Ga Mbori Kindo Nazogarago Azoga Awere!

1. Ginipai rengbe ani kadu na kido tipaha, na tipagine?

HO MO abi agu akpakarapai ni dunduko du rogo zegino areme, ya mo si kpakara akpakara foro ka ida kuti gupai nga apai nika ngbaangba kumbatayo? Aborokporo akpinga nyemu tiyo berewe wa gu si aanidu mbata te. Aboro nandu kina kumbatayo kindi kaa da ni airazuũ, airagbangbati, na ni kere zingizingi aboro. Si ima kpakara fu badungu aboro tipa i du na kido kuti agu aboro du na pagbia beyo. Ono agi apai re ima rengba ka fu gu kido foro nga apai nika ngbaangba. Tipagine rengbehe ka fu gu kido re ti ni? Mbiko gupai nga aboro namangapai kina boro wai Baibiri aima gumbaha kumbatayo rogo kura sangbanebi tipa “kusa rago.” (2 Tim. 3:1-5) Ruru ngbadu boro yo ho rengbe ka pe gupai nga gi sangbanebi re adigisongo tihe te te, na pa digisoho tihe nayugo gupai nga Kristo Yesu ima da ni Bakindo ga Mbori Kindo. Ono gere gbua nga sangbanebi sa dagba gu dungu sangbaanebi yo du tipa ga Mbori Kindo. Gaani idapase nika nyaka anyaka nifugö ani pai tipa agu asangbanebi nga gu naima digisotihe vuru agu agarã yo susi mbembedi kusayo.

2. Gini apai ani nika sakapai tipaha rogo gi kekeapai re, na tipagine?

² Rogo gi kekeapai re, ani nika sakapai tipa (1) gu sangbanebi naundo rani ani rugutirani na pa gu regbo i asigira Kindo ti ni, (2) agu asangbanebi naundo rani ani rugutirani na gupai nga Yesu ima da ni Bakindo ga Mbori Kindo ngbangbaturũ yo, na (3) agu asangbanebi nayugopa wai i nika gbarasa avura ga Mbori Kindo. Kina wai rengbe gu boro narungo aroko ka gbigbia yepeyepe aroko ku rogo basa tipa ka rungo ho si kusi roko, agu asangbanebi nibakiakia ani nika wisigopai tipaha nika undo rani ani rugutirani ziazia na pa gu regbo du ani ti ni ringbisihe kuti ga Yekova regbo mangaapai.

WAI KA INO GU REGBO I ASIGIRA KINDO TI NI

3. Gini kido gu sangbanebi du rogo Daniere 7:13, 14 afuhe furani nibipa gu Bakindo nga ga ga Mbori Kindo?

³ Gu sangbanebi du rogo Daniere 7:13, 14 nakido rani na gupai nga, Kristo Yesu nika ngia bawene Bazogo kisusi nga ga ga Mbori Kindo. Arikaaboro dunduko nika du na ngbarago ka ‘manga pa ko,’ na i amaanga kura bazogo kuba ko te. Gu kura sangbanebi rogo gu buku nga ga Daniere agumba gupai kumbatayo nga Yesu nika dia gako Kindo ti digido gu sangbanebi du tipa arago bara saba. Ya mo ani rengbe nzunzu ka inopa gu regbo Yesu ada ni Bakindo ti ni?

4. Waigu Daniere 4:10-17 aundo rani ani inipa gini garã si adu nga Kristo nika da ni Bakindo ti ni? (Oni bi rukutu kekeapai a.)

⁴ Oni gedi Daniere 4:10-17. Aregbo “bara saba” narukuba agarã nga 2,520. Gu regbo re atona rogo 607 Mbata fu Batikayo Kristo, ho aBabero adi gu yangara bakindo ni kusayo naadu rii ga Yekova mbatabakindo Yerusarema yo. Si adigi rogo gu garã nangia 1914 Fuo Batikayo Kristo, ho Yekova amoi Yesu ni rii mbatabakindo—ni Bakindo ga Mbori Kindob nga gu ko “du he ni gako.”—Yeze. 21:25-27.

5. Gini kura gene sa rengbe ani ka gbia undo ngbaha ti gu sangbanebi du tipa aregbo “wa bara saba”?

⁵ Waigu rengbe ani ka gbia undo ti gi sangbanebi re? Pa ino ani pai tipa aregbo “bara saba” nafu gu kido furani nga, Yekova nadigiso gako akidohe kina ti wene regbo. Kina wai Yekova adiberã nga ko nika maa Yesu ni Bakindo ti kura regbo, na Yekova ki moiko ti kina gu regbo re ho si ada ni, sidu, ani ima ino gupai nga ko nika digiso gu kura asangbanebi dunduko ti gu regbo ko nadiberã tipaha. Nirengo, ga Yekova uru “aíma nga te!”—Abak. 2:3.

