Oni Naangera Angera Kakaka Nisungudi Yugo Awiri Mbori na Hipai

Bagizo regbo wai mo atona nipidi ga Mbori Kindo tipa si ye? Ya mo mo naahipai akpakarapai ki vura du vurũ? (Rom 8:25) Gu kura aKristano nagbiatiyo na sogote, rungosiro, zio ku bambukiso yo, watadu serekpohe kuti kpio. Badungu aguyó nasovura kuti akpakarapai wa bangabanga kaza watadu gbinza.

Ginipai rengbe ka undo rani ani naangera kakaka ka ani vura kaa gbiatirani na akpakarapai vurũ? Si naida ani nyakasi gaani idapase ni geda ani Ziazia Kekeapai na aˈuru dũ na kini berẽ dudunguro kurii agu apai ani agedaha. Si naida ani moiberãrani kuti gaani maabangirise. (2Kor 4:16-18; Eb 12:2) Si naida ani sana Yekova rogo kparakpee yo na ki zungodi ko tipa gu ome nga ga gako ziazia toro. (Rk 11:10, 13; Eb 5:7) Gu Barani du ngbangbaturũ yo nga boro nyemuse ima rengba ka undo rani ani du “na gbanga hipai ni ngbarago.”—Koro 1:11).

ONI BI GU VIDIO NGA, ANI DU WA KA ANI “ORO GU OTO NGA GA HIPAI”​—ANI DU NA GU KIDO NGA ANI NIKA DIA MOSORO ADIA, FUOHO, ONI KI KARAGAPAI KUTI AGI ASANAHE DU KUSENDE RE:

• 

  Gini “rago gbia kuti mamu” rengbe ka manga rogo raka yo? (Batu 9:11)

• 

  Wai gu rengbe kparakpee ka undo rani ho ani agbiatirani ni na aˈasada?

• 

  Ka si du nga ani arengbanga ka manga ga Yekova sunge ni bakerehe wa gu ani anaamangaha mbata te, tipagine si aida ani moiberãrani ti ni kina kuti gupai rengbe ani ka mangaha?

• 

  Ginipai naundo ro mo du na gu kido nga mo nika gbia mosoro agbia?