Akaragapai Kuti Asanahe Biama Tipa Digido Zegino

YESU KRISTO aya tipa kumbatayo wee, ‘digido zegino nika ye.’ Ko aringbisipa gu regbo re ki yaa: “Ni gu rago re bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.”—Matayo 24:14, 21.

Agu apai Yesu apehe tipa digido zegino, na gu kura kekeapai du rogo Ziazia Kekeapai nafura tipa digido zegino nakusa dungu nyanyakipa asanahe. Si adu niwenepai ka oni zaki gaoni Ziazia Kekeapai ka bi akaragapai kuti agi asanahe re!

●1 Gine Nika Digo?

Ziazia Kekeapai ayanga wee kina boro gi kpotosende re ini ka gbarasaha te. Bake apapara Atambuahe akepai ki yaa: “[Mbori] namoi amburu kpotosende ka i agbisa nga ha waragoagira ya.” (Atambuahe 104:5) Na pai ho rogo Ziazia Kekeapai nayugo gupai nga i nika zo aboro na we i ki go kusayo te. (Yesaya 45:18) Yesu nitiko aya kura aboro nika bata abata ti digido zegino. (Matayo 24:21, 22) Ginihe tie Ziazia Kekeapai apepaha nga si nika digo?

Gu zogarago nga ga awiri aboro nika digo. Ga Mbori toro adu kugii Daniere ko kepai ki yaa: “Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”—Daniere 2:44.

Vura na birikosi ime, wege, watadu sende nika digo. Atambuahe 46:9 nafura tipa gupai Mbori nika mangaha kini yaa: “Ko namanga pai, vura nyasi digida kpotosende no; ko nakua mboto, ki kuadi baso rukutu, ko nazo angbagidavura ku we yo!” Ziazia Kekeapai nayugo gupai berewe nga Mbori nika “gbarasa agu yo nagbarasa kpotosende.”—Yugoti 11:18.

Kuondiko na iraira sarangbanga nika digo. Fugo Mbori nakidohe niyaa: “Ruru aboro aráka zegino, airarengo ki nye rogo ho; ono i aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.”—Asanza 2:21, 22.

●2 Ti Gini Regbo Du Digido Zegino Nika Ye?

Yekova Mbori aima ringbisa “ragoho” nga guko nika digiso gbegberẽ apai na ki ye na gako Kindo. (Marako 13:33) Ono Ziazia Kekeapai ayugongo gu regbo digido zegino nika ya ti ni te, na kaani iningo ho a te. Yesu ayaa: “Boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Matayo 24:36) Ono Yesu na gako abawiriki aima gumba agu apai nika manga ho digido zegino nika mbeda ni. Ho agi apai du kusende re dunduko nikaa manga ni ti bangisa regbo na rogo arago dũ, gure nga digido zegino ima mbeda.

Ariapai rogo birĩ zogarago, na rogo agu apai nagberesa kpotosende watadu nagberesa aboro namanga wai si aamanganga mbata ya. Yesu akaragapai fu gako abawiriki ho i asanahe ni tipa digido zegino ki yaa: “Arikaaboro azínga kuti gu rikaaboro, ngbi ki zingi kuti gu ngbi; bazigizo nikadu rogo agu arago; angbongi nikadu; tonatona rungo nga agi apai re.” (Marako 13:8) Gu mokedi nangia Pauro akepai ki yaa: “Rogo kusa rago gbegberẽ rago aye. Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, i akpí nyemu sangba borose susi nyemu Mbori.”—2 Timoteo 3:1-5.

Tungusapai namanga rogo zegino dunduko rogo dungu afugo. Yesu ayaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Matayo 24:14.

●3 Ginipai Nika Manga Fuo Agi Apai Re?