WAI ANI AINO GUPAI NGA KRISTO IMA DA NI BAKINDO GA MBORI KINDO

6. (a) Gini apai ani abihe auru kpotosende nga gu nayugo gupai nga Kristo nazogarago ngbangbaturũ yo? (b) Waigu gu sangbanebi du rogo Yugoti 6:2-8 ayugo gipai re nirengo?

⁶ Mbembedi kuti ga Yesu digido sunge tungusapai auru kpotosende, ko apepa kura apai nga gu nika manga rogo zegino nga gu nika undo apefuoko i ini gupai nga ko ima tona zogarago ngbangbaturũ yo. Bete agu apai ko apepaha angia avura, angbongi, na abazigizo. Ko aima fura a tipa agberãngbi watadu ririakaza, “rogo agu arago,”—na gu ririkaza nga Korona namanga awere nga kpiapai. Agu apai namanga re nga papara agu apai Baibiri aya tipaha si nayugo “ye” Kristo watadu padu ko ho ti ni. (Mt. 24:3, 7; Rk. 21:7, 10, 11) Tifuo agarã naima susa 60 fuo kpio Yesu na ko ki ga ku ngbangbaturũ yo, ko ayugu kura dungu apai fu gu mokedi nangia Yoane nga gu nayugu gupai nga agi apai re nika manga amanga. (Oni gedi Yugoti 6:2-8.) Agu apai re dunduko ima manga naatona ti gu regbo Yesu ada ni Bakindo rogo 1914.

7. Tipagine gbegberẽ apai ninaamanga ti ni auru kpotosende naatona ti gu regbo Yesu ada ni Bakindo?

⁷ Tipagine apai agbere ti ni kisusi auru kpotosende ho Yesu ada ni ni Bakindo? Yugoti 6:2 nayugo gu futufutuapai furani du na nyanyakipaha—gu bambatapai Yesu amangihe fuo da ko ni Bakindo ga Mbori Kindo nga ka sovura. Ka sovura kuti da? Kuti Bakitingbanga na gako adaimona. Ringbisihe kuti Yugoti kapita 12, i adibe Satana na i ki bako na gako adaimona ku auru kpotosende. Sangbanaha ningia “rungo . . . fu kpotosende,” mbiko Satana na kere zinga na ko aima digo nizubo aboro.—Yugo. 12:7-12.

8. Waigu rengbe ani ka gbia undo ti bi ani agu asangbanebi du tipa ga Mbori Kindo si nidigisitihe?

⁸ Waigu rengbe ani ka gbia undo ti agi asangbanebi re? Agu apai namanga rogo zegino gbiati agu ariapai du rogo ga aboro mangaapai yo nika undo rani ani ini gupai nga Yesu aima da ni Bakindo. Sidu, kuba gupai nga anidu na gberãrago nga aboro namangapai na ani rogo gbangbati yo na ngba gbegberẽ gene, si naida ani tingidi gupai nga, gayo mangaapai nadigiso gu sangbanebi nga ga Baibiri. Ga Mbori Kindo nazogarago azoga awere! (Tam. 37:1) Na ani nika bi badungu gbegberẽ apai rogo zegino wa Aramegido nikaa mbeda gbe. (Mk. 13:8; 2 Tim. 3:13) Ani na bakere tambuahe nga, gu Barani du ngbangbaturũ yo nga boro nyemuse naundo rani ani rugutirani na ndu gupai du dungu akpakarapai ti ni rogo zegino.

WAI I NIKA GBARASA AVURA GA MBORI KINDO

9. Waigu gu sangbanebi du ni kekehe rogo Daniere 2:28, 31-35 asakapai tipa yangara gu zogarago du na bakere ome ti ni kisusi rogo zegino, na gini regbo si atona ti ni?

⁹ Oni gedi Daniere 2:28, 31-35. Ani nabi gi sangbaanebi re abi si nidigisitihe areme. Ga Nebukadenesara musumo ayugu gupai nika manga rogo “yangara arame,” tifuo ga Kristo zogarago tona. Agu avura Yesu du auru kpotosende nika koda yangara gu ringara du na bakere ome kisusi rogo zegino a wa Baibiri agumbaha kumbatayo, nga gu narukuba “kpetenduhe . . . du ni marã na ni pere.” Gu ringara du na bakere ome kisusi rogo zegino nazogarago azoga awere. Si atona zogarago ti regbo Bambata Vura Nga ga Zegino ho ringara aNgirisi na Amerika akoditiyo ni tipa ka mangasunge sa si kini da ni gu zogarago nga ga aNgirisi na Amerika kurii zegino. Ga Nebukadenesara musumo aima gumba gupai kumbatayo a nga, apai wa kandara ue tipa gu ringara du na bakere ome kisusi rogo zegino nika saha si du kia ti agu akindo naadu mbata.

