“Gu Yugopai Nga ga Weneringise” Fõ Ngbaduroni Yo

LISAa aya, “Gu weneringise nga ga awirina aima du na bakere maapai kurire. Ri aafura tipa gu bambatapai nagbe berãri tipa rengo. Kina gu bangisapai re naadu tipa Anne, nga gu ri naya, “Ti bambataha, gupai nagbe re sa rengo nga aDezire Yekova adu na weneringise angianga gupai i ayuguhe ya.” Agi awirina du ue re nagbia ngbarago agbia awere ti geda Ziazia Kekeapai na kini berẽkuriihe, ono gu sino nga weneringise aima du na bawene sangbanapai kuriyo.

Waigu rengbe ani ka yugo weneringise nga gu rengbe ka zio ngbadu agu aboro yo du pati rani? Ani sakingo pai tipa agene ue nga: gaani afugo na gaani mangaapai. Tifuo gure, ani nika sakapai tipa ada rengbe ani ka yugo weneringise fuyo.

SI NAIDA “GU YUGOPAI NGA GA WENERINGISE” NINAAKURA NGBARONI YO

I sakipai tipa gu dee tatamana du pari rogo Asanza kapita 31 nga “gu yugopai nga ga weneringise” nakura ngbariyo. (Snz. 31:26) Ri nambu gu “yugopai” re si du na maapai kurii gupai ri apehe na gu gene ri apehe ngbaha. Si naida “gu yugopai” re naakura akura a ngba abaagude yo. Badungu avunguagude ima ino gupai nga ka i apeka gbegberẽ afugo, si ima rengba kadu na gbegberẽ sangbanaha kuri awiriyo na si nawira wa awiriyo ima rengba ka zanga degatuyo kuti gupai i apehe. Ho avunguagude afura ni fu awiriyo rogo weneringise yo, si nika du taata fu awiriyo i degetuyo na ki gisangba.

Singia mo nga vungugude watadu mo nga vungugude te, waigu rengbe mo ka wirika ka fura ngba wene gene? Ani nabi berãpai rogo bambata papara Asanza 31:26 nga gu naya: ‘Ri naza ngbari na fugo tatamana.’ Si nakoda pa sia gaani afugo na woro fugorani rogo tatamana yo. Si adu nipa undo dedede ka ani sana tirani nga, ‘Ya mo gupai mi aida ka pehe re asa agu aboro nadegatuyo i zingi, watadu si nika ye na zereda?’ (Snz. 15:1) Nirengo, si nipa tatamana ka berã mbata fu ani fura.

Gu kura sanza sa naya: “Gu boro kina ho nagba sa fugo wa kina baso sa rũ he.” (Snz. 12:18) Ho ani aberãpa wai ni gaani afugo na woro fugorani narengbe ka sa aboro i du, si ima rengba ka fõngbaduraniyo ani du na zatise ti gupai ani aida ka pehe. Nirengo, pa manga ani pai kuti, “gu yugopai nga ga weneringise” nika undo rani ani du na zatise ti mangasunge na gbegberẽ afugo na ka woro fugorani adunga ngba gbegberẽ gene ya. (Ef. 4:31, 32) Ani nika mbu gbegberẽ aberã kusayo na kini fura rogo weneringise yo na ngba wene gene. Yekova amoi kpiapai nibi gipai re ho ko akido gu gako moyambu ni naagunde agunde nangia Eriya. Gu maraika narukuba Yekova afura rogo “wiri toni bayee fugo.” (1 Aba. 19:12) Ono tie, kadu na weneringise nakoda dungu apai akoda susi gu gbua nga ka fura ngba wene gene. Ani du wa ka ani mangipai a rogo weneringise yo. Waigu rengbe ani ka mangaha?

GU MANGAPAI NGA GA WENERINGISE NAFÕNGBADU KURA ABORO YO

Ani nawirika Yekova nigumba ani wene afugo na kini mangipai ngba wene gene. (Ef. 4:32; 5:1, 2) Lisa, i nifura tipa ri kusayo apepa gu weneringise aDezire Yekova ayuguhe furi. Ri aya, “Ho i ado gaani aborokporo ni tii bambu niipo, arogotise ue ambu gayo sunge tipa ka ye ka undo rani tipa ka mbakada bara ahe. Ti gu regbo re, mi aatonanga kandara wisigo Ziazia Kekeapai ho te!” Gu mangapai nga ga weneringise re afõngbadu Lisa yo tipa ri wisigi rengo berewe wenengai gbe.

Anne, i nigumba pari ti tonatona gi kekeapai re, aima du na tambuahe tipa gu weneringise aDezire Yekova ayuguhe furi. Ri aya: “Mbiko pa wai du zegino, mi adu adu na tiko. Si aima kpakara fere ka kido kuti aboro.” Ri andu kumbatayo ki ya: “Ho mi agbia aDezire Yekova ni, mi aakidongo kuti yo te. Mi aabaka bangire abaka nga, ‘Tipa gine i ayugo wenesino ti ni fere?’ Ono gu ndikidi weneringise nadu ti gu boro naawisigo Ziazia Kekeapai na mi asa re mi kido kuti ri.” Si aye na gini wene sangbanapai? Ri aya, “Kusa, mi atona ka maaberã re gbe kuti gupai mi aawirikaha.”

