Gupai Baibiri Ayugoho Furani Tipa Bakehe

1. Tipagine du mo natambuahe ti ni tipa Baibiri?

ANI natambuahe fu Yekova Mbori tipa Baibiri! Rogoyo ko nafu agu arugute furani nga ga tatamana nga gu rengbe ka undo rani ani dibe agu akpakarapai ani agbiatirani na ni areme. Ko nafu bawene maabangirise furani a tipa kumbatayo. Gu nyakipaha gbe nga Yekova ima mangasunge na Baibiri tipa ka yugo asinoko furani. Ho ani aberã ni kuriipa wene asino Yekova, gipai re nazio ngbaduraniyo ni bakerehe na si ki sarani ani mbedi na gaani Mbori na ki sonosi wene pabakure na ko.—Tam. 25:14.

2. Rogo gini ngbatunga agene Yekova nayugu tiko fu wiri aboro?

² Yekova naida aboro ini ko. Bakuru kusayo ko ayugu tiko vurube amusumo, yuguyuguapai, na ko akedi gako amaraika i ndu ka gumba gako pangbanga fu kura aboro. (Geda. 12:6; Amo. 10:3, 4) Ka si adu nga i aake nga pa agi amusumo, yuguyuguapai, watadu gu pangbanga amaraika andu ka pepa ha kusande ya, ka ani du nga na rengba ka wirikapai tipa ha te. Si du nga ndu gupai Yekova ape gupai ti ni fu gako akumba nga i ‘ké agu apai dunduko ku rogo kitabu’ nga gu ko aaida ani inihe. (Yere. 30:2) Bambiko ga Mbori “gene du ziazia,” ani ima rengba kadu na gu kido nga gu gene ko afura na ani ngbaha si ni bawenehe na si tipa gaani undo.—Tam. 18:30.

3. Waigu Yekova asa gupai nga Baibiri du ni bandabandaha ki da ti gaani regbo? (Yesaya 40:8)

³ Oni gedi Yesaya 40:8. Fugo Mbori aima fu wene rugapai fu ruru akumba na adee tipa dungu kutu agarã. Waigu agi apai re arengbe ka manga? Gure nga wene sanahe, bambiko i ake Baibiri mbata kusayo ti kaikai awaraga na akpoto nga agu ahe paha aima rengba ka gberã tingbafuo bete aregbo, sidu, gu bambataha i akehe si berani ho areme te. Ono tie, Yekova aima sa gupai nga aboro ke Baibiri berewe. Wa vura duhe nga agu aboro naake Baibiri berewe re angia kpakpa aboro, i aima du na bakere rubangirise. Ni kpiapai, nibi pa Kuru Ndiko, gu kura wene bawirikipai sa ake gupai nga: “Kuru buku ho i akehe ni ruruhe wa Kuru Ndiko te.” Sidu, wa vura duhe nga i ake Baibiri kusayo ti agu ahe paha aima rengba ka gberã niipo, na agu aboro na kehe berewe angia kpakpa aboro, ani ima rengba kadu na gu kido nga agu afugo ani agedaha areme rogo Baibiri yo nga kina boro agu aberãpai nga ga Baenge ke Baibiri nga Yekova.

4. Ginipai ani nika sakapai tipaha rogo gi kekeapai re?

⁴ Yekova nafu “wene gamahe dunduko, na ziazia ũgamahe dunduko” furani. (Yak. 1:17) Baibiri nga wene gamahe sa dagba gu wene agamahe yo Yekova nafuhe furani. Ho boro afu gamahe ni furani, gu gamahe re nayugopa wai furani gu boro re na ini—rani na agu azingo du ani na ni. Gipai re nga rengo tipa gu Boro nafu Baibiri furani. Ho ani awisigo gi gamahe re ni, ani na wirika dungu apai tipa Yekova. Ani nawirika gupai nga ko ima ino rani wenengai na agu apai du ani na zingoho. Rogo gi kekeapai re, ani nika sakapai tipa agu apai ani awirikaha rogo Baibiri yo tipa asino Yekova biata: gako tatamana, gako ruru sarangbanga, na gako nyemuse. Ni bambataha, ani sakingo pai tipa agu agene Baibiri ayugo pa ga Mbori tatamana ngbaha.

