Ya Mo Oni Awirika gu Kakaka Nyemuse Nga ga Yekova gbiati Yesu Ti Regbo gi Tingida Pakpio Yesu Re?
1. Ginipai aDezire Yekova naamanga asadatise tipa ka mangaha ti regbo Tingida Pakpio Yesu?
1 Yekova nadigiso gako ringbisapai na kakaka nyemuse. Nibipa agu amaku ga Mbori Kindo nika ye na ni, Yesaya 9:7 naya: “Gu kenapai nga ga Yekova nga ga arimbasa ko nikamanga gere.” Wakina gure a, Wiri Mbori ayugu gako kakaka nyemu iriso Mbori tigu regbo ko adu auru kpotosende ane. (Yo. 2:13-17; 4:34) Rogo agarã dunduko ni basasa ti regbo Tingida Pakpio Yesu, amirioni abatungusipai rogo zegino dunduko ninaamanga asadatise tipa ka wirika Yekova na Yesu ni kiiso yo gayo sunge tungusapai. Ya mo mo adu dagbayo?
2. Ginipai kakaka nyemuse nika fõngbaduraniyo ani mangihe tona rogo Marungu 7?
2 Tua Nga ga Tingida Pakpio Yesu: Rogo gi garã re, gu tua du tipa yamba aboro tipa Tingida Pakpio Yesu nika tona Rago Nzengu rogo Marungu 7. Oni mbakaditironi awere tipa ka tungusapai kakaka. Adungurati nika du na bakere ngbarago ho i nikaa yamba aboro ni tipa Tingida Pakpio Yesu wa rengbe omeyo na ni. Ani mangi bakere ome tipa ka yamba gaani abadiasunge, agu aboro ani awirika Ziazia Kekeapai na yo, agumerani, akuarani sukuru yo, agu aboro ani naakaraga tirani fuo yo nifu ani waraga yambahe fuyo watadu mangasunge na jw.org.
3. Wai rengbe ani ka kiiso gaani sunge tungusapai rogo Marungu na Zerekpe?
3 Moundo Abazakigene: Kakaka nyemuse nika fõngbaduraniyo ani kiisi gaani sunge tungusapai. Si nawira gupai nirengo nga badungu aboro nika mangasunge amanga ni amoundo abazakigene rogo Marungu na Zerekpe, bambiko ani nika du na siapai berani nga ga tungusapai tipa asaa 30. Ti regbo gaoni irisombori nga ga aborokporo, watadu wisigopai nisase, oni mangi kparakpee tipa wai oni ka manga gipai re. (Snz. 15:22) Du oni zaaza tipa gi tua re ima rengba ka fõngbadu kura aboro yo tipa i mangi tungusapai zaaza. Ka oni mangi aˈariapai tipa ka kiiso gaoni sunge tungusapai, oni nika wirika gu kakaka nyemuse nga ga Yesu.—Mk. 6:31-34.
4. Gini amosoro naye mbiko wirika gu kakaka nyemuse nga ga Yekova na Yesu?
4 Wirika ani gu kakaka nyemuse nga ga Yekova gbiati Yesu ti regbo gi Tingida Pakpio Yesu re nika ye na bakere amaku. Ani nika manga dezirepai fu badungu aboro rogo gaani dagbarago. Ani nika gbia gu ngbarago gbiati wasa naye mbiko mangasunge fu Yekova gbiati fuhe fu aboro. (Amo. 20:35) Gu nyakipaha gbe nga, ani nika fu ngbarago fu gaani Mbori gbiati Yesu nga agu aboro du na kakaka nyemuse.