Oni Mbakaditironi Tipa Tingida Pakpio Yesu na Kpotoroniyo Pusiapusia

1. Regbo Tingidapa Kpio Yesu nga wene regbo tipa ka manga ginipai?

¹ Gu Tingida Pakpio Yesu ni kadu Rago Ue, Marungu 26, nika fu bawene momu furani ani yugu gaani ngbarago tipa gupai Mbori amangihe ka batasa rani. (Yes. 61:10) Ka ani du na ngbarago mbata fu regbo Tingida Pakpio Yesu, si nika undo rani ani mbakaditirani wenengai. Wai rengbe ani ka mangaha wo?

2. Gine nafõ rani ani mbakaditirani tipa Tingida Pakpio Yesu?

² Mbakadatise Tipa Tingida Pakpio Yesu: Tingida Pakpio Yesu nga nyanyakipa pai ono ani naamangaha taata. Wa vura duhe wo, si naida ani ima mbakadatirani mbu regbo koyo kindi tipa ka bangirani agonga ti nyanyakipa apai ya. (Snz. 21:5) Si naida i sia gu regbo i nika mangaha ti ni na gu ba i nika mangaha rogoho. Si naida i gbia gu kpakuto gbiati gu imekakue si aidaha. Si naida i ima girisa gu ba aboro nika dunguratiyo kurogoho wenengai. Gu wirina nika manga gumbapai, si naida ko ima mbakadatiko wenengai na si naida agu aboro nikaa ta na kpakuto gbiati imekakue na agu aboro nambakada ba aboro ima ino agu apai si aida i mangihe. Zanga kapa, oni ima manga dungu agi apai re. Du ani na tambuahe tipa wai motumo tumorii aye na bata furani nafõngbaduraniyo ani mbakaditirani wenengai tipa gi nyanyakipa regbo re.—1 Pet. 1:8, 9.

3. Wai rengbe ani ka mbakada kpotoraniyo tipa Ga Gbia Riahe?

³ Mbakada Kpotoseyo: Si ninyanyakipa pai a ani mbakadi kpotoraniyo tipa ka rugatise nzunzu naapa wai nyakipa Tingida Pakpio Yesu. (Eza. 7:10) Tipa ka manga gupai re, si naida ani kpara regbo tipa ka geda gu papara Ziazia Kekeapai du tipa Tingida Pakpio Yesu na kini berẽkurii gu yangara arame nangia ga ga Yesu raka auru kpotosende. Berãkurii gu futise nga ga Yesu nika fõngbaduraniyo ani wiriki ko.—Gara. 2:20.

4. Gini undo naye be ga Yesu motumo nafu ngbarago foro gbe?

⁴ Kpio Kristo nayugo paru ga Yekova bakere pagbia. Si nakusa gorani be ingapai na kpio. (1 Yo. 2:2) Si nazaka gene tipa ani duna pazereda dagbarani na Mbori na kidu ngbagene nyenye unga. (Koro. 1:21, 22) Si naundo rani a ani nyakasi gaani dakutipai ka raka ringbisihe kuti gaani kparatise fu Yekova na ki nye niga Kristo ruru abawiriki. (Mt. 16:24) Wa oni kaa mbakadatironi tipa Tingida Pakpio Yesu na ki ndu tipaha, gaoni ngbarago kiingo akio!