BAIBIRI NAYUGO PA GU TATAMANA NGA GA MBORI

5. Gine nga gu gene sa Baibiri ayugopa ga Mbori tatamana ngbaha?

⁵ Yekova ima ino gupai nga ani naida na gako arugute nga ga tatamana. Na gu gako gamahe nga Baibiri, ima hii be gako tatamana. Gu rugute nga ga Baibiri ima du na wene sangbanaha kurii aboro. Baibiri naˈaria ga aboro raka. Ho Moize ake gu bambata abuku ni nga ga Baibiri, ko ape gupai fu ga Mbori aboro nangia aYisaraere nga: “A nga si nga kungba pai fu roni te, ono si nga boro ungaroni.” (Pa Rug. 32:47) Agu aboro nagi sangba Ziazia Kekeapai aima rengba ka gbia ngbarago rogo gayo raka yo. (Tam. 1:2, 3) Wa vura duhe nga i ake Fugo Mbori bakuru kusayo, si kindi na ome ka aria ga aboro raka. Ni kpiapai, rogo gu kekeapai ninaakura rogo gaani bangiriba nga jw.org, du riihe nga “The Bible Changes Lives,” mo nika bi akpiapai bangehe naima susa 50 nga ga aboro nga aguyo naadu na rengba ka manga bakere ariapai rogo gayo raka yo areme mbiko i atona ka mangapai kuti agu arugute nga ga Baibiri—1 Tesa. 2:13.

6. Tipagine rengbe ani ti ni ka nya wẽ Baibiri kia ti kura abuku?

⁶ Gu kura buku ho du wa Fugo Mbori te. Tipagine duhe ti ni wo? Bambiko gu boro nga Baenge ke gu buku re nga Yekova Mbori, ko na tandu apai dũ, digido ko ti ni te, na boro ho du na tatamana wa ko te. Aboro ninaandu kindi kumbatayo kaa geda kura dungu abuku zavura tifuo abakehe kpi, ono agu arugute du rogo agu abuku re dedede ninaadunga na sunge ti ni kusa te. Ono gu bangua arengo nga ga tatamana du rogo Baibiri yo, si nyeanye kindi; si ima undo agu aboro naraka ti aregbo ni bakiakia. Ho ani ageda gu ziazia buku re ni na kini berẽkurii gupai ani awirikaha, Baenge kehe namangasunge na gako ziazia toro du na ome ti ni tipa si undo rani ani bi wai rengbe ani ka mangapai kutini rogo gaani raka yo. (Tam. 119:27; Mara. 3:16; Eb. 4:12) Ii, gu boro nga Baenge ke Baibiri na kakaka nyemu ka undo ro. Si naida gipai re sa rani ani naageda Baibiri dedede!

7. Waigu Baibiri akodi ga Mbori aboro bakuru kusayo?

⁷ Gu kurapai kinaho berewe nayugo gupai nga Baibiri na gu tatamana rogoyo nga ga Mbori. Gupai re nga rengo nga Baibiri naundo ga Mbori aboro i du ni kodikodi yo. Ho aYisaraere arimi ni kurogo Ringara Mokido, i asungu rogo aba ni bakiakia. Aguyo ada ni abaziatĩo, aguyo kini zogo anya na aguyo kini mangisunge bino. Si aima rengba kadu taata fu gu Yisaraere nanaaraka rogo gu kura papara ringara bangirini go ti gu kura Yisaraere nanaaraka rogo gu kura papara ringara kia. Ono Yekova amangi mbakadapai tipa aYisaraere naadungura tiyo kurogo bangisa ba ti aregbo ni bakiakia ka gia Fugoko i ni gedihe fuyo na kini sakirogoyo. (Pa Rug. 31:10-13; Nem. 8:2, 8, 18) Oni berẽnga pa wai ruru Yisaraere anidu ho ni anida ni Yerusarema yo na isoke ki bi gu kura amirioni airisi Yekova ye rogo papara aringara dunduko! Ngba gi gene re, Yekova aundo yo i nye ni kodikodi yo. Kusa, aKristano angia agu akumba na adee nanaape dungu afugo. Aguyo angia kikindigi pa aboro, aguyo kidu na umbapa yo, airakumuko na aguyo ki ngia airarungo. Ono mbiko gayo nyemuse tipa Ziazia Kekeapai, i adu ni kodikodi yo rogo iriso ndikidi Mbori yo. Agu aboro naada ni aidipase arengbe ka giarogo Fugo Mbori yo kina mbiko gu undo nga ga akurayo aidipase na ni dungura yo tiyo na yo.—Amo. 2:42; 8:30, 31.

