“Oni dú na Rugatise ki Ningere!”

1. Ginipai Yesu apehe fu gako abawiriki nibipa digida rago, na gini zahe ko afuhe fuyo?

BETE auru mbata fu Yesu kpi, gako abawiriki biama asanako nga: “Gine i ka ina . . . pa digida rago” ti ni? (Mt. 24:3) Si wa ka i ya agu abawiriki re asanahe tipa wai rengbe yo ka ino gu regbo i nika gbarasa Yerusarema na yekaru ti ni. Rogo ga Yesu karagapai yo, ko aafuranga sa tipa kina pa gbarasa Yerusarema na gaha yekaru te, ono ko afura a tipa “pa digida rago” nga gu ani araka ti ni re. Nibipa digido rago, Yesu aya: “Boro aina nga gu uru na gu saa wa sa te, amaraika ngbangbaturũ yo i aina nga ha te, Wiri aina nga ha a te, kina Mbori nga Ba ini he sa.” Na ko afu zahe fu gako abawiriki dunduko nga, “oni ngére angera.”—Mk. 13:32-37.

2. Tipagine si aaida agu aKristano naaraka rogo bambata sa kama agarã nangera angera ti ni kindi?

² Si aaida agu aKristano nangia aYudo nadu rogo bambata sa kama agarã nangera angera kindi tipa ka batasa ungayo. Yesu ape gupai fu apefuoko si aidi i ningere tipaha nibipa gbarasa Yerusarema na yekaru. Ko aya: “Ho oni ka bi Yerusarema ni i nikisi he kirikiri na aboro vura, oni ki ini he, ya rago gbarasa ha mbedi.” Ti gu regbo re si aaida i mangipai kuti ga Yesu zahe na “ki oro ku abaagangara yo.” (Rk. 21:20, 21) Agu aboro namoiberã yo ti gu regbo re kuti gu zahe re aima bata ti gu regbo aRomo agbarasi Yerusarema.

3. Ginipai ani nika sakapai tipaha rogo gi kekeapai re?

³ Areme, ani naraka ti gu regbo gi gbegberẽ sinoraka re naima mbeda ka digo ti ni. Si naida ani du na rubangirise a na kini ngere angera kindi. Rogo gi kekeapai re, ani nika sakapai tipa wai rengbe ani kadu na ruru bipai nibipa agu apai namanga rogo zegino, na wai rengbe ani kadu na ruru bipai tipa tirani na kini mangisunge wenengai na gu yangada regbo nye koyo.

MO DU NA RURU BIPAI HO MO ABI AGU APANGBANGA NI NAMANGA ROGO ZEGINO

4. Tipagine si aida ani du na nyemu ka bi wai ti ni agu apai namanga rogo zegino adigiso gu sangbaanebi nga ga Baibiri?

⁴ Wene nduapai kinaho du ani ti ni na nyemu ka bi agu apai namanga rogo zegino areme wa si adigiso sangbaanebi. Ni kpiapai, Yesu ape pa agu apai furani nga gu nika undo rani tipa ani ini gupai nga digido gi sino raka nga ga Satana re ima mbeda. (Mt. 24:3-14) Gu mokedi nangia Petero angarasi rani tipa ani moiberãrani tipa ka ino wai sangbaanebi adigisotihe na tipa si nyakasi gaani idapase. (2 Pet. 1:19-21) Gu yangada kitabu nga ga Baibiri tona na agu afugo nga: “Gu yugoti nga ga Yesu Kristo, nga gu Mbori afu he fu ko ko yugu he fu gako amoyambu, nga agu apai nikamanga mbembedi.” (Yugo. 1:1) Sidu, ani na nyemu ka ino agu apai namanga areme rogo zegino tipa ka ino wai agi apai re adigiso gu sangbaanebi nga ga Baibiri. Na ani ima rengba kadu regerege ka saka gipai re na gu kura aboro.

5. Ginipai si aida ani nehe, ono ginipai si aida ani mangihe? (Oni bi asura a.)

⁵ Ho ani asakapai ni tipa gu sangbaanebi nga ga Baibiri, si aidanga ani naaberã gupai rirani yo nga gu rengbe ka manga te. Tipagine? Bambiko ani aidanga ka pe gupai nika ye na kparakaro kurogo dungurati te. Ni kpiapai, ani ima rengba ka gia abazogo i ni fura tipa wai rengbe yo ka nyasariipa kura kpakarapai na ki ye na zereda na ngbabase. Kuba gupai nga ani tona kaa berã gupai nga agu afugo re na digiso gu sangbaanebi du rogo 1 ATesaroniko 5:3, si naida ani ini gu vovo apai i nakusihe. Ho ani maa mburu agu apai ni ani apehe riimburu agu awaraga ga Yekova riigbu nakusihe, ani naundo dungurati si du ni kodikodihe “na rugatinapai sa.”—1 Kor. 1:10; 4:6.

