Tipagine Sogote Namoipai ti Ni?
Tipagine sogote namoipai ti ni rogo zegino gbe? Tipa ka ino nduhe, si naida ani ini guhe nga sogote, gu ndupai aboro atona sogote ti ni, na wai si agbandaka.
Ginihe Nga Sogote?
Sogote nga kere gbegberẽ soga boro watadu gbegberẽ mangapai koyo du kura boro ni watadu gu kura riko nga ga kura aboro. Si nga gu gbegberẽ bipai du boro nani koyo du kura boro ni tipa gbanga regbo.
GINIPAI NASA ABORO I TONA SOGA KURA BORO
Dungu ndu apai duho nasa kura boro i tona soga kura aboro. Aboro ninaasoga akurayo dedede angianga mbiko gupai mangi yo ho ya ono mbiko gu ngbatunga aboro nga yo. Aboro ima rengba kaa bi agu aboro i asoga yo ni gbegberẽ aboro watadu nga agu aboro ka danga ni wene aboro berewe ya. I ima rengba kaa biyo ni agu aboro du payo kusende, agu aboro rengbe ka ye na pai kuti boro watadu agu aboro naye na dungu kpakarapai. Si ima rengba kadu nga agu aboro du na sogote rogoyo yo kuti kura aboro, aima gbia tiyo na zuu, iraira sarangbanga watadu gu kura pai namangi nga gu nasa gupai nga sogote moipai rogo yo yo.
WAI SOGOTE AGBANDAKA
Boro ima rengba ka soga gu boro ni abingo ni mbata ya. Ni kpiapai, boro ima rengbe kadu na iraira bipai tipa gu kura ngbatunga aboro mbiko wai gani aborokporo abi ngbatunga agu aboro re. Sidu, ka si dunga boro nasoga gu kura ngbatunga aboro, agu aboro du fuo ni watadu du rogo gani badona ima rengba ka tona du na kina gu bangisa bipai re a.
Pa ino ani wai sogote agbandaka naundo rani ani rugutirani na ndu gupai sogote na moipai ti ni. Ono tie, tipa ka ino gupai sogote na moipai ti ni gbe rogo zegino, si naida ani iningo wai nzunzu sogote atona. Ani ima rengba ka inoho vuru Baibiri yo.
BAIBIRI NAYUGO MBURU SOGOTE
GBEGBERẼ SOGOTE AAINGANGA TI WIRI ABORO TE. Si atona ho gu maraika i ye ka yamba ko nga Satana Bakitingbanga asamungu ni ngbangbaturũ yo kuti Mbori. Bakitingbanga adu ni “baimiaboro” ho ko asamungu ni. Bambiko wa du ko ni “irazire . . . nga baha,” ko naandu kindi kumbatayo kaa sa sogote na zinga si naandu kina kumbatayo. (Yoane 8:44; 1 Yoane 3:11, 12) Baibiri nasakapai tipa ko ni boro ziree, kidu na bakere zinga gbiati bakere imisiri ngbaduse.—Eyobo 2:7; Yugoti 12:9, 12, 17.
SI TAATA FU KPAKPA ABORO TIPA I SOGO KURA BORO. Gu bambata kumba nangia Adamu, apekefuo ga Satana gbegberẽ mangaapai. Ni sangbanaha, wiri aboro dunduko adi ingapai na zangarengba. (ARomo 5:12) Bambata wiri Adamu nangia Kaina asogo wirinako nangia Ebere na ki imi ko. (1 Yoane 3:12) Si ni rengo nga, dungu aboro nayugo nyemuse na nunga. Ono mbiko gu ingapai ani adihe, badungu aboro nakpi kina nyemu tiyo, du ni aira kpihe na ni airarukö—nga agu asino nasa aboro i naasoga akurayo.—2 Timoteo 3:1-5.
SI TAATA FU GU BORO AIDANGA GU BORO DU WA NI YA TIPA NI DU NA SOGOTE. Gu zegino du ani rogoyo nasa gupai nga sogote naandu kina kumbatayo ni sonosayo gbegberẽ bipai na mangapai. Agu apai du wa rukö, kparakaro, afugo sengahe, zubo kura aboro, gbiati gbarasapa ahe namanga mbiko “zegino dunduko du ni zogozogo ho be gbegberẽ ko,” nga Satana Bakitingbanga.—1 Yoane 5:19.
Ono tie, Baibiri ayugongo kina ndu gupai du sogote ti ni te. Si nayugo gupai a nga ziga.