Bawenepai Amangi Mbiko Mongo ti Ngbase!

PARANGA adee ue aandu rogo agu aba babagaahe du rogo gu gbata nga Baguio, Philippines yo. I abi ũtura awaraga nga gu i naamanga dezirepai gbaiga na ni, ono i aandunga kupati ni yo te. Wirina du rimori nga Helen naaru pati gu ũtura awaraga re amomu ti ngbari fuyo. Agu adee re aandu kina gayo nduge zanga i ru, ono ga Helen mongo ti ngbase aima ngba tiyo.

Kusa, ho agu adee re aaga ni ku kpuyo yo rogo tarambiri, i abi Bambu Kindo na bakiki kekepai ti ni nga ga jw.org. Nibasa, i atingidi gupai nga kina gu bangisa kekepai re i nibihe mbata ti ũtura awaraga. I dunduko ue azoro tarambiri yo ki ndu ka bi agu aregbo adunguratise ni bakiakia amanga ti ni nga gu i akehe ti ngbadimo Bambu Kindo.

Agu adee ue re aye tipa dunguratise. Kina ngbayo nazere ka bi Helen ho i arimi ni ku Bambu Kindo yo! I aima ino ri ni ipo nga ri du naadu na bawene mongo ti ngbari. Helen aya, “Ho i aye ni fuo re, mi aima gunde. Na mi ki berẽ gupai nga isoke mi ima manga gbegberẽpai.” Ono agu adee re ape gupai fu Helen namangi.

Gu dunguratise namangi gbiati kodatise nga ga awirina aima ngba ti agu adee re; i aima du na ngbarago ka kodatiyo na awirina. Ho i abi kura aboro ni i nigirisi rago, i asanahe singia ka i undo. Gu kura ri sa arakanga berewe Philippines yo te. Ono gu kura ri aima tona nduge tipa adunguratise na ri ki ima tona wirika Ziazia Kekeapai—agi apai re dunduko amangi mbiko mongo ti ngbase!