6. Gini apai rengbe ani ka wirikaha rogo 2 Petero 3:11-13?

⁶ Oni gedi 2 Petero 3:11-13. Gu mokedi nangia Petero naundo rani ani du na ruru bipai ho ani awisigo gu sangbaanebi ni nga ga Baibiri. Ko nazungodi rani ani “ngere tipa ye gu uru nga ga Mbori.” Tipagine? Anga si tipa gupai nga ani naˈasada ka ino “gu uru na gu saa” Yekova nika ye na Aramegido ti ni te, ono ani naida ka mangasunge na gu sa nye koyo “tipa manga ziazia apai na sinombori.” (Mt. 24:36; Rk. 12:40) Ka pepai rogo kura fugo yo, si naida ani mangipai ngba ruru gene na ki bihe nga agu apai ani amangaha dunduko fu Yekova si tipa gupai nga ani ima kpinyemu ko ni bakerehe. Tipa ka manga gipai re, si naida ani bandatirani.

GINIPAI PA BANDA ANI TIRANI AYUGOHO?

7. Waigu ani ayugoho nga ani nabanda tirani? (Ruka 21:34)

⁷ Yesu ape gupai fu gako abawiriki nga ka i gbenga berã yo sa kina kuti agu apai namanga rogo zegino ya, ono si naida i gbeberãyo kuti ti yo a. Gipai re ni yuguyuguhe gbayaga rogo gu zahe du ni kekehe rogo Ruka 21:34. (Oni gedihe.) Oni bingo afugo Yesu: ‘Oni bánda tironi.’ Gu boro nabanda ti ni na rubangirise tipa ai gu gbegberẽ apai rengbe ka gbarasa gaani pagume na Yekova na ni naasada ka ne agu apai rengbe ka gbarasa gaani pagume na Yekova. Rogo gi gene re, ni nabanda ti ni rogo gu nyemuse yo nga ga Mbori.—Snz. 22:3; Yuda 20, 21.

8. Gini rugute gu mokedi nangia Pauro afuhe fu aKristano?

⁸ Gu mokedi nangia Pauro ape gupai fu aKristano nga i bandatiyo. Ni kpiapai, ko ape gupai fu agu aKristano naadu Efesa yo nga: “Si du ka oni angéra angera wenengaĩ ti ni wa oni nata, wa zanga tatamana te, wa kina iratatamana.” (Ef. 5:15, 16) Satana ti aregbo dunduko naasada ka gbarasa gaani pabakure na Yekova, sidu, Baibiri naruga rani nga ani ‘ruga tirani na gu he Gbia akpi nyemu he’ wa ka ani banda tirani be agu azubohe nga ga Satana dunduko.—Ef. 5:17.

9. Waigu ani aruga tirani na gupai Yekova akpinyemuhe tipa rani?

⁹ Baibiri afuranga tipa agu apai dunduko nga gu rengbe ka gbarasa gaani pagume na Yekova te. Si naida ani naamanga diaberã dedede nibi pa agu apai i afuranga tipaha gbayaga rogo Baibiri yo ya. Tipa ka manga gu diaberã nga ga tatamana, si naida ani rugutirani na pa “gu he Gbia akpi nyemu he.” Ani rengbe ka manga gipai re ni geda ani Fugo Mbori dedede na kini berẽkuriihe. Ka ani aasada ka ino gupai Yekova akpinyemuhe na ki asadi kadu na “ga Kristo berã ti rani,” si nawiraha wa kinawo a ani nikaa ta wa “iratatamana,” zavura ho ani adunga ni na agu arugute du gbaiga tipa agu apai si aida ani mangihe ya. (1 Kor. 2:14-16) Ti kura aregbo, si taata furani ani ini agu apai si aida ani nehe, ono ti kura aregbo, si taata te.

10. Gini kura kere apai duho si aida ani nehe?

¹⁰ Gu kura kere apai nga gu si aida ani nehe nakoda ba nyemu rani ti gu boro angianga gaani badiarogatise ya, bakere mbira buda, bakere riahe, gbegberẽ afugo, kodihe nabi agu ambaro nga ga zuu, bi kpia kundiri aboro, na gu kuraapai wa gure. (Tam. 101:3) Vurarani nga Bakitingbanga nagbata agu amamu dedede rengbe ko ka mangasunge na ni ka gbarasa gaani pabakure na Yekova. (1 Pet. 5:8) Ka ani adunga na rubangirise ya, Satana ima rengba ka rũ tunga kpihe, basasangba, ngbaduse, sogote, enda, na kpipai ku kpotorani yo na ngbadurani yo. (Gara. 5:19-21) Ti tonatonaha, mo ima rengba kaa bihe nga agi apai re gbegberẽpai ho du ti ni te. Ono ka ani amanganga pai niipo ka nyasa riipaha ya, si ima rengba ka sona ki da wakina gu ngua du na simi ti ni na si ki kusi gbegberẽpai.—Yak. 1:14, 15.

