Ka Oni Kotosinga “gu Toni Agude” Re Ya

1. Ginipai Yekova namangihe furani wa du ani dunduko ni basasa?

YEKOVA ima gberani wa du ani dunduko ni basasa koyo du ko ni. (Yo. 6:44) Mo berẽnga pa gupai gipai re ayugoho. Wa Yekova aawisigo agu abirioni aboro dunduko du rogo gi zegino re sirisiri, ko abi wenepai ku rogo ro yo, nga gu wene kpotoseyo rengbe ka sonosa nyemuse tipa ko. (1 Peka 28:9) Yekova ima ino ro, ki ima rugatiko na mo, na ki ima kpinyemu ro. Nairiwo wai du gupai re ni gupai nafu kido!

2. Waigu Yesu aundo rani ani rugu tirani na bakio wai Yekova aberãpa rani nibasasa dunduko?

² Yekova naberãpa ro aberã gbe, na ko naberãpa agu awirinamo aberã dunduko a nga aKristano. Tipa gupai nga ani rugu tirani na gipai re, Yesu aringbisi Yekova kuti babanda akandoro. Ginipai rengbe babanda akandoro ka mangaha ka kandoro sa ingi dagba akandoro yo 100? Ni ‘nahe agu ra du 99, ki ndu ku dagba abaagangara yo, ka gbata gu ru ingi.’ Ho babanda akandoro agbia gu kandoro re ni, ni adunga na zinga na u te. Ni nangi angi. Ginipai gipai re ayugoho furani? Ai kandoro du na nyanyakipa ru fu Yekova. Yesu aya: ‘Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.’—Mt. 18:12-14.

3. Gini apai ani nika sakapai tipaha rogo gi kekeapai re?

³ Nirengo, si aidanga ani du ni mburu gberãrago fu awirinarani te. Waigu rengbe ani ka ne gupai nga ga kotosa kura aboro? Na ginipai rengbe ani ka mangaha ka boro imisi rani? Ani nika karagapai kuti agu asanahe re rogo gi kekeapai re. Ono mbata, ani wirikinga pai gbe tipa “gu toni agude” i nafura tipa yo rogo Matayo kapita 18.

ADA DU NGA “GU TONI AGUDE” RE?

4. Ada du nga “gu toni agude” re?

⁴ “Gu toni agude” re nga ga Yesu abawiriki dunduko, singia paranga yo watadu sosono yo. Ka i vura du na kina gini garã, i “wa kina toni agude” rogo gu gene yo nga i na nyemu gupai nga Yesu yugupai fuyo. (Mt. 18:3) Wa vura duhe nga i naye rogo agu arago gbiati sino mangaapai du ni bakiakia, na kidu na agu abipai gbiati asino du ni bakiakia, i dunduko du na idapase kuti Kristo. Na Kristo ima kpinyemuyo bakere gbe.—Mt. 18:6; Yo. 1:12.

5. Waigu du Yekova ho boro akotosa watadu aimisa boro ni sa dagba Gako aboro yo?

⁵ “Gu toni agude” re dunduko na nyanyakipa yo fu Yekova. Tipa ka rugatirani na pa wai ko abiyo, oni berẽnga pa wai ani naabi agude. Ani ninaabi yo na nyanyakipa yo. Ani ninaaida ka banda yo bambiko gupai nga i ni nyanyaki yo, na bakere inohe, watadu na tatamana wa kuru aboro te. Ani ninaakpingo nyemu gupai nga ka bi boro ni nirungosi kura boro te, ono ho ani abi boro ni ni nirungosi gude, ani nadu na bakere zinga kisusi. Wakina gure a, Yekova naida ka banda rani. Ko na gberãrago, zavura na zinga ho boro akotosa watadu aimisa boro sa ni dagba Gako aboro yo!—Yes. 63:9; Mk. 9:42.

6. Ringbisihe kuti 1 AKorindo 1:26-29, wai du zegino abi ga Yesu abawiriki?

⁶ Gini kura gene du ga Yekova abawiriki ngbaha wakina “toni agude”? Sidu, ada du zegino abiyo nga i du na nyanyakipa yo? Kumukokumuko aboro, abaworimo, gbiati agu aboro du na ome beyo. Ono ga Yesu abawiriki wa gure te. Sidu, agu aboro du rogo zegino nabiyo wa gu “toni agude” adunga na nyanyakipa yo ya. (Oni gedi 1 AKorindo 1:26-29.) Ono Yekova abingo yo wa gure te.