10. (a) Ginipai ani abihe rogo gu zogarago nga ga aNgirisi na Amerika areme nga gu gu sangbanebi nga ga Daniere aima gumbapaha kumbatayo? (b) Gini kerepai si aida ani nehe? (Oni bi gu sanduki nga, “Oni du na Rubangirise be Pere!”)

¹⁰ Ni bambataha, gu zogarago nga ga aNgirisi na Amerika kia ti agu azogarago naadu na bakere ome ti ni kisusi rogo zegino i agumba paha mbata kusayo rogo gu yuguyugupai re, gu zogarago nga ga aNgirisi na Amerika arunga kuba nyanyaki dahabu watadu feda te, ono si nika du ni kodikodihe na marã gbiati pere. Pere narukuba aboro. (Dan. 2:43) Areme, ani nabi gupai abi ziazia nga, gu maapai kurii du aboro na ni ti regbo bawaraga, bawaraga tipa gu rengo nga ga avuru ringara, kura ku bangirigene ka yugo gberãrago, gbiati agu ariigbu nasovura tipa gu rengo nga ga abamangisunge nasaha ni kpakarakpakaraha fu gu ringara du na bakere ome ti ni rogo zegino tipa si mangi gupai si aida ka mangaha.

11. Waigu gu zogarago nga ga aNgirisi na Amerika kurii zegino anyakasa gaani kido nga ani naraka ti yangara arame?

¹¹ Ni uehe, gu zogarago nga ga aNgirisi na Amerika kurii zegino nga gu narukuba kpendu bakere kpiahe nga yangara zogarago nga ga zegino a wa Baibiri agumbapaha kumbatayo. Zogarago ho nga ga aboro nika du tifuoho te. Kuba gure, ga Mbori Kindo nika gbarasaha kusayo ti regbo Aramegido wa sa na gu kura azogarago dunduko nga ga aboro.c—Yugo. 16:13, 14, 16; 19:19, 20.

12. Ngba gini kura gene ga Daniere sangbanebi afu wasa na maabangirise furani?

¹² Waigu rengbe ani ka gbia undo ti gu sangbanebi re? Gu sangbanebi nga ga Daniere nafu gu kura gopai berewe nga gu nayugo gupai nga ani naraka ti yangara arame. Agarã naima susa 2,500 kusayo, Daniere agumba gupai kumbatayo nga, tifuo gu zogarago nga ga Babera, azogarago biama du na bakere ome ti ni kisusi rogo zegino nika zogarago kurii ga Mbori aboro. Kurii gure, ko ayugu gupai nga gu zogarago nga ga aNgirisi na Amerika kurii zegino nika ngia yangaraha. Gipai re nafu gu wasa gbiati maabangirise furani nga, barambeda, ga Mbori Kindo nika gbarasa agu azogarago dunduko kusayo nga ga aboro na si nika zogarago kurii kpotosende dunduko.—Dan. 2:44.

13. Ginipai “gu muambi ru” na “abakindo bawe,” i nafura tipaha rogo Yugoti 17:9-12, arukubaha, na waigu gi sangbanebi re nadigisitihe?

¹³ Oni gedi Yugoti 17:9-12. Mbiko gupai nga gu Bambata Vura Nga ga Zegino aima ye na bakere gbarasahe, gu kurapai amangi a nga gu nadigisi kura sangbanebi nga ga Baibiri du tipa yangara arame. Abazogo nga ga zegino yo aaida ka ye na zereda ku rogo zegino. Sidu, rogo Ngi 1920, i amoi gu riigbu nga Kodatise nga ga Aringara [League of Nations] nga gu Yu-eni aye ka diabaha rogo Tanvuo 1945. I nayamba gi riigbu re nga “gu muambi ru” watadu gu muambe bakindo. Ono si nga gu zogarago du na bakere ome ti ni kisusi rogo zegino te. Na si na ome gbua mbiko agu azogarago nga ga aboro naundo ho. Baibiri nayamba agu azogarago re nga, “abakindo bawe.”

14-15. (a) Ginipai Yugoti 17:3-5 ayugoho tipa “Babera du ni bakere he”? (b) Ginipai namanga tipa agu aboro nasongoda ziree pambori?