8. Waigu Baibiri akoda ga Yekova aboro areme?

⁸ Gu gaani Mbori du na tatamana nandu kindi kumbatayo kaa yugopai fu gako aboro na kini kodi yo vurube Baibiri. Baibiri na agu arengo rogoyo dunduko tipa Yekova nga gu si aida ani inihe. Dedede, wo ani ninaadungura tirani tipa gaani adunguratise nga ga dungurati, na bakere adunguratise ka gia Ziazia Kekeapai i ni gedihe na kini sakirogoyo furani. Sidu, Baibiri nga gu ũsunge Yekova amangasunge na ni ka undo gako aboro i “nimangi pako kina ku bani sa.”—Zef. 3:9.

9. Gini sino si aida si du tirani ka ani aida ka giarogo agu apangbanga yo nga ga Baibiri? (Ruka 10:21)

⁹ Oni bingo gu kura gopai nayugopa ga Yekova tatamana. Ko asa gupai nga i ke kura apapara Ziazia Kekeapai rogo gu gene kina agu aboro nagedaha du na umbasitise narengbe ka giarogoyo. (Oni gedi Ruka 10:21.) Aboro rogo arago dunduko nageda Baibiri. Gu kura wene bawirikipai sa ape gupai nga, “Dungu aboro nageda Baibiri susi gu kura abuku, na i namaaberã yo ka gedaha sirisiri susi gu kura abuku.” Ono kina aboro umbasitise nagiarogoyo na kini mangi gupai si apehe.—2 Kor. 3:15, 16.

10. Gini kura gene berewe Baibiri ayugo ga Yekova tatamana ngbaha?

¹⁰ Gu kura gene kinaho ani awirikapai ngbaha rogo Baibiri yo tipa ga Mbori tatamana berewe. Yekova amanganga sunge sa na Ziazia Kekeapai tipa ka yugopai furani wa du ani ni badona te, ono ko nayugopai furani wa du ani ni basasa na kini fu wasa furani nibasasa. Ho ani ageda Fugo Yekova ni, ani nabi gupai nga Yekova ima kpinyemu rani wa du ani ni basasa. (Yes. 30:21) Ho mo naagbia tiro ni na akpakarapai, bara wai mo naazaka Ziazia Kekeapai na kini gedi gu veresi nga gu mo abihe wa i akehe nzunzu fu kina ro? Wa vura duhe wo, i ake Baibiri tipa dungu amirioni aboro gi tiyo na ni. Waigu tie rengbehe kadu na gu vovo apai rogo yo nga kina boro agu apai mo aidaha? Gipai re wo bambiko Baenge ke Baibiri nga Iratatamana rogo zegino dũ.—2 Tim. 3:16, 17.

