Asanahe Be Agedihe

Ginipai gu mokedi nangia Pauro aaida ka gumbaha ho ko aya ni wẽ: “Mi akpi fu rugute mbiko rugute”?—Gara. 2:19.

Pauro akepai ki ya: “Mi akpi fu rugute mbiko rugute, mi du ni ungare fu Mbori.”—Gara. 2:19.

Gupai Pauro akepai tipaha re adu na ngbanya dagbaha na gu memepai ko afura tipaha fu agu adungurati naadu rogo gu ga aRomo rago nangia Garatia. Aziree abayugupai atona du na maapai kurii kura aKristano. Ngbatunga agu akumba re aayugo gupai nga tipa boro gbia bata, si naida ni pekefuo ga Moize aNdiko, gbe gu naabipa yeratise. Ono Pauro aima ino gupai nga, Mbori aaidanga gupai berewe be aidipase nga i naamanga yeratise te. Ko asakipai na yo ziazia na ki yugu gupai nga agu ayugopai re angia ziree, na ko ki nyakasi gu idapase nga ga awirinako kuti motumo tumorii nga ga Yesu Kristo.—Gara. 2:4; 5:2.

Ziazia Kekeapai nagumba gupai agumba ziazia nga, bara sa kindi boro nakpi, ni ainongo pai te watadu agu apai namanga pati ni na maapai kurii ni te. (Batu. 9:5) Ho Pauro aya ni wẽ: “Mi akpi . . . mbiko rugute,” gupai ko aagumbaha nga, ga Moize aNdiko aadunga berewe na maapai kurii gako raka te. Kuba gure, Pauro aima du na kido nga mbiko gako idapase kuti motumo tumorii, ko aima ‘du ni ungako fu Mbori.’

Gi ariapai naadu tipa Pauro re adu “mbiko rugute.” Waigu si adu wo? Ngbutuko mbata fu ko gumba gupai re, ko aima saka gupai nga “i sapu ngbanga fu rani mbiko ida pa Kristo, mbiko manga rugute te.” (Gara. 2:16) Nirengo, bakere nyanyakipa pai kinaho gbe rugute adigisihe. Pauro asaki gupai fu aGaratio nga: “I amoi he ku ri he mbiko yugo ingaapai, da kina ho gu ngbatunga ka ye ni i akido pa ko.” (Gara. 3:19) Nirengo, Ndiko aima yugo gupai ziazia nga, kpakpa aboro du na ingaapai tiyo arengbanga ka mangapai kuti Ndiko ngba rengberengbe gene te, na i naida na yangara rengberengbe motumo. Sidu, Ndiko aundo aboro i rugutiyo na gupai nga, Yesu du nangia “ngbatunga.” Mbori ima rengba ka sapangbanga fu boro niruru he mbiko maa ni idapase kuti Yesu Kristo. (Gara. 3:24) Pauro ada kuti gu digisopai re mbiko vurube Rugute, ko aima ye ki idi kuti Yesu na ki moi idapase kutiko. Sidu, Pauro “akpi fu rugute” na ko kidu ni ‘ungako fu Mbori.’ Rugute aadunga berewe na ome kuriko te, ono Mbori naadu na ome kuriko.

Pauro ape kina ngbatungapai wa gure rogo gu waraga yo ko akehe fu aRomo, ko aya, “Awirinami, oni akpi ti rugute rogo boro Kristo yo . . . Ani kuru be rugute, ani nakpiki ti gu pai nazadi rani.” (Rom. 7:4, 6) Gi veresi re gbiati AGaratio 2:19, nayugo gupai nga Pauro aafuranga tipa pa kpi boro ni gu boro ingaapai i naima sapangbanga ni tii Rugute te. Kuba gure, ko aafura tipa padu boro na ranirii. Rugute aadunga berewe na maapai kuriko gbiati kura aboro naadu wa ko te. I aima gbia ranirii mbiko maa yo idapase kuti ga Kristo motumo tumorii.