Ziazia Kekeapai ayanga wee Mbori nika dia wene aboro ku ngbangbaturũ yo i raki yo nyeanye kindi na bakere ngbarago te. Gupai Yesu agumbaha nga, ga Mbori bambata ringbisapai tipa kpotosende duwa ka si mangi. Ko ayaa: “Aboro maku nga bayee aboro, bambiko i adú ni adikumbo zegino.” (Matayo 5:5; 6:9, 10) Tipa agu aboro nika kpiko mbata fu digida rago, Ziazia Kekeapai nayawee i nika zingisayo azingisa bekpio. (Eyobo 14:14, 15; Yoane 5:28, 29) Ginipai nika manga fuo gure?

Yesu nika sungo ngbangbaturũ yo kini zogorago ku auru kpotosende. Gu nebi nangia Daniere akepai ki yaa: “Mi abi yuguyuguapai yuru, oni ngére, boro aye wa wiri boro rogo mai ngbangbaturũ yo, ko ki da koyo du gu Bakuru Ko ni du ho kindi, i ki mbedesi ko ku bara bangiriko. I aasia pa zogarago fu ko na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko; gako zogarago nga nyenye zogarago, nga gu nikanyasa nga ya, gako ngbi nga gu ka i agbárasa nga ha wa sa ya.”—Daniere 7:13, 14; Ruka 1:31, 32; Yoane 3:13-16.

Agu aboro ga Mbori Kindo nika zogarago kuriyó auru kpotosende nika duna wene kpotoyo, bayo ki ngba angba, i ki raki zanga digidoho. Gu nebi nangia Yesaya ayaa: “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te.” (Yesaya 65:21-23) Gu mokedi nangia Yoane akepai tipa gu regbo re ki yaa: “Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”—Yugoti 21:3, 4.

●4 Ginipai Si Aida Oni Mangihe Tipa ka Bata?

Gu mokedi nangia Petero ayawee bete agu aboro nikaa raka rogo yangara arame nika tikango ati kuti gupai nga Mbori nika diaberã adia tipa gi zegino re ki digisi gbegberẽ apai dunduko. (2 Petero 3:3, 4) Petero azungodi aboro i mangi agi apai du kusende re.

I wirikipai ti agu apai namangi mbata. Petero ayaa: “[Mbori] ahe nga [fu mbusa] fu kuru zegino te, ono ko abatasi Noa nangia batungusi rurupai, na kura aboro saba, ni gu rago i aye na bangirimo ku auru gu zegino nangia ga azangasinombori.” (2 Petero 2:5) Petero aya tipa agu aboro natikango wee: “I tigayo nakpi nyemu gi pai re du ni okooko ho be yo nga, angbangbaturũ adu kina ho bakuru yo, na kpotosende ni mangimangi he be ime na rogo ime, mbiko gu pai nga ga Mbori; na be agi apai re gu zegino nadu ho mbata, ime afu afu ku auru he si ki gberẽ. Ono agu angbangbaturũ du ho awere na kpotosendea si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori.”—2 Petero 3:5-7.

I raki ringbisihe kuti ga Mbori andiko. Agu aboro naida ka bata, si naida i naamanga “ziazia apai na sinombori.” (2 Petero 3:11) Dungu apai si aida boro mangihe angianga ka ya gbua wee ní na idapase ya, watadu ka sungo asungo kini berẽpa mangapai kusa tipa gupai gbua ka bata ho digido zegino nika ye ni ya.

Gini ngbatunga mangaapai Mbori aida nani? Si ngba angba oni wisigi agu apai oni nainihe na gu Ziazia Kekeapai ayugoho tipa gipai re. ADezire Yekova nika duadu na ngbarago ka undo roni ka oni idi i undo roni. Oni sana yó i yugu agi apai re furoni rogo Ziazia Kekeapai. Ka oni mangihe wo, si nika sa roni ka oni gundenga be agu apai nika manga kumbatayo ya, ono oni duna kido, ka kereapai vura kaa manga awere vurũ nga gu naba gunde ti aboro.

[Gu rukutu kekeapai du bandu kpewaraga yo]

[Gu kpiahe du ti kpewaraga 7]

Kpotosende agonga kusayo te, kina agu aboro nagbarasaha