Asanahe Be Agedihe
Ginipai Baibiri apehe tipa manga zungahe?
Zungahe nga “nyanyakipa pai, si nga nyanyaki afugo watadu kidohe tipa ka mangapai, dedede, i naamanga zungahe ni peyo pa Mbori . . . ni dezire.” Boro ima rengba ka manga zungahe nipe ni he rogo afugoyo watadu ka kehe sande.
Kura aboro ima rengba ka berã gupai nga, gbegberẽpai du nga ka manga zungahe mbiko Yesu aya: “Ka mo [mangingo zungahe] wa sa ya . . . fugoroni du ni kina, ‘Ii, ii,’ na ‘Oó, oó,’ gu ka susi gere kina gbegberẽ he nga ha.” (Mt. 5:33-37) Ni rengo, Yesu aima ino gupai nga ga Moize aNdiko anaaida gupai aida nga aYisaraere naamanga zungahe rogo kura abangiriba, na gu ga Mbori ruru amoyambu re aima manga zungahe. (Bam. P. 14:22, 23; Gate 22:10, 11) Ko aima ino gupai a nga Yekova nitiko aima manga azungahe. (Eb. 6:13-17) Sidu, anga gupai Yesu aaida ka pehe nga si aidanga ani mangi zungahe te te. Kuba gure, ko afu zahe fu aboro tipa zanga manga azungahe tipa agu apai anyakanga paha ya watadu agu apai arẽnga na zungahe ya. Si naida ani naamanga agu apai ti aregbo dunduko nga gu ani akidohe ka mangaha, mbiko si du nga gupai Yekova aida ani mangihe.
Ginipai tie rengbe mo ka mangaha ka i sanaro mo mangi zungahe? Bambatapai nga, mo bihe nga mo nika manga gupai amanga mo nazungahe tipa ka mangaha. Ka mo bihe nga mo amanganga ha te, si adu ni wenepai ka mo aamanganga zungahe ya. Fugo Mbori nafu gu zahe nga: “Gu pai ngba ka mo kído nga he ya ti pa kido he ka mo afu nga ha ya.” (Batu. 5:5) Fuo gure, mo wisigi agu abangua rengo nga ga Baibiri nga gu nabipa gupai i nasana ro mo mangi kidohe tipa ha na mo ki mangi diaberã ringbisihe kuti gu sangbakpotoroyo mo narabaha. Gini kura abangua rengo nga ga Baibiri?
Gu kura amozunga kinaho atagbaganga tihe na gupai Mbori akpinyemuhe ya. Ni kpiapai, aDezire Yekova ni naamanga akidohe amanga ho i amanga rogatise ni. Agi akidohe re nga ngbatunga mozunga. Barangba Mbori na adezire, nadikumba na badidee nakidohe nga i nikaa kpinyemu tiyo, kini bi tiyo na nyanyakipayo, na kini irisi tiyo dagbatiyo na i nikaa manga agi apai re “a wa [i] kadu kindi niunga [yo].” (Gu kura arogotise ima rengba ka zanga pe kina boro gi ndikidi afugo re, ono wa vura duhe wo, i namanga kidohe amanga barangba Mbori.) Fuo gure, i naada ni kumba na diako na si naaida gayo rogatise nye anye kindi. (Bam. P. 2:24; 1 Kor. 7:39) Gi ngbatunga mokido nga ga rogatise re rẽarẽ mbiko si ringbisihe kuti gupai Mbori akpinyemuhe.
Gu kura amozunga natagbagatihe na gupai Mbori akpinyemuhe. Ni kpiapai, ndikidi aKristano amanganga mozunga tipa ka dia aũvura tipa ka banda ringara watadu ka mbu gayo idapase kuti Mbori te. Mangaha wo ima rengba ka zanga du kuti ga Mbori arugute. Si aidanga aKristano “du ni aboro zegino” te, sidu, ani akodanga tirani ku rogo agu atagbagapai yo nga ga vura te.—Yo. 15:19; Yes. 2:4; Yak. 1:27.