¹⁴ Oni gedi Yugoti 17:3-5. Rogo gu yuguyugupai yo Yekova afuhe fu gu mokedi nangia Yoane, Yoane abi, “Babera du ni bakere he,” nga gu narukuba bariwara ngbii ziree pambori. Ginipai gu yuguyugupai re ayugoho? Tipa gbanga regbo, ziree pambori ima mangasunge mbembedi wa sa na agu azogarago nga ga zegino na si kini undo yo. Ono barambeda, Yekova nika maa sangbako ku kpoto agu abazogo yo nga ga zegino tipa “i mangi he.” Sangbanaha nika ngia gine? Agu azogarago du nga, “abakindo bawe,” nika zubo agu ariigbu nga ga ziree pambori na ki gbarasihe.—Yugo. 17:1, 2, 16, 17.

¹⁵ Wai du ani aino gupai nga digido Babera du ni bakere he ima mbeda? Tipa ka karagapai kuti gu sanahe re, si adu ni wenepai ka ani tingidi gupai nga, gu bakere ime nangia ga Ferata nanaabanda papara gu gbata naadu mbata kusayo nangia Babera. Gu buku nga Yugoti naringbisa agu aboro nasongoda Babera du ni bakere he kuti “aime.” (Yugo. 17:15) Ono si nayugo gupai ayugo a nga agu aime re nika ‘uguda,’ nayugo gupai nga, bariwara ngbii ziree pambori nika zanga badungu agu aboro azanga nasongodaha. (Yugo. 16:12) Gi sangbanebi re nada ada ti rengo, badungu aboro areme angianga aboro pambori ya na i nangera kina ku rogo kura aba tipa undo kuti gayo akpakarapai.

16. Waigu rengbe ani ka rugatirani na agu asangbanebi du tipa gu regbo i asigira Yu-eni ti ni, na gu regbo i nika gbarasa Babera du ni bakerehe ti ni?

¹⁶ Waigu rengbe ani ka gbia undo ti gu sangbaanebi re? Pa kusayo gu riigbu nga Yu-eni na gupai nga badungu aboro asongodanga ziree pambori te nga gu gopai nayugo gupai nga ani naraka ti yangara arame. Wa vura duhe nga badungu aboro asongodanga Babera du ni bakerehe berewe te, anga si nga gupai nika gbarasa agu ariigbu nga ga ziree pambori te. A wa i nipehe mbata kusayo, Yekova nika maa sangbako ku kpoto ‘abakindo yo bawe’—nga gu zogarago nga ga aboro nga gu nasongoda Yu-eni—tipa “i mangi” gupai ko aidaha. Agu ariigbu re nika gbarasa Babera du ni bakerehe wa ikpirogumba, na si nika zigbä aboro azigbä.d (Yugo. 18:8-10) Pa gbarasa yo Babera du ni bakerehe nika zigizo zegino azigizo na si ima rengba ka ye na akpakarapai, ono ga Mbori aboro nika du na ngbarago tipa nduapai kandara ue. Ziree pambori nga gu naima digo nidu ni vura Mbori tipa gbanga regbo adunga berewe te, si nika go kusayo nyeanye kindi, na i nika batasa rani barambeda be gi gbegberẽ zegino re!—Rk. 21:28.

ONI DU NA IDAPASE NGA YEKOVA NIKA BANDA GAKO ABORO ABANDA KUMBATAYO

17-18. (a) Waigu rengbe ani kaa ndu kindi kumbatayo kaa nyakasa gaani idapase? (b) Ginipai ani nika sakapai tipaha rogo gu kekeapai ngbefuo gere?

¹⁷ Daniere ape gupai kumbatayo nga ndikidi “inahe” nika ‘máa pai.’ Na ni rengo, si ima maapai! Ani ima rugatirani awere na agu asangbanebi nabipa gaani regbo. (Dan. 12:4, 9, 10) Agi asangbanebi re nagumba kina boro rengo na si kini kiisi gaani irisa tipa Yekova na Fugoko gako ziazia toro adu kugii pa kehe. (Yes. 46:10; 55:11) Sidu, mo naandu kindi kumbatayo kaa nyakasa gamo idapase niwisigo mo Ziazia Kekeapai sirisiri na kini undo kura aboro tipa i sonosi gu pagume na Yekova nga gu ko aidaha. Ko nika banda agu aboro abanda nakido kutiko na kpotoyo yo dunduko na ko nika fu “ndikidi zereda” fuyo.—Yes. 26:3.

¹⁸ Rogo gu kekeapai ngbefuo gere, ani nika sakapai tipa gu sangbaanebi i agumbaha tipa gu dungurati nga ga aKristano rogo yangara arame. A wa ani nika wirikaha, agu asangbanebi re nayugo gupai a nga ani naraka rogo yangara arame. Ani nika bi bakere agopai nga gu nayugo gupai nga Yesu—nga gu ko du awere ni gaani Bakindo—nangbembatayo fu agu apefuoko du niruru yo.