Ya mo Manga Weneapai fu Kura Aboro Rengbe ka Saro Mo Gbia Wene Raka Kumbatayo?

Tipa dungu kama agarã, badungu aboro abi gupai nga, manga weneapai fu kura aboro nga gene tipa ka gbia wene raka kumbatayo. Ni kpiapai, Asia yo, dungu aboro idi kuti gupai gu bakere bawirikipai nga Confucius agumbaha nga: “Gupai mo aidanga ka mangaha fu tiro ya, ka mo mangingo ho fu kura aboro ya.”

GU SIAPAI DUNGU ABORO AMANGAHA

Dungu aboro idi kuti gupai nga, wene mangaapai rengbe ka sa yo i gbia wene raka kumbatayo. I naasada kadu ni aboro irisa, kini sonosi wene asino, kini mangi weneapai rogo gayo dagbarago na kini banda wene sangbakpotoseyo. Dee du rimori nga Linh, naraka Vietnam yo ape gupai nga: “Mi aidi kuti gupai nga, ka mi agumba rengo ti aregbo dunduko mi nika gbia amaku ni sangbanaha.”

Kina gu bangisa dee re nakparaka riahe fu agu aboro adunga kporo tiyo ya.

Kura aboro namanga weneapai mbiko gayo ida nga ga apambori. Kumba du rimoko nga Hsu-Yun, naraka Taiwan yo aya, “I ayugu gupai fere nga, ka si du nga boro namanga weneapai niki du ni ungani ni nika gbia ngbarago tifuo kpio ni, ono ka si du nga ni aamanga gupai du ni gbegberẽhe ni nika gbia ambusa tingbafuo kpioni.”

ASANGBANAHA NGA GINE?

Gu dee re na gberãrago gbiati mbugo ti digido gu uru re, wa ri apigo wiiri.

Kina rengo du ngaha nga ho ani amanga weneapai ni fu kura aboro, ani nagbia wene asangbanaha. Ono tie, agu aboro naasada kaa manga wene apai fu kura aboro nabi gupai dedede nga, kura aboro amanganga pai na yo ni wenehe wa gu i aberẽhe te. Gu kura dee du rimori nga Shiu Ping, naraka Hong Kong yo aya. “Mi aye ka ino gupai ni tire nga, agu aboro namanga weneapai dedede i agbianga weneapai ni sangbaha te. Mi aasadi tire kaa ngerafuo gimi aborokporo na kini mangi weneapai. Ono gimi rogatise aima gburuwa na kumbami ki mbu re na wire.”

Dungu aboro ima bi gupai nga pambori asanga aboro i du ni wene aboro te. Etsuko, nga dee naraka Japan yo, aya. “Mi aamangasunge rogo gu riigbu nga ga pambori na mi ki da ni nangere kurii agu apai nga ga paranga aboro. Kina ngbare nazere ka bi gupai nga, aboro pambori aamanga wasiwasi apai, kini sovura tipa pagbia na kini mangisunge na gu marã nga ga kanisa ngba gbegberẽ gene.”

“Mi aasadi tire kaa ngerafuo gimi aborokporo na kini mangi weneapai. Ono gimi rogatise aima gburuwa na kumbami ki mbu re na wire.” —SHIU PING, HONG KONG

Bete agu aboro nafu tiyo tipa kaa manga gi weneapai re, kina rago nagberã tiyo ka bi gupai nga, weneapai ho namanga fuyo mbiko pa manga weneapai te. Gere nga gupai naadu tipa gu dee nga Van, naraka Vietnam yo. Ri aya. “Auru dunduko mi anaangbe zukuzuku ahe, ambumbudo gbiati riahe tipa kaa tumo nani fu agu atita naima kpiko, na mi adu na gu maabangirise nga mi nika gbia dungu amaku kumbatayo. Wa mi avura kaa manga gi weneapai re na kini mangi agu apai nga ga pambori tipa dungu agarã, kere kaza azi kumbami. Na wire naawirikapai gii ngbii yo garãri adu 20 akpi.”

ANGA KINA MANGA WENEAPAI FU KURA ABORO SA SI AIDAHA TE

Manga weneapai fu aboro na kina nyanyakipaha, ono anga pa manga agi apai re rengbe ka sa boro ni gbia wene raka kumbatayo te. Tipagine duhe ti ni wo? Mo bingo gupai Ziazia Kekeapai agumbaha furani.

ANGA ABORO DUNDUKO NASIA KAA MANGA GUPAI DU NI WENEHE TE

“Ono boro ingapai sa nagbarasa dungu weneapai.”—BATUNGUSIPAI 9:18.

Ka mo vura asada nyanyaki kadu ni wene sino boro, mo ima rengba ka gbiatiro na kerepai mbiko gu gbangbati nga ga kura aboro. Ni kpiapai, ti regbo riri kaza mo ima rengba kaa pekafuo ga irangbii rugapai tipa bandatise ti kodatise na kura aboro. Ono na ka kura aboro aidanga ka pekafuoho ya? Gayo mangapai ima rengba ka maa gu padu wenengai nga ga agu aboro naasada ka manga gupai du ni ruruhe.

ABORO IMA RENGBA KA MANGAPAI SANGBANAHA KI KURU NI WENEHE WATADU NI GBEGBERẼHE

“Pai ho du ni ruru he bangiri boro, ono digida ha nga agu apai nga kina ga kpio.”—ASANZA 14:12.

Badungu aboro aima manga gupai i aberẽhe nga rurupai du nangiaha, ono i kini ye ka rugatiyo na gupai kusa nga i aima manga ingahe. Ka si vura dunga i aberẽ gupai nga gupai i aamangaha aruaru, i kindi rengbe na gbiatiyo na asangbana gayo gbegberẽ diaberã.

KA BORO ININGO GUPAI NIKA MANGA KUMBATAYO FU NI TE

“Oni aina nga gu pai nikamanga gba te.”—YAKOBA 4:14.

Ka boro vura du nga bawene sino boro, kpio ima rengba ka gbia ni ti ai regbo. Ni kpiapai, ti regbo gi ririkaza nga Korona re, dungu boro kpiki nga aguyo naasada ka undo kura aboro. Watadu mo bingo gupai naadu tipa dee du rimori nga Liting, naraka China yo nga gu ri bavungu ri akpi mbiko béno. Ri aya: “Mi aaruganga tire na ndu gupai wene sino boro wa buba were akpi ti ni te. Ko anaamangasunge nyanyaki, kidu ni boro umbasitise na kini gumba rengo. Kina ko sa rogo gu tarambiri re nakpi.”

Ka si du nga padu boro na wene asino na kini mangi wenepai fu kura aboro arengbenga ka sa boro ni gbia wene raka kumbatayo te, ginipai tie rengbe ka sa boro ni gbia wene raka kumbatayo? Tipa ka karagapai kuti gi sanahe re, ani naida na guhe rengbe ani kadu na kido kuti ni nga gu rengbe ka karagapai kuti gaani asanahe na ki yugu gu gene furani rengbe ani ka gbia wene raka ngbaha kumbatayo. Wari gu rengbe ani ka gbia gu he re ni?