1 | Kparakpee “Oni Bá Agu Apai Nafuda Roni ku Auru Ko Yo”

BAIBIRI NAYA: “Oni bá agu apai nafuda roni ku auru [Mbori] yo; mbiko ko naberã pa roni.”—1 PETERO 5:7.

Gupai si Ayugoho

Yekova nangarasa rani tipa ani fura fuko tipa ai agu apai du wa tindiro nga gu nafuda berãrani yo na kpotorani yo. (Atambuahe 55:22) Anga kpakarapai ho du ni bakere he kisusi watadu ni wiri toonihe gbe tipa ani mangi kparakpee tipaha te. Ka si du na nyanyakipaha furani si na nyanyakipaha fu Yekova a. Gipai re wo mbiko Yekova naberã parani gbiati agu apai nafuda rani. Manga kparakpee fuko nga nyanyaki diandue tipa ka gbia gu zereda nga ga berãse yo.—AFiripoio 4:6, 7.

Wai Gipai re Narengbe ka Undo

Ho ani asota ni na kaza berãse, ani ima rengba kaa bi tirani nga ani nisarani. Dedede, gu kura aboro aruganga tiyo na gupai ani andu rogoho te. (Asanza 14:10) Ono ho ani agumba gupai ni nzunzu fu Mbori ani ndu rogoho, ko nikaa degatuko ti aregbo dunduko furani ni nunga na kini rugutiko na ani. Yekova nabi rani abi, ko ima rugatiko na gaani aimisiri na asadatise na ko naida ani naakpara fuko tipa agu apai dunduko nafuda rani.—2 Pekapai 6:29, 30.

Ho ani afura ni fu Yekova rogo kparakpee yo si nanyakasa gaani kido kuti gupai nga ko naberãpa rani aberã. Ani ima rengba kadu wakina gu bake papara Atambuahe nakpari kpee ki ya: “Mo abi gi gberãngbi, mo aini pa ga mbisimore fudifudiapai.” (Atambuahe 31:7) Pa ino ani gupai nga Yekova ima ino gupai ani andu rogoho ima rengba ka undo rani ani naahipai kindi ti kpakarakpakara aregbo. Ono Mbori namangapai kisusi gu gbua nga ka ino gaani akpakarapai. Ko ima rugatiko na gupai ani andu rogoho kisusi aboro dunduko na ko naundo rani ani gbia wasa na ngarasaro rogo Baibiri yo.

Wai Baibiri Aundo Julian

Wai Bakabangirise Adu na Maapai Kurii Re

“Mi asota na bakere bakabangirise gbiati bakere fuda berãse yo. Bakabangirise anaaye kuti re dedede. Mi anidu adu wenengai awere, fuo bete regbo bakere bakabangirise ki tona re zanga nduhe. Mi anidu gbe na bakabangirise ho mi anidu ni pati gu kura aboro. Mi anaabaka bangire gbe tipa gupai i anaaberãha tipa re.

“Agu abakureami narugutiyo na gupai naadu tipa re, amangipai na omeyo dunduko tipa ka undo re. Gu rengo duho nga, gu kura aregbo kinaho i anaape agu apai nanaadunga na undo ti ni fere ya. Ono mi na bakere tambuahe nga i aˈasada ka undo re.

“Ti kura aregbo, gimi bakabangirise gbiati fuda nga ga berãse yo anaˈasaha fere ni kpakarakpakaraha mi mangi kparakpee. Mi namanga bakere asadatise tipa ka maaberã re na ka fura fu Yekova rogo kparakpee yo. Berãre anaago ti apai ni kina boro ipo kisusi si kini sa re rire yo navundo. Ho du rire yo ni ni vunduvunduhe si ni kpakarakpakaraha fere mi saki gupai fu Yekova namanga re na gupai mi aberãha.”

Wai Baibiri Aundo Re

“Mi wiriki gupai rogo gimi wisigo Baibiri nga, si aidanga kparakpee du ni gbangaha watadu ni bawenehe tipa Mbori idi na ni te. Ti agu aregbo gene ninaadunga bere mi peke agu apai namanga re rogo afugo yo ya, mi naape kina gupai gbua nga: ‘Akoo Yekova, mo undo re.’ Ono wa vura duhe wo, mi nabi gupai nga Yekova naruga tiko na mi na ki fu guhe fere mi aidaha ti gu regbo re. Kupati kparakpee, mi aima gbata undo be amunganga. Mi na ngbarago ka gumba gupai nga, mbiko agi aundo re mi ima du awere wenengai. Wa vura duhe nga si naida mi mangi bakere asadatise tipa ka sana gu buba du ngbangbaturũ yo tipa undo, mi namangaha amanga wo mbiko mi ima du na gu kido nga ko ima kpinyemu re na ko naida ka undo re.”