Oni ini gupai nga gu wene mangapai nga ga weneringise nga ga agu aboro du rogo dungurati du nazi ngbadu Lisa na Anne yo, na gupai re du naundo yo i du na nyemu ka wirika rengo. Gu weneringise dungurati ayuguhe fuyo aundo yo i tona kaa kido kuti Yekova na gako aboro.

ONI WIRIKI WAI KA YUGO GA MBORI WENERINGISE FU KURA ABORO

Kura aboro ima rengba kaa mangasunge na wene afugo na kini mamu bambiko wo du duhe rogo gayo sino ngbatunga. Si ni wenepai nga gupai nafõngbadu kura aboro yo i du zezeredi nga pa gayo asino ngbatunga na pa asino yo. Ono ka si du nga gupai nafõ ngbadurani yo nga pa gaani sino ngbatunga watadu asino rani tipa ani yugu weneringise, gure nga ani awirika nga ga Mbori weneringise te.​—Oni ringbisinga ha na Amokedi 28:2.

Ndikidi weneringise nga papara zuzu ga Mbori ziazia toro. (Gara. 5:22, 23) Sidu, tipa ka sonosa ndikidi weneringise, si naida ani mbu ga Mbori toro si du na maapai kurii gaani aberã na gaani mangaapai. Ho ani amangaha ni wo, ani nawirika aYekova na Yesu. Na wangia ani aKristano, ani gudu adu na nyemu ka undo kura aboro. Sidu, nyemuse nafõngbadurani yo tipa Yekova Mbori gbiati akuarani. Gaani weneringise naye kada ni gu nyanyakipa sino nga gu naye kina boro ngbadurani yo nga gu Mbori aida na ni.

ADA SI AIDA ANI YUGU WENERINGISE FUYO?

Si ima rengba kadu taata ka yugo weneringise fu agu aboro nayugu weneringise furani watadu agu aboro ani naini yo. (2 Sam. 2:6) Gene sa rengbe ani ka yugo weneringise ngbaha nga ka tambua yo. (Koro. 3:15) Ono na ka si du nga ani nabi gupai nga boro arẽnga i yugu weneringise funi te?

Oni makianga gipai re: Yekova moi bakere kpiapai kisusi nga ga yugo gu weneringise arẽnga aboro tipaha ya, na Fugoko nayugo nyanyakipa pai furani tipa yugo gi sino re. Gu fugo nga “mbiko undahe” watadu gu weneringise arẽnga aboro tipaha ya, i mangisunge na ni bara dunguhe rogo Vovo Ndiko yo. Waigu Mbori ayugo weneringise furani?

Oni berẽnga pa agu amirioni aboro Yekova aima digo niyugu weneringise fuyo nifu ko agu ahe fuyo si aidaha tipa i naaraka. (Mt. 5:45) Nirengo, zavura mbata fu ani ini Yekova, ko aima yugo gako weneringise furani. (Ef. 2:4, 5, 8) Ni kpiapai, ko afu guhe ngba kisusi nga bangisa Wiriko tipa aboro dunduko. Gu mokedi nangia Pauro akepai nga Yekova nafu motumo tumorii “ku sangba gu ũkumuko yo nga ga Mbori undahe.” (Ef. 1:7) Kurigure, wa vura duhe nga, ani naingapai na kini sa gberãrago ti Yekova, ko nandu kindi kumbatayo kaa nungusa rani na kini yugupai furani. Gako arugapai na afugo wakina “mikamika mai.” (Pa Rug. 32:2) Ni rengo, ani arengbanga ka tumo tipa gu wene mangaapai dunduko nga ga weneringise ko ayugoho furani te. Na ani ima ino gupai nga ka Yekova aayugongo gu weneringise furani ani arẽnga tipaha ya, ka ani dunga na maabangirise tipa kumbatayo te.​—Oni ringbisi ngaha na 1 Petero 1:13.

Zanga kapa, ga Yekova weneringise ima du ni wenehe na si nafõngbadurani yo ani yugu weneringise. Nisangbana gipai re, kuba gupai nga ani naasia agu aboro asia ani ayugo weneringise fuyo, si naida ani mangi ome ka wirika Yekova niyugo ani weneringise fu aboro naˈuru dunduko. (1 Tesa. 5:15) Ho ani ayugo weneringise ni ti aregbo dunduko, ani nadu wakina we nafaasa rago rogo zere. Ani nga pa wasa fu gaani aborokporo, akuarani airisimbori, gaani abadiasunge, akuarani sukuru yo, gbiati gaani amurakporo.

Mo berẽnga pa aboro rogo gamo ngbadimo kporo watadu rogo dungurati nga aguyo rengbe ka gbia undo mbiko gamo wene afugo na mangaapai. Boro ima rengba kadu rogo gamo dungurati nga gu ni naida na undo gbe, tipa ka ngerafuo kporo, ka girisoho watadu ka manga kura apai wa gu nga ka ngbeka ahe. Kurigure, ka mo gbia boro gene tungusapai yo nga gu ni naida na undo, ya mo mo rengbe ka fu undo funi rogo mangimangipai yo?

Ni wirika ani Yekova, gaani afugo na gaani mangaapai dunga adu ti aregbo dunduko ni gupai, “gu yugopai nga ga weneringise” nika du namaapai kuriihe.