Nineve kuti ga aEzipeto bakporo nangia No-amona, nga gu Asura agbarasihe barambeda kusayo. (Nau. 3:8-10) Wa ani atungusapai fu aboro tipa digo gi sino raka nga ga gi zegino re, ani ima rengba ka gumbapa gu sangbaanebi nga ga Ziazia Kekeapai fuyo nga gu nayugopa wai Yekova adigiso gupai ko apehe dunduko sirisiri. Ni kpiapai, ho aBabero na aMadaio arunguru ni kuti gu gbata nangia Nineve rogo 632 M.B.K., bamai ana si ki sa gupai nga gu baime nga Tigiri fu ki gbarasipa ngapa gu nyanyaki gbata nangia Nineve re. Si asa gupai nga i zi Nineve ni kina ipo a wa Yekova agumbaha.—Nau. 1:8; 2:6.
4. Wai rengbe ani ka fura ziazia aboro ki girogoyo ho ani atungusapai ni?
4 Oni Fura Ziazia Tipa Aboro Girogoyo: Gu gene Nauma akepai ngbaha nasakarogopai ngba iiriwo gene. Gako memeapai aima du ziazia. (Nau. 1:14; 3:1) Wakina gure a, si naida ani mangisunge na gu fugo nika du taata tipa aboro girogoyo. (1 Kor. 14:9) Ti kina gu bambata regbo oni nabi boro, oni sakirogo gupai yo funi ye oni ti ni. Wa oni kaa wisigo Ziazia Kekeapai na aboro, oni undo yo i kido kuti Yekova na kuti Fugoko, na i rugutiyo na wai agu apai i awirikaha re abiyo.—Rom. 10:14.
5. Gini kido ani agbiaha rogo gu sangbanebi nga ga Nauma?
5 Ani nabi gu kido abi ziazia Nauma adu na ni kuti pa digo sangba Yekova rogo gu kitabu du rogo Ziazia Kekeapai du rimoko riihe. Wa gi digido sino raka nga ga Satana re ambeda, ani nagbia wasa mbiko gupai Mbori apehe nga: “Fudifudipai akúra nga bara ue te.”—Nau. 1:9.