Mo Mangisunge na Avidio Tipa ka Yugopai fu Gamo Abawiriki Baibiri

Agu ahe i abihe abi nagbeberã gu boro nabihe na ki undo ni ni tingidi gupai ni nawirikihe. Gaani Bakerepa Bayugupai nga Yekova aima mangasunge na agu ahe i abihe abi tipa ka yugo nyanyakipa awirikapai. (Bam. P. 15:5; Yere. 18:1-6) Bawene Bayugupai nga Yesu aima mangasunge a na ni. (Mt 18:2-6; 22:19-​21) He sa dagba agu ahe yo i abihe abi ni ima du na bakere undo ti ni vuru agu agarã yo susi nga vidio. Ya mo mo naamangasunge ngba wene gene na avidio tipa ka yugopai fu gamo bawiriki Baibiri?

I ima mbakada avidio bawe tipa si undo rani ani yugu agu awirikapai du rogo gu burosua nga, Gu Wene Pangbanga Naye be Mbori! Rii agu avidio re ni basasa nandu wa sa na sanahe sa dagba agu asanahe keke yo ho ni bibiri he rogo gu burosua re. Gu du rogo gu bangiriba nga jw.org i amoihe na guhe natingida rani na pa gu regbo si aida i yugu avidio ti ni ni basasa. Kurigure, kura avidio nasongoda agu apai du rogo agu awaraga du tipa wisigopai du rogo gaani Aũsunge Nga ga Yugopai.

Ya mo mo nasaka gupai du rogo Baibiri yo nga gu rengbe kadu ni mbumbuhe fu gamo bawiriki Baibiri ni girogoyo? Watadu ya mo gamo bawiriki Baibiri nasovura kuti asada nga gu du ni kparakparaha? Mo weteke agu avidio du rogo jw.org® na JW Broadcasting® ka bi gu rengbe ka undo ni. Isoke mo na gamo bawiriki Baibiri ima rengba ka bi gu vidio re wa sa na fuoho oni ki sakipai tipaha.

I nakusa vovo avidio rogo adiwi ni basasa. Wa mo nikaa biko ho, mo berẽpa wai rengbe mo ka mangasunge na ni ho mo ayugopai ni fu kura aboro.