Oni Wiriki Kpia Wai Yesu Anaangera Angera Kindi

“Oni ngére ki nikpari.”—MT. 26:41.

GAONI KARAGAPAI NGA GINE?

Wai gu rengbe gaani kparakpee ka yugo gupai nga ani nangera angera kindi?

Ngba gini agene rengbe ani ka yugo gupai nga ani nangera angera kindi rogo gaani sunge tungusapai yo?

Tipagine duhe ti ni ninyanyakipa pai nga ani naangera angera kindi ho du ani ni rogo aʹasada, na wai gu rengbe ani ka mangaha?

1, 2. (a) Gini ngbatunga asanahe rengbe boro ka sana tiní nani tipa ga Yesu kpiapai nibipa wai ko anaangera angera kindi? (b) Ya mo gu rengberengbe kpiapai nga ga Yesu rengbe ka undo kpakpa aboro? Oni funga kpiapai tipa gipai re.

ONI rengbe ka bakabangironi nga: ‘Ya mo boro rengbe nzunzu ka wirika Yesu wai ko anaangera angera kindi? Ko adu nirengberengbeko! Na gu kurapai berewe nga ko adu na rengba beko ka ino gupai narengbe ka manga kumbatayo zavura tifuo akutu agarã! Ya mo boro ndupai aduho tipa ko naangera angera kindi?’ (Mt. 24:37-39; Eb. 4:15) Ani sakingo pai mbataano tipa agu asanahe re, si nika undo rani ani bi wai duhe ninyanyakipa pai ani naangera angera kindi.

² Ya mo gu kpiapai nga ga rengberengbe boro rengbe ka undo kpakpa aboro? Ii, si ima rengba ka undo bambiko boro ima rengba ka wirikapai be wene bayugupai na gani kpiapai. Nikpiapai, oni berẽnga pa gu boro nawirika zumo guanza. Ní arengbanga ka dia ru nibasa ki zumu ru kina kurogo gu ba ní aida u ndu kurogoho te, ono ní natona kaa wirika zumo ru tooni tooni. Tipa ka ino zumo ru wenengai, gupai ní amangaha nga kaa ngana gani bayugupai du nga wene bazumu guanza. Ní nagbe berãni kuti wai gu wene bazumu guanza re aru, wai ní azada mboto, na wai ní amangasunge na wiri abeni ti giri mboto. Fuo bete regbo ngbutuko, ní ki ini gu ome si aidaha tipa ka gbe giri mboto; ní kini berẽpa wege a, na ní kini mangi ome kindi tipa ka ino zumo ru kina boro kurogo gu ba ní aida u ndu kurogo. Ka ní awirika gu boro nayugo zumo mboto funi re, ní nika wirika wai ka zumo ru wenengai. Wakina gure a, ani namanga ome ka da niwene aKristano nipeka ani fuo ga Yesu arugute na niwirika ani gako wene kpiapai.

3. (a) Ginipai Yesu agumbaha ka yugo gupai nga si aaida ko niingere angera kindi? (b) Ginipai ani nika fura tipaha rogo gi kekeapai re?

³ Na ginipai tigaha du tipa gupai nga kaa ngera angera kindi? Ya mo boro ndupai aduho tipa Yesu naangera angera kindi? Ii. Nikpiapai, rogo ga Yesu yangara yuru auru kpotosende, ko agumba gupai fu gako ruru abawiriki nga: ‘Ani ngére na oni.’ Ko agumba gupai berewe nga: “Oni ngére ki nikpari, oni ka rima ku rogo asada.” (Mt. 26:38, 41) Wa si avura du nga ko anaangera angera kindi, boro ti gi kere regbo re ko aaida ka mangaha wo gbe na kidu mbembedi na Bako. Ko aima ino gupai nga si aaida apefuoko niingere angera kindi, angianga kina ti gu regbo re sa ya ono kumbatayo a. Ani sakingo pai tie tipa ndu gupai Yesu aida gupai ti ni nga ani naangera angera kindi. Tifuo gure, ani nika wisigo agene biata nga gu rengbe ani ka wirika ga Yesu kpiapai ngbaha rogo gaani raka yo.

