Wai ka Mangasunge na Kpia Wai ka Tungusapai

Naatona rogo Ngi 2018, akpia wai ka tungusapai aima digo ni kuru ti kpoto Gaani Raka Nga ga AKristano na Gaani Sunge—Waraga Dunguratise. Wai gu rengbe ani ka mangasunge na ni?

Ho du mo ni na gu Sunge Nga ga Gude Sukuru: Si naida mo mangisunge na gu sanahe, veresi gbiati gu kura sanahe du rogo kpia wai ka tungusapai. Ono tie, gipai re ayugongo gupai nga si naida mo mangisunge na kina boro agu afugo zukazuka du rogo gu vidio nga ga kpia wai ka tungusapai te. Mo ima rengba ka mbakadapai ka gumbapai ngba kura gene kia, ka tona fugo ngba kura gene kia, na ka sakapai ngba kura gene kia. Mo ima rengba a kafu waraga dagba Gaani Aũsunge Nga ga Yugopai ka si vura du vurũ nga i agumbanga paha rogo gu paparaha re te.

Ho du mo ni Gene Tungusapai Yo: I nakusa akpia wai ka tungusapai tipa si fu aberãpai furani. Ka boro yugu ndikidi nyemupai na kini idi ka ino dungu apai mo ima rengba ka ndu kumbatayo na sakapai, isoke, ni manga mo sunge na agu apai du rogo kpia wai ka karagatise fuo boro. Mo ima rengba ka rimiso kura apai ku rogo agu akpia wai ka tungusapai re, watadu ka mangasunge na kura pai kia. Ya mo si rengbe kadu nga gupai naadu rogo gu kpia wai ka tungusapai naadu rogo gu diwi nasusi watadu kura veresi kia ngba ti aboro rogo gamo dagbarago? Ya mo agu aboro naraka rogo gu rago du mo rogoho na nyemu gupai mangi barambeda, watadu gu pangbanga kuru? Mo ima rengba ka mangasunge na akpia wai ka tungusapai ngba agene ni bakiakia, ono si naida gamo sásá du nga ka manga ‘apai dunduko mbiko wene pangbanga, tipa kadu tini na kura aboro.’—1Kor 9:22, 23.