Oni Undo Airavurari Tipa I Wirikipai Tipa Yekova

1. Waigu Yesu ayugu gupai nga ko na nunga koyo du airavurari ni?

¹ Bete arame anye gbua koyo tooni kuti kpio Yesu. Wa ko aguari Yereo yo, airavurari ue ki poi kuari ki ya: “Gbia mo iní pai fu rani!” Wa vura duhe nga Yesu aaberã kuriipa gu kere ambusa ko aandu ka gbiatiko na ni, Ko aru zaa, ki yambu agu akumba re koyo du ko ni na ki husi bangiriyo. (Mt. 20:29-34) Wai rengbe ani ka du na nunga airavurari tirani wa Yesu?

2. Wai rengbe ani ka manga dezirepai fu gu iravurari ka ani gbia ni gene tungusapai yo?

² Mo Du Ni gu Boro Naundo Aundo: Ka mo gbia iravurari, gbe wa dagba aboro, mo yugu tiro funi na ki pe gupai funi nga mo naida ka undo ni. Wa duhe nga airavurari ni agu aboro i naamanga yo amanga gbegberẽ dedede, sidu, ni rengbe kaa gunde agunde mbata ho ka mo gbia ni ni. Ono tie, ka mo du ni gu boro du wa bakureani na ki yugu gupai nga mo na ndikidi nyemuni tiro, si nika sa ni ka ni gundenga ya. Si naida mo tingidi gupai a nga, avurari na angbatungaha ti ni, na gipai re rengbe ka saro mo ini bakio wai si aida mo undo ni. Fuo undo mo ni, mo rengbe na ya funi wẽ, ani naamangasunge yugo Ziazia Kekeapai fu aboro. Mo rengbe nageda veresi funi wa gu nga Atambuahe 146:8 watadu Yesaya 35:5, 6. Ka si du nga ni ima rengba ka geda gu kekepai du tipa airavurari, mo rengbe ka sana ni singia ni naida gu kura awaraga nga gu rengbe ka undo ni tipa ni rengbe ka wirika kura apai tipa Ziazia Kekeapai. Mo rengbe arengba ka undo ni na gu dede afugo gaani awaraga du rogo gu gaani bangiriba nga ga Internet nga jw.org. Ka si du nga gani kompiuta na gu mbakadapai rogoho nagedapai boro kini gi fugoho agia, rago ima rengba ka ngba ti ni ka gbia gu kekeapai du rogo jw.org gbiati agu awaraga nga gu rengbe ani ka kusaha rogo RTF (Rich Text Format).​​—Oni bi gu sanduki nga “Ho Mo Aundo Iravurari Ni . . . ”

3. Wai rengbe ani ka gbata airavurari rogo gaani dagbarago?

³ Oni Gbata Airavurari: Si ima mbu tipa ani gbia airavurari ho ani atungusapai ni kporo na kporo bambiko badunguyo ni naagunde agunde ka fura na gu kungbo aboro naye ku kpuyo i ainongo yo ya. Sidu, si naida ani mangi bakere asadatise tipa ka “gbata” ngbatunga agu aboro re tipa ka manga dezirepai fuyo. (Mt. 10:11) Ya mo gamo badiasunge ho watadu kuaro sukuru yo ni iravurari? Mo mangi ome ka tona fugo na ni. Ka si dunga gamo dagbarago na gu sukuru nga ga airavurari rogoho, mo fu bete gu gaani awaraga nga gu du tipa airavurari ku rogo gu sukuru re tipa i ki moihe rogo gu babanda abuku du tipa gedaha. Ya mo mo ini boro nga guni du gani borokporo ni iravurari? Ya mo gamo dagbarago na riigbu rogoho nga gu naundo airavurari na ahe watadu kini dudua abambu fuyo? Mo pe gupai fu gu boro du gani boro ni iravurari, gu boro nadia aboro kugume rogo gu basunge re watadu barugupasunge nga, aDezire Yekova na nyemu ka undo airavurari, na ka fu gu kekepai du tipa airavurari fuyo watadu dede afugoho a. Mo yugu gu mokido nga ga Ziazia Kekeapai funi nga gu nagumba gupai nga Mbori nika dia vurari kusayo nyeanye kindi. Mo ima rengba a ka maa gu vidio funi du rogo gaani bangiriba nga ga Internet nga jw.org du riihe nga “Without It, I Would Feel Lost,” nga gu du na gu pangbanga rogoho nga ga kumba ni iravurari nga guko nagbia undo gbe ti du na gu Ziazia Kekeapai du tipa airavurari beko. Ka mo ape ndu gupai fu airavurari mo niye ti ni ka biyo, si rengbe ka zaka gene foro tipa mo naafura na dungu airavurari.

