Oni Mangisunge na Apapara gu Buku Nga Ziazia Kekeapai Ayugoho Wenengai
Ka gu boro ani awisigo Ziazia Kekeapai na ni aawirika gupai du rogo Ziazia Kekeapai na kini mangipai kuti ni, si nika sani ni sono rogo toro yo na ki kusi zuzu toro. (Tam. 1:1-3) Ani rengbe ka undo gu boro ani awisigo Ziazia Kekeapai na ni ni sono rogo toro yo ni manga ani sunge wenengai na apaparaha gu buku nga Ziazia Kekeapai Ayugoho.
Agu Asanahe du ti Tonatona Akapita: Akapita dunduko natona na asanahe nga gu i nakaragapai kutini rogo kapita yo. Mo ima rengba ka sana agu asanahe re tipa ka ba nyemupai ti gu boro mo awirikapai na ni mbata fu oni tona wirikapai. Watadu mo rengbe ka sana ni ni pe gani aberãpai ni wiri guruhe kuti agu asanahe re ni basasa. Ka ni gumba gupai arunga ya, si aidanga mo rugu ni ti kina gu regbo re te. Gu gani aberãpai re nika undo ro mo ini agu apai si aida mo nyakasihe funi gbe rogo gu kapita re.—Snz. 16:23; 18:13.
Kura Apai: Ka gu boro mo awirikapai na ni gi rogo gupai yo oni awirikaha na ki idi kutini, gupai si aida mo mangihe gbua nga ka gumba gupai funi nga ni gedi Kura Apai ni tini nga gu du ti digido buku yo, nga gu nandu sa na gupai oni nawirikihe. Ono ho oni nika ye ni berewe tipa gaoni wirikapai, mo ki di bete aminiti ka sana ni singia ni gi rogo agu apai yo ni agedihe ni sani re. Ono tie, ka si du nga ni nika gbia bakere undo agbia ti ni, si naida mo di regbo ti regbo gaoni wirikapai ka saka gu Kura Apai re watadu betehe ni geda oni agenewaraga na kini sana ni na agu asanahe mo aima mbakadaha mbu regbo koyo kindi.
Sanduki Fugöpai: Gu sanduki fugöpai du ti digido akapita yo na apai rogoho nga gu nakaragapai kuti agu asanahe du ti tonatona kapita. Mo ima rengba ka mangasunge na ni ka ino singia gu boro mo awirika Ziazia Kekeapai na ni ima giarogo gu memeapai yo oni nawirikihe na ni, na ni ima rengba ka sakarogoyo ni tini a. Mo gedi agu apai du yo dunduko ni basasa na fugoro kuari gbiati agu averesi nandu na ni a. Fuo gure, mo ki sana ni ni mangisunge na agu averesi re ka sakarogo ndu gupai yo du gupai re ti ni nga rengo.—Amo. 17:2, 3.