Wai ka Undo Tingbafuo Gberãngo

Ome agberãngo nakio areme kina kumbatayo ki susi gu nidu mbata. Tipa ka fu undo ho gberãngo amanga ni, si naida na wene mbakadaapai gbiati wene fugodagbase. Mbiko gi ndupai re, Riigbu Bipasunge ima manga mbakadapai tipa i moi gu Rondo du Tipa Undo ti Regbo Gberãngo rogo abe-basunge dunduko.

Ho agu awirina du rogo gu rondo re a inopai ni tipa gu gberãngo mangi, i nayamba agu abaakumba du rogo gu dagbarago re niipo tipa ka ino gu undo abatungusipai nika ida na ni. Ka si du nga sangbana gberãngo ima kio na ka rengba adunga be agu awirina du rogo gu dagbarago re i mangipai sa ni ya, be-basunge nasia agu awirina naima rẽ tipa i ngbembatayo rogo sunge fu undo. Agu awirina re ima rengba ka sanahe tipa abaundosunge watadu ka sanahe tipa gu kura ngbatunga ahe i kedihe fuyo, watadu i ima rengba ka ngbeka agu ahe du zingoho kina rogo gu rago re na ki kparakaha.

Dungu wene aundo duho ti mangaapai ngba gi gene re. Si nazogosa ome sunge, vunduvundu apai, gbarasa marã, gbiati kura ahe, nga agu apai rengbe ka manga ho awirina adiaberã ni ka mangapai ni tiyo.

Agu awirina be-basunge nasia yo ima rengba ka diaberã tipa bakio gu marã si aidaha gbiati gu bange abaundosunge si aida yo tipa gi sunge fu undo re. I na inidotiyo a na agu aborosunge du rogo gu rago re nga aguyo rengbe ka undo na pa keda gaani undo niipo. Sidu, si aida nga aboro guari nitiyo ka dungura marã, ka keda ahe, watadu ka ndu ku rogo gu ba gberãngo namangi rogoho te, kina gu sa ka i sana yo i mangihe wo.

Wa vura duhe wo, ho gberãngo amanga ni, ani naduadu na nyemu ka undo. (Eb 13:16) Ani ima kpinyemu awirinarani! Ginipai rengbe ani ka mangaha? Gu nyanyakipa pai rengbe ani ka mangaha nga, ka manga kparakpee tipa agu awirina gberãngo namangi yo gbiati agu awirina nafu undo. Ani ima rengba a ka ba marã ku rogo gu sanduki nabi pa gu sunge namanga rogo zegino dunduko. Tiibe gu rugapai nga ga Riigbu Bipasunge, abe-basunge nika bi wari du nzunzu rengbe gi marã re ka fu undo ni gbe. Ka si dunga ani naida ka manga gi sunge re ni tirani, ani ima rengba ka yugo gupai nga ani nga regerege ni hiiso ani gu fuomu nga, Local Design/Construction Volunteer Application (DC-50).

ONI MOI GU VIDIO NGA GU HIHI IME MAI NAGBARASI ARAGO BRAZIL YO, FUOHO ONI KI KARAGAPAI KUTI GI SANAHE RE:

Ginipai ngba tiro tipa gu sunge fu undo aDezire Yekova amangihe tifuo gu hihi ime mai nagbarasi arago Brazil yo rogo 2020?