NDU GUPAI YESU AIDA TI NI ANI NAANGERA ANGERA KINDI

4. Tipagine si aida ani naangera angera ti ni kindi?

⁴ Niwiri guruhe, Yesu naida ani naangera angera kindi mbiko gupai ini anihe na gupai ani ainongo ho ya. Ho Yesu adu ni auru kpotosende ane, ya mo ko aini agu apai dunduko naadu kumbatayo? Oó, ko agumba gupai nga: “Ono boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Mt. 24:36) Ti gu regbo re, Yesu nga “Wiri” ainongo boro gu regbo digido gi zegino re nika ye ti ni te. Ginipai du tipa rani areme? Ya mo gu inohe du ani nani tipa agu apai du kumbatayo nikina wiri toonihe gbua? Ii, si nikina wiri toonihe gbua! Ani ainongo boro gu regbo Yekova nika keda Wiriko ko ye ka nyasa riipa gi gbegberẽ zegino re ti ni te. Ka si nidu nga ani ima inoho, ya mo ka ndupai duho tipa ani naangera angera kindi? A wa Yesu agumbaha, digido gi zegino re nika ye wakina ikpirogumba, zanga boro inihe; sidu, si naida ani naangera angera kindi.—Oni gedi Matayo 24:43.

5, 6. (a) Wai gu pa ino ani gupai nika manga kumbatayo gbiati ga Mbori aringbisapai asa gupai nga ani naangera angera kindi? (b) Tipagine si aida gupai ini anihe tipa Satana sa rani ti ni ani naangera angera kindi?

⁵ Yesu aima ino dungu weneapai nga gu naaye ka manga kumbatayo, nga agu apai agu aboro naadu patiko ainongo ho ya. Gaani inohe ambedanga na ga Yesu kandara tooni te, ono ani nafu tambuahe fuko mbiko ko sa gupai nga ani ini dungu apai tipa ga Mbori Kindo gbiati agu apai si nika mangaha barambeda. Ho ani angera ni pati rani singia sukuru yo, basunge yo, rogo agu adagbarago ani atungusapai rogoho, ya mo ani abingo agu aboro du rogo bakere bitimo mbiko i ainongo agi arengo re te te? Si nga gu kura ndupai si aida ani naangera angera ti ni kindi. Wakina Yesu, si naida ani naangera angera kindi tipa amomu tipa ka gumba gupai ini anihe tipa ga Mbori Kindo fu kura aboro. Agu amomu dunduko ani agbiaha na nyanyakipaha na ani aidanga ka gbarasa paha te. Ga aboro raka ngbapai!—1 Tim. 4:16.

⁶ Yesu aima ino gu kurapai berewe nga gu nasako ko naangera angera kindi. Ko aima ino gupai nga Satana aima diaberã tipa ka asadako, ka rungosi ko, na ka kuo gako kakuti ruru mangaapai. Gu kare re anaangera angera kindi tipa wene ‘regbo’ tipa ka asada Yesu. (Rk. 4:13) Yesu anaangera angera kindi. Ko aima mbakada tiko tipa apai dunduko, singia aʹasada watadu arungosi. Anga kina gu bangisapai re du tipa rani te? Ani ima ino gupai nga ‘wai bahu nata ki nipoi, nigbata boro ka rita ni, kina wo vurarani nga bakitingbanga ata.’ Si nga ndu gupai Ziazia Kekeapai azinahe ti ni fu aKristano dunduko niyaa: “Oni dú na rugatise ki ningere.” (1 Pet. 5:8) Ono wai gu rengbe ani kadu na rugatise na kini ngere angera kindi?

WAI KPARAKPEE AUNDO RANI ANI NAANGERA ANGERA KINDI

7, 8. Gini rugute Yesu afuhe nibipa kparakpee, na gini ngbatunga kpiapai ko amoihe?

⁷ Ziazia Kekeapai nayugo gupai nga kparakpee nga nyanyakipa he ka ani aida kaa ngera angera kindi. (Koro. 4:2; 1 Pet. 4:7) Ngbutuko tifuo Yesu gumba gupai fu apefuoko nga i naangera naako, ko ayaa: “Oni ngére ki nikpari, oni ka rima ku rogo asada.” (Mt. 26:41) Ya mo ko afu gu rugute re sa fuyo tipa gu kerepai i adu rogoho? Oó, gu rugute ko afuhe re nga gu rugute si aida ani naaraka kutini naʹauru dunduko.

