Mbakada Gaani Gene Tungusapai—Raba Abawiriki Ziazia Kekeapai I Sonosi gu Sino Nga ga Wisigopai Nisase

Ndu Gupai Duhe Ti Ni na Nyanyakipaha: Tipa agu aboro ani awirika Ziazia Kekeapai na yo nyaki rogo toro yo, si naida i hiisi berã yo na ngbaduyo yo na gu banguapai du rogo Fugo Mbori yo na agu apai si ayugoho. (Eb. 5:12–6:1) Tipa ka manga wisigopai nisase, si naida bakere asadatise. Si nakoda ringbisa vovo apai na agu ani naima inoho na ki bi gupai ani narengbe ka wirikaha ti ni. (Snz. 2:1-6) Wirika manga wetekapai nisase nika undo yo i ini wai ka mangasunge na gaani awaraga nga ga aKristano ka karagapai kuti agu asanahe aboro naasanaha. Gu kakaka asadatise i amangaha tipa ka manga agu apai i awirikaha nika undo yo i ru nyanyaki barangba agu aˈasada ka i agbiatiyo na ni wangia yo aKristano.—Rk. 6:47, 48.

Wai Rengbe Boro ka Mangaha:

Mo nyakasi ndu gupai funi nyakipa kpara fu Yekova tipa undo ti ni mbata fu wirika oni pai.—Yo. 14:26; 1 Kor. 2:10.
Ti kina tonatonaha, mo ngarasi gu boro mo awirika Ziazia Kekeapai na ni, ni naambakadaha mbu regbo koyo kindi. Mo yugu ga waraga funi, na ki yugu wai rengbe ni ka gbahe tii memeapai.
Mo undo gu boro mo awirikapai na ni ni naakaragapai rogo kina gaani afugo nitini. Ka oni sanga gaoni wirikapai si du gbua nga mo nasanahe ni ki gedi karagapai kina waraga yo ya.
Mo ngarasi ni ni naageda Fugo Mbori naˈauru dũ. Mo yugu gu ringbisapai nga ga geda Ziazia Kekeapai du rogo gaani bangiriba nga ga Internet nga jw.org funi, nga gu nayugo wai rengbe ni ka mangaha. Tipa ka sonosa gu sino nga ga geda Ziazia Kekeapai naˈauru dũ, si naida bakere asadatise, ono ka ani mangihe wo, sangbanaha nadu ni bawenehe.—Tam. 1:2, 3.
Mo yugu mangasunge na Watchtower Library watadu Watchtower ONLINE LIBRARY fu gu boro mo awirikapai na ni ni ini wai ka gbia akaragapai kuti agu asanahe aboro naasanaha ni manga ni sunge na ni. Mo undo ni ni ini gu gurusigurusi rimo awaraga nga gu i naamangasunge na ni gbe ba adunguratise yo.

Oni Asadi Gipai Re Rogo gi Diwi Re:

Ti digido umba riipai watadu kapita, mo sana gu boro mo awirikapai na ni ni fugu agu apai ni nawirikihe ni wiri guruhe. Ka boro adunga bero mo awirikapai na ni ya, mo asadi ka fugo gupai mo nagedihe rogo Ziazia Kekeapai watadu rogo Ngbaõbambu Sinziri nisaro tipa ka inido tiro na gedapai wenengai na kini girogoyo.