Wai Bakusiahe Ayugopa Gako Akidohe

Naatona ti gu regbo i akusi aboro, Bakusirani aima fura na aboro vurube amaraika gbiati anebi. Kurigure, ko asia gupai nga i ke gako pangbanga gbiati agu amaku ko nakidopaha rogo buku yo. Agi akidohe naye be Mbori re na maapai kurii gamo raka kumbatayo. Sidu, wari rengbe mo ka gbia ga Mbori akidohe ni areme?

Ga Mbori pangbanga furani gudu ni kekehe rogo Ziazia Kekeapai yo. (2 Timoteo 3:16) Wai gu Mbori amangisunge na anebi tipa i ke gako pangbanga? (2 Petero 1:21) Mbori amoi gako aberãpai ku berã abakeapai yo, fuoho, i ki kehe ku rogo buku yo. Kina gu bangisapai re namanga areme. Ani rengbe ka sakapai tipaha nimanga ani sunge na gu kpiapai nga ga gu babagiahe namangasunge na bakeapai tipa ni ke apai kuba ni, agu apai gu bakeapai re akehe ani rengbe ka ida kuti gupai nga babagiahe du nga baenge kehe. Wakina gure a, wa vura duhe nga Mbori amangisunge na akumba i ke gako pangbanga, ko du nga Baenge ke Ziazia Kekeapai.

FUGO MBORI ROGO ZEGINO DUNDUKO

Ga Mbori pangbanga na nyanyakipaha, si du ko aida aboro dunduko gedihe ti ni na ki gi rogoyo. Areme, gako “nyenye pangbanga” fu “arikaaboro, na ngbatunga aboro, na ngbatunga afugoyo” dunduko. (Yugoti 14:6) Mbiko gu undo nga ga Mbori, boro ima rengba ka geda Ziazia Kekeapai naabaha watadu paparaha rogo afugo niima susa 3,000, kisusi ai buku rogo zegino dunduko.