Gini Regbo Digido Zegino Nika ye Tini? Gupai Yesu Apehe

MO BINGO AGU APAI UE YESU APEHE TIPA DIGIDO ZEGINO:

“Oni ngere tie, bambiko oni aina nga uru he na gu saa a te.”—MATAYO 25:13.

“Oni bánda tironi abanda, oni ngére angera ki nikpari; bambiko oni aina nga ragoho te.”—MARAKO 13:33.

Sidu boro ho rogo zegino ini gu regbo nzunzu gi digido zegino re nika ye tini te. Ono tie, Mbori ima maa “ragoho”—gbiati gu uru na “na gu saa”—digido zegino nika ye tini. (Matayo 24:36) Ya mo gere nayugo gupai nga ka ani iningo gu regbo digido zegino nikaa mbeda tini te? Wa gu sa te. Yesu ape gupai fu gako abawiriki nga i naangera tipa agu agopai nika yugo gupai nga digido zegino ima mbeda.

AGU APAI YESU APEHE

Yesu afura tipa agu apai si adu nga si nika yugo pa digido rago, ko aya: “Rika aboro azínga kuti gu rika aboro, ngbi ki zingi kuti gu ngbi; angbongi nikadu na abazigizo rogo agu arago.” (Matayo 24:3, 7) Ko ape gupai a nga “angbongi”—na riri akaza nika du. (Ruka 21:11) Ya mo mo nabi agi apai Yesu agumbaha kumbatayo ni sangbaanebi re?

Areme aboro nambu be avura, gomoro, na abazigizo, gbiati akaza ti mburu kuraha. Ni kpiapai rogo 2004, bakere bazigizo amangi rogo gu bariwara-ime nga ga Indian Ocean nga gu nasa bakere sungburosungburo baime na si ki imi aboro nga 225,000. Vuru garã yo biata, gu riri kaza nga Korona ima imo dungu amirioni aboro rogo zegino dunduko. Yesu ape gupai nga apai wa gere nika yugo gupai nga digido gi zegino re ima mbeda.

“YANGARA ARAME”

Baibiri nasakapai tipa gu regbo nika du mbata fu digido zegino nga “yangara arame.” (2 Petero 3:3, 4) 2 Timoteo 3:1-5, nape gupai nga, ti yangara arame gu mangapai nga ga aboro nika du ni gbegberẽhe. (Oni bi gu sanduki nga “Ngbutuko Mbata fu Digido Zegino.”) Ya mo mo nabi aboro areme na agu asino tiyo nga ga gbangbati, ngbaduse, kere zinga, zanga nyemuse? Agi apai re a nga gu gopai nayugo gupai nga ani mbembedi na digido zegino.

Yangara areme nika ndu tipa bagizo regbo wai? Ringbisihe kuti Baibiri, “kina bete rago nye.” Na Mbori ki ye ka gbarasa, “agu yo nagbarasa kpotosende.”—Yugoti 11:15-18, 12:12.

PARADIZO KPOTOSENDE IMA MBEDA!

Mbori ima maa gu uru na gu sa ko nika digiso gi gbegberẽ sino raka re ti ni. (Matayo 24:36) Ono tie, kura wene pangbanga kinaho—Mbori “akpi nga nyemu aboro kpi wa sa te.” (2 Petero 3:9) Ko nafu mamu fu aboro tipa i wirikipai tipa gako arugute na kini gi sangbako. Tipagine? Bambiko ko naida ani bati ti digido zegino na ki raki rogo gako vovo zegino, ho kpotosende nika du ni nabaha ni paradizo.

Mbori ima manga mbakadapai nga ga yugopai fu aboro rogo zegino dunduko tipa i wiriki wai kadu ni papara gako zegino nika du tii gako Kindo. Yesu ape gupai nga gu wene pangbanga du tipa ga Mbori Kindo i nika tungusaha “rogo zegino dunduko.” (Matayo 24:14) Adezire Yekova rogo zegino dunduko, adi abirioni asaa kuti tungusapai na kini yugupai fu aboro tipa gu pangbanga nga ga maabangirise du rogo Baibiri yo. Yesu ape gupai nga gu tua nga ga tungusapai re nika manga rogo zegino dũ mbata fu digido zegino da.

Regbo gu zogarago nga ga wiri aboro ima mbeda ka nyasa. Ono gu wene pangbanga duho nga mo ima rengba ka bata ti digido gi zegino re na ki raki rogo gu paradizo nika du auru kpotosende ane nga gu Mbori nakido paha. Gu kekeapai ngbefuo gere nika saka pai tipa wai rengbe mo ka raka goro gu vovo zegino re.