Gu kura amozunga nabipa sangbakpotoseyo. Ti kura aregbo, si naida ani berẽ dudunguro tipa gu ga Yesu rugute nga, “agu ahe nga ga Kaisara oni fú kina ha fu Kaisara, agu ahe nga ga Mbori oni fú kina ha fu Mbori.”—Rk. 20:25.
Ni kpiapai na ka si dunga Kristano sanahe tipa ka raka rogo ringara watadu tipa ka gbia pasipoti na ni kini ye ka ino gupai nga si naida ni mangi kina mozunga mbata nga ni nika nye niruru ni fu gu ringara re. Ka si du nga rogo gu ringara re ngbatunga gu mozunga re nayugopa mangapai angianga kuti ga Mbori andiko ya, gu sangbakpoto ni yo ni narabaha kuti Ziazia Kekeapai ambunga ni ni mangi gu zungahe re te. Ono tie, airangbii ima rengba ka mbu ni ni mangi ariapai ti afugo gu mozunga re tipa wa ka sangbakpoto ni yo mbu ni ni mangihe.
Manga gu zungahe i niima aria afugoho tipa ka nye ni ruruse fu ringara ima rengba kadu ringbisihe kuti gu rugute du rogo ARomo 13:1, nga gu naya: “Aboro rá ara dũ fu abaira tandu.” Sidu, Kristano ima rengba ka diaberã nga gbegberẽpai ho ti manga zungahe tipa ka manga gupai Mbori naima ya ani mangihe te.
Si ni nyanyakipa pai a mo degeturo kuti gu sangbakpotoroyo mo narabaha kuti Baibiri ka i sanaro mo mangisunge na he watadu ka yaka bero ho mo amanga zungahe ni. Agu aRomo naadu mbata na agu aboro afugo yo adu kiakia anaamanga zungahe nimangayo sunge na gayo aũvura, nayugo gupai nga i aamangasunge na gayo aũvura nga gu naarukuba gu mbori nga ga vura tipa si yugupa ga boro kido. AGiriki anaatumba beyo kuari ho i anaamanga mozunga ni. Ngba gi gene re, i anaayugo gupai nga ome kinaho du Mbori kugiihe nga gu nanaabi agu apai i apehe na kini mangihe, na aboro nika karagapai akaraga tipa gayo mangaapai fu gu ome re.
Ni rengo, ga Yekova moyambu arengbanga ka zungahe nimanga ni sunge na ai guhe nga ga ringara du na ngbanya dagbaha na ziree pambori te. Ono ginipai rengbe ka manga ka i sanaro bambu gumba ngbanga yo nga ga andiko mo moi bero rii Baibiri na ki zungahe nga gupai mo nika pehe nga kina boro rengo? Rogo gi bangiriba re, mo ima rengba ka diaberã ka mangaha wo mbiko Ziazia Kekeapai ima fura tipa gu ruru aboro namangi zungahe ni yaka yo abeyo. (Bam. P. 24:2, 3, 9; 47:29-31) Si ni nyanyakipa pai mo tingidi gupai nga, ka mo mangi ngbatunga gu zungahe re, gure nga mo nazungahe barabangiri Mbori nga mo nika pe kina rengo. Si naida mo mbakadi tiro ka gumba kina rengo kuti ai gu sanahe i nikaa sana ro na ni.
Mbiko gaani pagume na Yekova ni nyanyakihe, si naida ani mangi kparakpee na ki berẽ wenengai kuriipa ai gu mozunga i nasana rani ani mangihe, tipa ani du na gu kido nga si agbarasanga pa gaani sangbakpotoseyo na ki kuo agu abangua arengo nga ga Baibiri te. Ka si du nga mo diberã tipa ka manga zungahe, si naida mo banda gupai mo nadiberã tipa ka mangaha.—1 Pet. 2:12.