⁸ Yesu amoi wene kpiapai rogo kparakpee yo. Oni natingidaha atingida nga regbo adu kinaho ko amangi kparakpee fu Bako yuru sasasa. Ani asadingo ka makia gupai re. (Oni gedi Ruka 6:12, 13.) Gere awere nga Yesu pati gu gbata nga Kaparanauma aboro ninaaba atĩo rogoho. Wa rago abiso, Yesu dakpa kurii gangara sa pati gu Baime nga Gariraya. Wa rago abiso, isoke, ko nabi wiri awee abi si nikiki ku Kaparanauma yo na rogo agu agbaria du barambeda ho. Ono fuo tona ko kaa fura na Yekova kindi, ko gbe berãko kina kuti kparakpee. Asaa nasusa. Ko amaanga berãko ka bi wai agu awee ninaakiko Kaparanauma yo abiso nibasasa watadu wai diwi andu kaa inga watadu gu woro anya napaa te. Ko nakpara tigaha tipa gu diaberã du fuko kumbatayo. Si naida ko sia aboro 12 nga aguyo nikangia gako amokedi. Ani ima rengba ka berã pa wai tigaha Yesu akusuko agu apai du ngbaduko yo fu Bako tipa agu amokedi re nibasasa dunduko na kini sana Yekova tipa ko ngbe fuko mbatayo na ki fu tatamana fuko.

9. Ginipai rengbe ani ka wirikaha ti ga Yesu kpiapai nibipa wai ko amangi kparakpee yuru sasasa?

⁹ Ginipai rengbe ani ka wirikaha ti ga Yesu kpiapai? Ya mo gupai ani awirikaha nga si naida ani naadia gbanga regbo kuti kparakpee? Oó, bambiko Yesu nitiko aima ino gupai naadu tipa gako amokedi na ki gumba gupai nga: “Mbisimoroni nakpi nyemu he ni rengo, bororoni anyaka nga ya.” (Mt. 26:41) Wa vura duhe wo, ani ima rengba ka wirika Yesu. Nikpiapai, ya mo ani naasana gu Barani du ngbangbaturũ yo mbata fu ani mangi gu diaberã nikadu na maapai kurii rani, gaani aborokporo, watadu akuarani aidipase rogo toro yo? Ya mo ani naakpara tipa akuarani aidipase? Ya mo ani naakpara kina boro ngbadurani yo kuba gupai gbua nga kaa dogoda kina bangisa afugo ti aregbo dunduko? Oni makia gupai a nga Yesu abi pa fura na Bako rogo gu ba waawaa aadunga rogoho ya na nyanyakipaha. Rogo gi zegino ani araka rogoho adunga regbo be aboro re ya, si rengbe kadu taata fu boro tipa bangiri ní go ti gupai nyaki paha kisusi. Ka ani adia regbo tipa kaa manga kparakpee ngbadurani yo, na rogo gu ba adunga waawaa rogoho ya, si undo rani aundo ani naangera angera kindi. (Mt. 6:6, 7) Ani mbedi ambeda koyo du Yekova ni, ki nyakasi gaani pagume naako na ki ne gupai rengbe ka rungburasi gu gaani pagume re.—Tam. 25:14.

GU GENE RENGBE ANI KAA NGERA ANGERA KINDI NGBAHA GENE TUNGUSAPAI YO

10. Gini kpiapai nayugo gupai furani nga Yesu anaangera angera kindi tipa amomu manga dezirepai?

¹⁰ Yesu anaangera angera kindi rogo gu sunge Yekova afuhe fuko ko naamangaha. Gu kura asunge kinaho boro narengbe arengba kaa mangaha berãni ki vura kaa ngbuo pati ni ka gbegberẽpai amanganga ya. Ono gu kura asunge kinaho si aidanga berã boro ngbuo pati ni ya, gu sunge tungusapai nga ga aKristano nga ngbatunga gu sunge re. Yesu anaangera angera kindi rogo gako sunge tungusapai yo, kini gbata amomu agbata kindi tipa ka tungusa wene pangbanga. Nikpiapai, ho Yesu na gako abawiriki adani rogo gu gbata nangia Sukara tifuo gbanga nduge, gako abawiriki andu ka ngbe riahe. Yesu asungu pati gu guga naadu rogo gu ba re tipa ka ongoda, ono ko aangera angera kindi tipa momu manga dezirepai. Dee boro Somorona aye tipa ka tu ime. Yesu aima rengba ka pi gako ka ra tooni watadu ko aima rengba ka zanga fura naari tipa kura nduapai. Ono tie, ko aima fura na gu dee re na ki mangi nyanyaki dezirepai nga gu naundo dungu aboro rogo gu gbata re. (Yo. 4:4-26, 39-42) Ya mo ani rengbe ka wirika ga Yesu kpiapai teketeke ningera ani ti aregbo dunduko tipa amomu ka gumba wene pangbanga fu agu aboro ani agbiayo ba agu apai yo ani naamangaha naʹauru dunduko?