7. Waigu Yekova aida ani naabi awirinarani?

⁷ Yekova ima kpinyemu gako amoyambu dunduko, singia i ima irisiko tipa dungu agarã watadu i ni vovo yo ku rogo rengo yo. Awirinarani ima du na nyanyakipa yo fu Yekova, sidu, si naida i du na nyanyakipa yo furani a. Si naida ani ‘kpí nyemu awirina dunduko,’ angianga kina beteyo gbua ya. (1 Pet. 2:17) Si naida ani du na nyemu ka manga ai gupai rengbe ani ka mangaha ka banda yo na ka ngerafuo yo. Ka ani bi gupai nga ani imisi boro watadu ani ba gberãrago ti boro, si aidanga ani mangipai wa ka i ya pai ho mangi te te, na si aidanga ani berẽ gupai nga gu boro re du si aida ni mbupai furani na bangirini ki go ti gupai re te. Tipagine rengbe kura aboro kadu ti ni na gberãrago? Kura awirina kinaho nabi tiyo nga payo ima du kusende gbe, isoke mbiko gu gene i asono ngbaha. Kura aguyo kinaho du ni vovo yo rogo rengo yo, sidu, i ata inongo wai ka mangapai na gu zangarengba nga ga kura aboro te. Ka si vura du nga kina ginipai du, si naida ani mangi gupai rengbe ani ka mangaha tipa ka mbakada apai. Berewe a, gu boro rago agberã ti ni dedede ho aboro amanga ni ni na pai, si naida ni rugu tini na gupai nga, gi sino re angbanga te, na si naida ni mangi pai amanga tipa ka diabehe. Mangaha wo nika sa gupai nga ni du na ngbarago na kidu na wene pagume dagbani na awirinani.

MO NAABI KURA ABORO NGA I NYAKIPA YO KISUSI RO

8. Gini bipai aboro adu na ni ti rago Yesu nga gu naadu na maapai kurii gako abawiriki?

⁸ Ginipai nasa Yesu ko fura tipa “gu toni agude” re? Gako abawiriki asana ko na sanahe nga: “Da nga bakere ni susi tie rogo gu ngbi nga ga ngbangbaturũ?” (Mt. 18:1) Badungu aYudo ti gu regbo re anaaida gupai nga aboro naabi yo nga i na nyanyakipa yo. Kura wene bawirikipai sa aya: “Nyemu gbia taarimo be aboro gbiati worimo nangia gupai paha anyaki gbe kisusi fuyo rogo gayo raka yo.”

9. Ginipai si aaida ga Yesu abawiriki mangihe?

⁹ Yesu aima ino gupai nga, badungu aYudo naasada ka kiisopa tiyo kisusi gu kura aboro, na mbiko gipai re, si aaida gako abawiriki mangi nyanyaki asadatise tipa ka aria gu gene i aaberã ngbaha. Ko aya fuyo: “Gu ni du ni bahe dagba roni, ni ka du wa kina tame; gu ni du ni gbia, ni ka du wa gu ni namanga pa aboro.” (Rk. 22:26) Ani namangapai wa “tame” ho ani “aberã gupai ni nga akuarani kiipayo” tirani. (Frp. 2:3, NW) Ka ani asonosa gi bipai re ni bakerehe, si nawira gupai nga ani adunga ni agu aboro nakotosa aboro gbe te.

10. Gini ga Pauro rugute si aida ani mangipai kutini?

¹⁰ Awirinarani dunduko nyakipa yo kisusi rani rogo kura agene yo. Si taata ka rugatise na gipai re ho ani agbeberã rani ni kuti gayo wene asino. Si naida ani moi gu rugute ku berãrani yo gu mokedi nangia Pauro afuhe fu aKorindo, nga gu naya: “Da nasa roni oni du akia? Gini he du be ro Mbori afu nga ha foro ya? Ono si ngia i afu he foro, tipagine mo asambua he ti ni, wa ka mo adi he tigamo?” (1 Kor. 4:7) Si naida ani du na rubangirise ka zanga gbeberã aboro kuti rani, watadu ka zanga berã gupai nga parani nyaki kisusi ga kura aboro. Ni kpiapai, agu awirina nga akumba du na tandu manga wene agumbapai watadu agu awirina nga adee du na tandu tona wisigo Ziazia Kekeapai na badungu aboro, si naida i naafu taarimo ti aregbo dunduko fu kina Yekova tipa gupai du yo na rengba ka mangaha.

