2 | ‘Wasa Rogo Ziazia Kekeapai’

GUPAI BAIBIRI APEHE: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.”—AROMO 15:4.

Gupai si Ayugoho

Baibiri nangarasa rani na gu wene afugo wasa rengbe ka undo rani ho du ani ni na iraira aberãpai. Gu pangbanga nga ga Baibiri a nafu maabangirise furani nga agu aimisiri nga ga berã nika go kusayo barambeda.

Wai Rengbe Gipai re ka Undo

Ani dunduko nasota na gberãrago ti kura aregbo; ono agu aboro nambu be bakere gberãrago watadu bakabangirise ima rengba kadu rogo kere imisiri ti aregbo dũ. Waigu rengbe Baibiri ka undo?

Baibiri nangarasa rani na wene afugo wasa nga gu rengbe ka undo rani ho ani aberã ni ngba iraira gene. (AFiripoio 4:8) Si ima rengba nzunzu ka hiiso berãrani na agu afugo wasa gbiati aberã nga gu rengbe ka undo rani ani du na maapai kurii gaani aberã.—Atambuahe 94:18, 19.
Baibiri ima rengba ka undo rani ani mbu gu bipai nga sunge tirani te.—Ruka 12:6, 7.
Dungu kekeapai du rogo Baibiri yo nafu gu kido furani nga ani nisarani te na Mbori nga bakusirani ima rugatiko nzunzu na wai du ani.—Atambuahe 34:18; 1 Yoane 3:19, 20.
Baibiri nakidohe nga Mbori nika digiso gu gbegberẽ apai namanga aboro dunduko. (Yesaya 65:17; Yugoti 21:4) Ho ani arungo ni mbiko bakere fuda berãseyo, ani rengbe ka bi gupai nga gi kidohe re nafu ngarã furani tipa ani naahipai.

Wai Baibiri Aundo Jessica

Wai Bakere Gberãrago Adu na Maapai Kurii Re

“Ho garã re adu ni 25, mi adu na bakere bakabangirise na i abi gupai nga mi nambu be bakere gberãrago. Mi adu ni fudifudi re be berãpa gu kereapai namangi re kusayo. Amunganga aundo re mi rugutire na gupai nga gi bakere gberãrago aaye mbiko mi aberãpa gu kereapai namangi re rogo gimi raka kusayo. Kupati gu wene angua kaza nadu ho, mi aida na gu gene husa rengbe ka undo re mi ini agu apai naafuda berãre na ki gbia ziga.”

Wai Baibiri Aundo Re

“Ho mi anidu ni na bakere gberãrago, rogore yo anaazigbä, mi kidu na bakere bakabangirise, na ka mi aranga ya. Rogo ayuru dedede mi anidu na bakere bakabangirise nga gu mi arengbanga ka mangapai kutini ya. Awa Atambuahe 94:19 agumbaha, Mbori ima rengba ka fu wasa furani na ki ngarasi rani ho bakere bakabangirise nafu ni rirani. Sidu mi anaabanda gi Baibiri gbiati gi buku nga gu naadu na agu averesi rogoho nga ga ngarasaro pati gi ba pigo. Ho gene anaadunga ni mi ra ya, mi anaageda bete averesi na gipai re kini sa ga Mbori aberãpai si nifu wasa fere.

“Baibiri nangarasa rani ani mbu agu aberã andunga kuti gupai ani nainihe tipa Mbori ya. Mbata kusayo, mi anaabi tire nga sunge tire te, boro ho nakpinyemure te, na wiripai ho ka mi mangihe te. Ono mi ima wirika gupai nga ngbatunga agi aida re kia ti gupai du rogo Baibiri, nga gu nafura tipa Mbori ni gu bagude du na nyemuse na nunga, nga guko naberã parani wadu ani ni basasa. Mi atona yeeye kadu na maapai kurii gimi aberã kuba gupai nga gimi aberã du maapai kurii re. Mi ima wirika ka bi tire kina wai Mbori abi re. Gere nangia gu nyanyaki diandue nga gu naundo re tipa mi dibe gu gbegberẽ bipai mi adu na ni tipa tire.

“Mi nangera kumbatayo tipa gu regbo berãpa gu gbegberẽ apai dunduko namangi aboro kusayo gbiati gbegberẽ aberã nika go ti ni. Pa ino mi gupai nga gu kaza nga berãseyo nika go kusayo nafu gu ome fere si aidaha tipa mi mangipai kuti gimi arungbura awere, na kidu na maabangirise kumbatayo tipa gu regbo mi nika du na diabese kuti gu vura mi asoho kuti bakere gberãrago.”