4. Gini apai ani awirikaha ti gu pangbanga nga ga Janet?

⁴ Wirina ni iravurari du rimori nga Janet andu ku rogo ba nga gu airavurari asungo rogoho. Janet atona fugo yo na kura paranga dee sa. Ri aya fu gu paranga dee re wẽ, “Yesu ahusi bangiri airavurari tipa ka yugo gupai nga ko nika husa bangiri airavurari dunduko rogo zegino.” I asaki Yugoti 21:3, 4 wa sa na ri, na Janet ki saki wai furi gi kidohe re nika da ti rengo vurube ga Mbori Kindo. Gu dee re aongo tipa bete regbo na fuani ri ki ya: “Mi aagianga pai wa gure mbata tipa airavurari te. Badungu agu aboro angianga airavurari ya naberã gupai nga aboro navurari mbiko agu apai i amangihe watadu gu atitayo amangihe bakuru kusayo.” Janet ayugu pa gu buku furi nga Gini Apai Nzunzu Ziazia Kekeapai Ayugoho?, na awere, ri nawirika Ziazia Kekeapai na ri bara ue rogo poso yo.

5. Wa vura duhe nga ka ani husinga bangiri airavurari wa Yesu te, du na nungayo tirani rengbe ka ye na gini amaku?

⁵ Rengo ngaha nga, ani arengbanga ka husa bangiri airavurari wa gu Yesu aamangaha te, ono ani ima rengba ka undo agu aboro mbori gi zegino re na kisi berã yo, kodihe na agu aboro nga airavurari tipa i gi gu rengo du rogo Fugo Mbori yo. (2 Kor. 4:4) Yesu ahusi agu akumba naadu ue mbembedi ku Yereo yo bambiko ‘nungayo amangiko.’ (Mt. 20:34) Ka ani du na nunga airavurari wa Yesu, ani gbia gu ngbarago agbia naye mbiko undo kura aboro i wirikipai tipa Yekova nga guko nika nyasariipa vurari nyeanye kindi.

[Gu sanduki du ti kpewaraga 3]

Ho Mo Aundo Iravurari Ni . . .

• Mo fura fu kina ni nzunzu, ono ka mo tumbanga fugoro kuari gbe ya. Wa vura duhe nga airavurari angeranga te, i nagiapai agia wenengai.

• Mo zadi beni watadu gani tope funi ki ngbe funi mbatayo ho mo agasa ni ni. Mo nindu kina kuti wai ni andu, ni kini ye tingba fuo ro sayo. Ka mo bi ngua, mbia watadu kura he bangiri gene, si naida mo pepa ha funi nibasa.

• Mo mangisunge amanga na agu afugo nga “mo bi” na “mo ngere.” Airavurari naamangasunge amanga na agi afugo re. I “nabi” pai abi berãyo yo, na ho i asakapa he ni fuyo, i nabi suraha abi berãyo yo.

• Oni mangi sakapai na ni rogo gu ba du ni zezeredihe, zanga waawaa. Airavurari naadunga dedede wenengai rogo agu aba du na waawaa rogoho te, bambiko si ni mbumbuhe fuyo i ini gupai namanga patiyo.

• Ho mo aguari ni pati ni, mo pehe funi nga mo ima ndu. Ni andu kaa fura fu kungbo rago na zee ki ndu ka zio ni.

• Mo hiisi gu fuomu nga Please Follow Up (S-43) ki fuhe fu bakeapai ka si du nga gu iravurari yugu nyemupai re arakanga rogo gamo dagbarago te.