ONI NAAMBUPAI “KPOTORONI YO”

11. Ginipai Yesu ayuguhe furani na gu kpiapai du tipa bakindo na gako moyambu?

¹¹ Tingbafuo Yesu za apefuoko nga ka i kotosinga kura aboro ya, ko agumbapa kpiapai nibipa bakindo na gako moyambu. Gu bakindo re ambupa bakere bape nga gu gu moyambu re aarengbanga ka tumoho ya. Kusa, kina gu bangisa moyambu re aadunga na nyemu ka mbupa bape nga gu naadu ni wiri umbaha gbe fu kurako moyambu te. Niyangaraha, bakindo aba gu moyambu naadunga na inapai tiko re ya ku bambukiso yo. Ginipai ani awirikaha? Yesu aya: “Buba du ngbangbaturũ yo ko amanga kina wo fu roni a, ka oni ahe nga pai kpotoroni yo fu awirinaroni ya.”—Mt. 18:21-35.

12. Waigu rengbe ani ka imisa kura aboro ka ani ká ka mbupai?

¹² Ga gu moyambu re mangaapai aayengo na kpakarapai kina kutiko sa te, ono kuti kura aboro a. Ni bambatapai, ko azanga du na nyemuse gbiati inapai ni ba ko “[kurako moyambu] ku bambukisa yo, da ho ni ka tumo gu bape ni re.” Uepai nga, ko aimisi gu kura amoyambu nga aguyo nabi gupai ko amangihe re. Ho ‘akurako amoyambu abi gi pai ni re, i ki nirungo arungo gbe.’ Wakina gure a, gaani mangaapai gu duadu na sangbanaha kurii kura aboro. Ka boro mangi rani na gbegberẽpai ani kini ká ka mbupai funi, ginipai rengbe ka manga? Bambatapai nga, ani naimisa ni ni ká ani ka mbupai funi, ka gbeberã rani kuti ni, na ka yugo nyemuse funi. Uepai nga, ani nasa agu aboro du rogo dungurati ka i dunga wenengai ya ho i abi gupai ni nga zereda dagbarani na gu boro re te.

13. Ginipai mo awirikaha ti gu pangbanga du tipa kura nazakigene sa?

¹³ Ho ani ambupai ni fu awirinarani, ani nagbia undo agbia gbiati gu kura aboro a. Gure nga gupai naadu tipa kura wirina sa ni nazakigene nga guri ani nika yamba ri nga Crystal. Kura wirina sa ni dee rogo dungurati aimisi ri. Crystal aya: “Gari afugo ti kura aregbo anidu ni kerehe gbe si kidu wa ka i ya ri ogore wakina sape. Zavura mi anaaidanga ka kura na ri gene tungusapai yo te. Mi atona kaa zanga gu kakaka nyemuse mi adu na ni tipa tungusapai gbiati gimi ngbarago.” Crystal aabihe nga wene ndupai adu kina beri kadu na gberãrago. Ono tie, ri aanyenga na zinga na gu wirina re watadu ka gbeberã ri kina kuti tiri na agu apai naamanga ri te. Ri amangipai ni umbasitise, ki mangipai kuti gu rugute nga ga Ziazia Kekeapai du rogo gu kekeapai nga, “Oni Mbupai Na Ngbaduroniyo Dunduko” rogo gu Ngbaõbambu Sinziri nangia ga Ngbangba 1, 1999. Ri aima mbupai fu wirinari. Crystal aya: “Mi ima rugatire na gupai awere nga ani dunduko namanga asadatise nyanyaki ka manga aˈariapai, na Yekova regerege kaa mbupai furani na aˈuru dũ. Berãre awere ni zezeredihe gbe. Mi ima gbia gimi ngbarago kubaha.”

14. Ringbisihe kuti Matayo 18:21, 22, gini kpakarapai si awira gupai nga gu mokedi nangia Petero adu na ni, na ginipai mo awirikaha ti ga Yesu karagapai?