BAIBIRI NAYUGOPA GA MBORI RURU SARANGBANGA

11. Waigu Mbori ayugu gupai nga ko akparanga aboro te ho i ake Baibiri ni?

¹¹ Ruru sarangbanga nga gu kura sino Yekova. (Pa Rug. 32:4) Ruru sarangbanga naandu wa sa na zanga kpara kura aboro, na Yekova akparanga aboro te. (Amo. 10:34, 35; Rom. 2:11) Ani naino gupai nga Yekova akparanga aboro te mbiko i ake Baibiri rogo agu afugo yo dungu aboro anaapehe ti gu regbo re. Gu bambata akitabu nga ga Baibiri du 39 i ake dunguhe gbe rogo pa-Ebere, nga gu fugo dungu ga Mbori aboro anaagiaha ti gu regbo re. Ono tie, ti regbo agu aKristano naadu rogo bambata sa kama agarã, badungu aboro anaape pa-Giriki na gu yangada akitabu du 27 du rogo Baibiri yo i ake dunguhe rogo gu fugo re. Yekova aadianga berã nga i ke Fugoko kina rogo bangisa fugo sa te. Areme, aboro bangeyo naima mbeda ka da ti abirioni muambe nape dungu afugo rogo zegino. Waigu rengbe badungu aboro ka ye ka wirikapai tipa Yekova?

12. Gini kura gene sa Daniere 12:4 nadigisitihe ngbaha rogo gi yangada arame re?

¹² Vurube gu nebi nangia Daniere, Yekova akidohe nga ti yangada aregbo, gu “inahe” nga gu du rogo Baibiri yo “amáa pai.” Dungu aboro nika gia tiyo na gu inohe re. (Oni gedi Daniere 12:4.) Gene sa undo dungu aboro i gi rogo Baibiri yo nga, Baibiri na agu awaraga du mburu he rii Baibiri, i ima saha na ki gbingbidaha na ki kparakaha fu dungu aboro. Baibiri nga gu buku i naima saha kurogo dungu afugo na ki kparakaha rogo zegino. Agu asasa-fugo Ziazia Kekeapai ababagiahe akusaha, ti kura aregbo, genoho ima kio ni bakerehe gbe. Ka da ku awere, ga Mbori aboro ima sa Fugo Mbori nabaha dunduko watadu paparaha kurogo afugo naima susa 240 na ai boro rengbe ka gbiaha na zanga ni tumo tipaha. Nisangbana gipai re, rikaaboro rogo zegino dunduko namangapai kuti “wene pangbanga nga ga ngbi” mbata fu digido zegino da. (Mt. 24:14) Gaani Mbori ruru sarangbanga naida ka fu mamu fu dungu aboro tipa i ini ko nigeda yo Fugoko. Si wo mbiko gupai nga ko ima kpinyemu rani dunduko ni bakerehe.

BAIBIRI NAYUGO GA MBORI NYEMUSE

13. Tipagine rengbe ani ka ya ti ni wẽ Baibiri nayugo ga Mbori nyemuse? (Yoane 21:25)

¹³ Baibiri naundo rani ani ini gupai nga bangua sino Yekova nga—nyemuse. (1 Yo. 4:8) Oni berẽnga pa gupai Yekova aidipa i rimisihe ku rogo Baibiri yo na gu ko aarimisongo ho ya. Ko aidi i ke kina gupai rengbe ka undo rani ani du na wene pagume na ko, kidu na wene raka awere na ki gbia nyenye unga. Ono tie, mbiko ga Yekova nyemuse koyo du ani ni, ko afunga dungu futufutuapai furani nga gu arengbanga ka undo rani tipa ani irisiko ya te.—Oni gedi Yoane 21:25.

14. Ngba gini kura gene du ga Mbori nyemuse ni yuguyuguhe rogo agu apai yo du rogo Baibiri yo?

¹⁴ Yekova nayugo gako nyemuse ngba gu gene ko afura na ani ngbaha nga gu nayugo gupai nga ko nabi rani na kikiipa rani. Rogo Baibiri yo, ko afunga keke andiko furani nga gu nayugo gupai si aida ani mangihe na gu si aidanga ani mangihe ya rogo agu apai yo ani amangaha rogo gaani raka yo nabaha te. Kuba gure, ko namangasunge na gu ndikidi apai naima manga rogo raka yo, sangbaanebi, gu wene arugute du tipa raka tipa si undo rani ani mangi wene adiaberã. Ngba gi gene re, Fugo Mbori naundo rani ani kpinyemu ko na kini gisangbako kina boro kpotorani yo.

