“Pauro ki Tambua Mbori ki Ngarã”

Ho gu dungurati naadu Roma yo agi gupai ni nga Pauro naye, awirina andu nunguro nga amairo 40 tipa ka gbia ko. Wai gu gayo nyemuse adu na maapai kurii Pauro? “Ho Pauro abi yo ni, ko ki tambua Mbori ki ngarã.” (Amo 28:15) Wa vura duhe nga Pauro angia gu boro nanaangarasa adungurati, bara gere ho ko adu ni bambukiso yo, ko nangia gu boro nagbia ngarasaro.—2Kor 13:10.

Areme, ababi adungurati nandu anunguro ku rogo adungurati kaa ngarasa awirina. Wakina ga Mbori aboro dunduko, ti kura aregbo i nagbiatiyo agbia na mbugo, bakabangirise, gbiati gberãrago. Ti gu regbo babi adungurati na diako nika ye berewe ku rogo gaoni dungurati, ginipai mo nika mangaha ka undo yo i gbia ngarasaro, tipa ‘oni mongo wasa dagbaroni na yo’?—Rom 1:11, 12.

• 

  Mo songodi gu mbakadapai nga ga kura gene tungusapai yo. Babi adungurati nagbia ngarasaro ho abatungusipai ambupa kura gayo apai ni tipa ka gbia undo ti gu kparakpara poso re. (1Tesa 1:2, 3; 2:20) Mo ima rengba ka mangasunge ni moundo abazakigene rogo gu diwi babi adungurati aye ku rogo gaoni dungurati rogo ru. Ya mo mo rengbe ka kura na ko gbiati diako gene tungusapai yo, watadu ka ndu na boro sa dagbayo fuo gamo abawisigi Ziazia Kekeapai? I nagbia ngbarago ti mangasunge na abatungusipai ni bakiakia, kodihe na vovo abatungusipa watadu agu aboro ainongo tungusapai wenengai ya.

• 

  Mo di yo kugume. Ya mo mo rengbe ka dia yo kugume i nira kpuro yo watadu tipa riahe? Gere nayugo gupai fu babi adungurati na diako nga mo ima kpinyemu yo. I aidanga na bakere apai te.—Rk 10:38-42.

• 

  Mo degeturo na ki mangipai kuti gani rugaapai na gani rugute. Babi adungurati naundo rani ni nyemuse tipa ani bi wai rengbe ani ka mbakada gene gaani mangasunge fu Yekova. Ti kura aregbo, ko ima rengba ka fu nyanyaki rugute furani. (1Kor 5:1-5) Si nafu ngbarago fuko ho du ani ni na giasangba na ranigose.—Eb 13:17.

• 

  Mo yugu tambuahe. Mo pepa wai fu babi adungurati na diako gu ome i amangaha na undo ro. Mo ima rengba ka pehe ni ngbaro watadu ka kehe fuyo rogo wiri waraga.—Koro 3:15.