¹⁴ Ani ima ino gupai nga si naida ani naambupai ambu fu aboro; si nga gupai du ni ruruhe ka mangaha. Ono gipai re ima rengba kadu ni mbumbuhe kindi furani ka mangaha. Si ima rengba kadu nga gipai re aduadu tipa gu mokedi nangia Petero ti kura aregbo. (Oni gedi Matayo 18:21, 22.) Ginipai rengbe ka undo? Bambatapai nga, mo berẽkurii bakio wai Yekova nambupai foro. (Mt. 18:32, 33) Ani arẽnga na gako mbupai te, ono ko nambupai furani gbua. (Tam. 103:8-10) Ti kina gu bangisa regbo re, ‘nyemu akuarani duwa ka si du tirani a.’ Sidu, mbupai ni gupai rengbe ani ka sia singia ani naida ka yugoho watadu ani aidanga ka yugoho te te. Si rẽarẽ ani mbupai fu awirinarani. (1 Yo. 4:11) Uepai nga, mo berẽkuriipa gupai namanga ho ani ambupai ni. Ho ani ambupai ni, ani ima rengba ka undo gu boro mangi rani gbegberẽ, ki sa dungurati si du na kodatise, ki banda gaani pabakure na Yekova, na ani kidu wenengai a. (2 Kor. 2:7; Koro. 3:14) Niyangaraha, mo mangi kparakpee fu gu Boro naya furani ani mbupai. Ka mo mbunga Satana ko gberesipa gu zereda du dagbaro na agu akuaro mo airisombori na yo ya. (Ef. 4:26, 27) Ka ani aida gupai nga zereda du rogo dungurati, si naida aida na gu undo nga ga Yekova.

KA MO MBUNGA TIRO TIPA I KOTOSI RO YA

15. Ringbisihe kuti AKorosaio 3:13, ginipai rengbe ani ka mangaha ka si du nga mangaapai nga ga wirina naba gberãrago tirani?

¹⁵ Ono tie, na ka si du nga kuaro idipase mangipai ngba gu gene nafu bakere gberãrago foro? Ginipai si aida mo mangihe? Mo mangi ai gupai rengbe mo ka mangaha tipa ka banda zereda. Mo mangi kakaka kparakpee fu Yekova. Mo sanako tipa ko undo gu boro ba gberãrago tiro re na ki undo ro mo bi gu wene asino du ti gu boro re, nga agu asino Yekova nakpinyemu ni mbikoho. (Rk. 6:28) Ka si du nga ka bangiro gonga ti gupai wirinamo namangihe te, mo berẽpa gu gene ngba kisusi rengbe mo ka fura na ni ngbaha. Si ni wenepai ti aregbo dunduko ka berã gupai nga, anga wirinamo niidi aida ka imisa ro te. (Mt. 5:23, 24; 1 Kor. 13:7) Ho mo afura ni na ni, mo bihe nga, ni nimangi gupai re na wene nduapai. Na ka si du nga ni aidanga ka manga zereda te? Mo ‘naahipai’ funi kindi. Ka omero batingo be wirinamo ya. (Oni gedi AKorosaio 3:13.) Gu nyakipaha gbe nga, ka mo nyenga na zinga na ni ya, bambiko gupai re ima rengba ka gberesapa gamo pagume na Yekova. Ka mo mbunga ai pai si kotosi ro ya. Ni manga mo ho wo, mo nayugo gupai nga mo ima kpinyemu Yekova kisusi ai kurapai.—Tam. 119:165.

16. Ginipai si aida ani dunduko nibasasa mangihe?

¹⁶ Ani na tambuahe nga ani ima du na rengba kaa iriso Yekova na awirinarani wa ‘rimbasa akandoro sa’ tiibe ‘babanda akandoro sa’! (Yo. 10:16) Gu buku nga Mbakadatise Ka Manga Gupai Yekova Akpinyemuhe, kpewaraga 165, naya: “Wa duhe nga mo nagbia undo ti gu kodatise re, si naida mo mangi ome amanga tipa ka bandaha.” Sidu, si naida ani “mangi ome tipa ka bi awirinarani wai Yekova abiyo.” Ani dunduko ni gu “rukutu agude” du na nyanyakipa yo fu Yekova. Ya mo kinawo mo abi awirinamo? Yekova ima inopa agu apai dunduko mo amangaha tipa ka undo yo na tipa ka ngerafuo yo, na ko nabihe na nyanyakipaha.—Mt. 10:42.

17. Ginipai ani nadiberã ka mangaha?

¹⁷ Ani ima kpinyemu agu akuarani ani airisombori na yo. Sidu, ani ima diaberã ka zanga ‘maa ũkota gene wirinarani, na ũtigo.’ (Rom. 14:13) Ani nabi awirinarani nga i nyaki payo kisusi rani, na ani naida ka mbupai fuyo kpotoraniyo. Ka ani mbunga tirani kura aboro kotosi rani ya. Kuba gure, ani sia ka pekafuo ‘agu apai namanga sa zereda, na agu apai ka ani sonosi akuarani na ni.’—Rom. 14:19.