Ya Mo Oni Nambakadatironi Tipa Tingida Pakpio Yesu?
Rogo Nisana 13 rogo gu garã nangia 33 F.B.K. Yesu aini gupai nga ko anye na yangara nyemu sa tipa ka sungo na gako abawiriki mbata fu i imiko. Si adu nga ko nika ri yangara Pumbo Susiri na yo na ki moimburu vovo kurapai i ayambaha nga, Ga Gbia Riahe. Gu nyanyakipa pumbo re aida wene mbakadatise. Sidu, ko akedi aPetero na Yoane tipa i ndu ka mbakada apai tipaha. (Rk. 22:7-13) Rogo agarã dunduko natona ti gu regbo re ka ndu ku mbatayo, si nidu ni gupai rẽarẽ fu agu aKristano du na nyemu Tingida Pakpio Yesu i mbakaditiyo tipaha. (Rk. 22:19) Gini banguapai si aida ani mangihe tipa ka mbakadatirani tipa gi Tingida Pakpio Yesu naye rogo Zerekpe 3 re?
Agu Ambakadapai Si Aida Abaakumba Mangihe:
• Oni mangi ambakadapai tipa ka tingida pakpio Yesu Bambu Kindo yo watadu rogo gu ba rẽarẽ. Si naida gu ba re du na abasungo rogoho nga gu nika rengba arengba na aboro, na awe ki du rogoho wenengai, na aboro kini gbia wene wege agbia rogoho. Si naida i girisi gu ba re wenengai mbata fu regbo.
• Oni sia wene bagumbapai, basungu-rii-kiti, gbiati awirina nga aguyo nika manga kparakpee kurii gu kpakuto narukuba kpoto Yesu gbiati gu imekakue narukuba kureko.
• Ka si du nga adungurati ngeange nika manga Tingida Pakpio Yesu rogo gu bangisa ba re, oni mbakadi pa regboho ni basasa na ki mbakadi pa wai aguyo nikaa rimo aguyo kini kuru, na gbiati wai aboro nika rugusa gayo aũnduge.
• Oni sia agu aboro nikaa mbakada ba aboro gbiati aguyo nika ta na kpakuto gbiati imekakue.
• Oni mangi mbakadapai tipa ka gbia gu ndikidi kpakuto narukuba kpoto Yesu gbiati gu imekakue narukuba kureko, kodihe na asiani, afingiani, wene mbisa, gbiati gu roko i nika baha rii mbisa.
Agu Agene Si Aida Abatungusipai Mbakaditiyo Ngbaha:
• Oni mbakaditironi tipa ka manga gu tua du tipa kparaka waraga yamba aboro tipa Tingida Pakpio Yesu wenengai.
• Oni ke rimo agu aboro oni awirika Ziazia Kekeapai na yo, agumeroni, akuaroni sukuru yo, gaoni abadiasunge, gbiati kura aboro oni naini yo, ki yambu yo tipa Tingida Pakpio Yesu.
• Oni mangi gu geda Ziazia Kekeapai nga ga Tingida Pakpio Yesu na kini berẽkuriihe.
• Oni ye tipa Tingida Pakpio Yesu mbata fu regbo tipa ka dia agu aboro nika ye kugume.