Avunguagude, Oni sa Awironi i du na Inohe

Ani naraka rogo gu zegino naida ani idi kuti gupai nga wenepai nga gbegberẽpai na gbegberẽpai nga wenepai. (Yes 5:20) Si nafu kina gberãrago tie nga, gu kura aboro namanga gupai Yekova asogaha, kodihe na gbegberẽ mangaapai dagba kumba na kumba watadu dee na dee. Agu agude du sukuru yo watadu gu kura aboro ima rengba ka sosoda rukutu awirani tipa i pekefuo gayo kpiapai. Wai gu rengbe mo ka mbakada awiro tipa i sovura na diabese kuti gi ngbatungapai re na agu akura aˈasada du wa ha?

Mo undo awiro tipa i du na inohe tipa ga Yekova arugute. (Pa Mot 18:3) Mo ni yugu gupai fuyo tooni tooni Ziazia Kekeapai agumbaha tipa kodaba. (Pa Rug 6:7) Mo sana tiro nga: ‘Ya mo mi yugupai fu awire tipa wene gene yugo nyemuse, ndu gupai si aida ani vo iriiri aroko ti ni, na ndu gupai si aida ti ni ani irisi gu gbugbuapai du tipa kura aboro? Ya mo awire aino gupai si aida i mangihe ka boro yugu agu ahe fuyo nayugo kpia kundiri aboro watadu ka sana yo i mangi gupai Yekova aya si ni gbegberẽhe?’ Ka i du na bakere inohe, si nika undo yo tipa i ne kere akpakarapai. (Snz 27:12; Batu 7:12) Ka mo yugupai fu awiro, mo nika yugo gupai nga mo na nyemuse tipa gu wene ũkumbo Yekova nafuhe foro.—Tam 127:3.

ONI BI GU VIDIO NGA, ONI DUA GU BAMBU NIKA RAKA ARAKA—ONI BANDA AWIRONI BE “GU PAI GBERẼ AGBERÃ,” NA FUOHO, ONI KI KARAGAPAI KUTI AGI ASANAHE DU KUSENDE RE:

• 

  Tipagine aboro naatiko atiko ti ni tipa ka yugopai fu awiriyo tipa kodaba?

• 

  Tipagine si aida avunguagudee raba awiriyo ti ni rogo “ga Gbia rabahe na rugahe”?—Ef 6:4

• 

  Gini ahe ga Yekova riigbu nafuhe tipa si undo avunguagude i yugupai fu awiriyo tipa kodaba?—w19.05 kpe. 12, sanduki

• Tipagine si aida mo niifura ti ni dedede na awiro mbata fu i gbiatiyo na kere kpakarapai?