11. Gini kerepai si aida ani nehe, na tipagine?

¹¹ Gu kura kerepai sa nga, gbegberẽ abakure. Oni makianga gipai re. Oni namangasunge dedede na gu boro angianga Dezire Yekova ya. Mo naida na gupai nga gamo badiasunge du na ruru bipai tipa aDezire Yekova na mo kini tona kaa undo ni ngba wene gene. Oni ima rengba ka ri riahe nga ga bebere uru na gi boro re. Mbata fu mo inihe oni tona kaa rihe na ni dedede. Gu boro re tona kaa fura tipa wasiwasi mangaapai, ti tonatonaha, mo akaraganga pai kutini te. Tingbafuo bete regbo, wa mo agia agu afugo re dedede, si abanga gberãrago tiro berewe te. Na rogo kura uru sa gamo badiasunge yambu ro tipa oni mbiri wirihe tingbafuo sunge, na mo ki idi na ni. Niyangaraha, mo ima tona kaa berã awere wakina gamo badiasunge. Ane awere, si adianga gbanga regbo te mo ki tona kaa mangapai wakina gamo badiasunge. Rengo ngaha nga, ani nayugo wene sino na irisa koyo du aboro ni dunduko, ono oni tingidi gupai nga, ani ima rengba da wakina agu aboro ani adia regbo na yo. (1 Kor. 15:33) Ka ani du na rugatise na pai wa gu Yesu apehe, ani ima rengba ka ne kpamiatise na agu aboro arakanga kuti agu arugapai nga ga Yekova ya. (2 Kor. 6:15) Ani ima rengba ka bi kerepai na ki nehe.

ONI MANGISUNGE WENENGAI NA GAONI REGBO

12. Ginipai si aaida ga Yesu abawiriki naamangaha wa i aasungudo pa gbarasa Yerusarema na yekaru?

¹² Yesu aaida gupai nga gako abawiriki naamangasunge amanga kindi a wa i nikaa sungudo digido gi sino raka re. Yesu afu sunge fu gako abawiriki i namangaha. Ko afu zinahe fuyo i tungusi wene pangbanga “Yerusarema yo na Yuda yo a Somorona yo, na digida sende yo.” (Amo. 1:6-8) Gere angia bakere sunge Yesu afuhe fu apefuoko! Ni dia yo gayo regbo ka tungusapai fu kura aboro, i aamangasunge wenengai na gayo regbo.  

13. Tipagine si aida ani mangisunge ti ni wenengai na gaani regbo? (AKorosaio 4:5)

¹³ Oni gedi AKorosaio 4:5. Tipa ani du na rugatise, si naida ani bi wai ani amangasunge na gaani regbo. “Mamu” ima rengba kadu namaapai kurii ai boro dagba rani yo. (Batu. 9:11) Ani ima rengba ka kpi ti gu regbo ani aberãnga ha nga ani nika kpi ti ni ya.

14-15. Waigu rengbe ani ka mangasunge na gaani sa wenengai? (AEbere 6:11, 12) (Oni bi sura a.)

¹⁴ Ani ima rengba ka mangasunge na gaani regbo wenengai ni manga ani sunge fu Yekova na kini nyakasi gaani pabakure na ko. (Yo. 14:21) Si naida ani du “nyanyaki, zanga wo, nimángi ga Gbia sunge zaza dedede.” (1 Kor. 15:58) Gu regbo gaani sino raka nika nyasa—watadu gi gbegberẽ sino raka ani araka rogoyo re nika digo ti ni—ani adunga na gberãrago tipa mangasunge na gaani regbo fu Yekova te.—Mt. 24:13; Rom. 14:8.

¹⁵ Areme, Yesu nandu kumbatayo kindi kaa fu rugapai fu gako abawiriki a wa i atungusapa ga Mbori Kindo rogo zegino dunduko. Ko ima digiso gako kidohe. Vurube gaani adunguratise na rogo gaani awaraga yo, Yesu nayugo wai furani si aida ani tungusi wene pangbanga. Ko nafu agu ahe furani dunduko ani aidaha tipa ka manga gu sunge re. (Mt. 28:18-20) Ani namanga gupai Yesu aidaha berani ni manga ani sunge nyanyaki ka tungusapai, kini yugupai fu aboro, na kini ngere angera kindi wa ani asungudo Yekova ko ye na digido gi sino raka re. Ni manga ani pai kuti agu arugute du rogo AEbere 6:11, 12, ani nika zada gaani maabangirise “dati kina digida rame.”—Oni gedihe.

16. Ginipai ani nadi berã ka mangaha?

¹⁶ Yekova ima sia gu uru na sa ko nika gbarasa gi ga Satana zegino re ti ni. Ho gu regbo re nika da ni, Yekova nika digiso gu sangbaanebi dunduko du tipa vovo zegino nga gu du ni kekehe rogo Fugoko yo. Ono tigu kura aregbo, ani ima rengba ka berã gupai nga digido gi zegino re ayengo awere te. Ono tie, ga Yekova uru “aíma nga te!” (Abak. 2:3) Ani di nga berã adia tie kaa “angéra koyo du Yekova ni,” na kaa ‘súnguda Mbori nga gaani bata.’—Mika 7:7.