15. (a) Waigu Baibiri ayugo gupai nga Yekova naberãpa rani aberã? (b) Rogo sura yo, gini aboro du payo rogo Baibiri yo tooni degude, paranga wirina, na sosono wirina aberãkurii pa yo? (Bam. P. 39:1, 10-12; 2 Aba. 5:1-3; Rk. 2:25-38)

¹⁵ Baibiri nayugo gupai nga, Yekova naberãpa rani aberã ni bakerehe. Ngba gini gene? Fugoko hii be agu apangbanga nadu tipa wai aboro aapeka agu apai naadu tipa yo. Ani ima rengba ka ino wai agu aboro du pa yo rogo Baibiri yo adu bambiko i angia aboro na i ahi “dungu apai wa kina rani.” (Yak. 5:17) Gu nyakipaha gbe nga, ka ani bi wai ko amangipai na agu aboro naadu wakina rani, ani ima rengba ka ino gupai ziazia nga Yekova “na bakere nunga ti ko, na bakere inapai.”—Yak. 5:11.

16. Ginipai ani awirikaha tipa Yekova ho ani ageda pai ni rogo Baibiri yo tipa agu aboro namangi aingahe? (Yesaya 55:7)

¹⁶ Baibiri nayugo ga Yekova nyemuse furani ngba gu kura gene berewe. Ziazia Kekepai nafu gu kidohe furani nga ka ani mangi aingahe Mbori ambunga rani te. AYisaraere aingi kuti Yekova bara dunguhe; ono ho i anisaberã yo ni nzunzu, Mbori animbupai ambu fuyo. (Oni gedi Yesaya 55:7.) Agu aKristano nadu rogo bambata sa kama agarã aima ino gupai nga Mbori aima kpinyemu yo ni bakerehe gbe. Ga Mbori toro adu kugii gu mokedi nangia Pauro ko zungodi awirinako aidipase i ‘vu na ki fu wasa’ fu gu kumba namangi kere ingapai na ki saberã ko. (2 Kor. 2:6, 7; 1 Kor. 5:1-5) Nairiwo wai duhe nga Yekova ambunga airisiko mbiko gupai nga i amangi ingahe te! Kuba gure, ko ayugu nyemuse fuyo, ki rugu yo, na ki yambu yo berewe i du ni abakureako. Ko na kidohe ka manga kina gu bangisa pai re fu agu aboro ingapai dunduko ka saberã yo areme.—Yak. 4:8-10.

ONI BI GU “WENE GAMAHE” NGA FUGO MBORI NA KIKIPAHA

17. Tipagine du Baibiri ti ni ni nyanyakipa gamahe?

¹⁷ Yekova ima fu bawene gamahe furani. Tipagine du Fugoko ti ni na nyanyakipaha? A wa ani nawirikihe, Baibiri ima yugo ga Mbori tatamana, gako ruru sarangbanga, na gako nyemuse. Gi buku re nayugo gupai nga Yekova na kpinyemu gupai nga ani ye fuoko. Ko naida ani ye kadu ni abakureako.

18. Waigu rengbe ani ka yugo gupai nga ani na tambuahe tipa ga Yekova “bawene gamahe” nga Baibiri?

¹⁸ Si aidanga bangirani go ti gupai nga Fugo Mbori nga “wene gamahe” te. (Yak. 1:17) Ani naandunga andu kindi kumbatayo kaa yugo gaani tambuahe tipaha. Ani rengbe ka mangaha wo ni geda ani ziazia afugoho na kini berẽkuriihe. Wa ani nikaa mangaha wo, ani ima rengba kadu na gu kido nga Baenge kehe nika fu maku afu kurii gu ome ani amangaha na ani “ki bi gu inahe nga ga Mbori.”—Snz. 2:5.