11, 12. (a) Ginipai Yesu agumbaha fu agu aboro naidi ka gbe berãko ti gako sunge? (b) Wai gu Yesu ayugu zanga rõa kina kubani kisusi rogo gako sunge tungusapai yo?

¹¹ Ti kura aregbo, wene aboro aʹasadi ka gbe berã Yesu ti gako sunge. Rogo gu gbata nangia Kaparanauma, rago aima ngba ti aboro na gu iiriwoapai Yesu aamangaha na i ki idi gupai nga ko nye kina yo naayo. Pa gumbayo gupai nga Yesu nye kina yo naayo angianga gbegberẽpai te. Ono tie, gupai Yesu aye ka mangaha nga ka tungusapai fu “gu ingiingi akandoro nga ngbatunga aYisaraere,” angianga ka nye rogo bangisa gbata gbua ya. (Mt. 15:24) Sidu, ko aya fu agu aboro re wee: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Rk. 4:40-44) Si tie ziazia nga, Yesu afu gako raka dũ tipa sunge tungusapai. Ko ambunga he si gbe berãko kusayo ti gu sunge re te.

¹² Ya mo Yesu anaamanga kina sunge tungusapai ti aregbo dunduko ka regbo adunga berewe beko tipa gu kura apai ya? Ya mo ko afu tiko sa kina tipa sunge tungusapai ka gene adunga berewe beko wa ka ko inipai tipa agu apai naamanga aborokporo ya? Oó, Yesu amoi wene kpiapai rogo gu bangiriba yo nga ga zanga rõa kina kubani kisusi. Ko anaamanga kura apai amanga tipa kaa gbia ngbarago, na kini di regbo na abakureako a. Ko anaabi aborokporo na nyanyakipa yó, ko anaayugo rugatinapai tipa agu azingo gbiati kpakaraapai naagbiayo, ko adu a na nunga koyo du rukutu agude ni.—Oni gedi Marako 10:13-16.

13. Wai gu rengbe ani kaa ngera angera kindi wa Yesu na ki zanga rõa kina kubani kisusi rogo gaani sunge tungusapai yo?

¹³ Wa ani awirika wai Yesu anaangera angera kindi, wai gu rengbe ani ka yugo zanga rõa kina kubani kisusi? Si aidanga ani mbu gi zegino re si gbe berãrani ti sunge tungusapai te. Gu kura bawene abakurearani watadu agumerani kinaho rengbe ka gumba gupai nga ani di regbo tooni kuti sunge tungusapai watadu ani mangi ome tipa ka raka gu raka i aberãha nga si nga wene raka. Ono ka ani awirika Yesu, ani bi gaani sunge tungusapai wakina riahe. (Yo. 4:34) Gaani sunge tungusapai nambakada gaani pagume na Yekova na kini ye na ngbarago furani. Ono tie, wa vura duhe wo, si aidanga ani bengete tirani ti ahe dunduko mbiko sunge tungusapai te. Wakina Yesu, ani naida kadu na ngbarago na ki zanga rõa kina kubani kisusi wadu ani ni agu amoyambu nga ga “betedi Mbori” yó.—1 Tim. 1:11.

GU GENE RENGBE ANI NGBAHA KAA NGERA ANGERA KINDI TI REGBO AʹASADA

14. Ti agu aregbo ani agbiatirani na aʹasada, ginipai si aidanga ani mangihe ya, na tipagine?

¹⁴ A wa bi anihe, Yesu arugu aboro tipa i naangera angera kindi ti agu aregbo ko agbiatiko na aʹasada. (Oni gedi Marako 14:37.) Si naida ani wiriki ga Yesu kpiapai ho ani agbiatirani ni na arungosiro. Ho aboro agbiatiyo ni na aʹasada, dunguyo bangiriyo ago ti gu nyanyakipa rengo gumbayo ho rogo gu kitabu nga Asanza kina boro bara ue ki yaa: “Pai ho du ni ruru he bangiri boro, ono digida ha nga agu apai nga kina ga kpio.” (Asanza 14:12; 16:25) Ka ani akido kina kuti gaani berã gbe ho ani agbiatirani ni na kere kpakarapai, ani ima rengba ka maa tirani gbiati agu aboro ani akpinyemuyo ngbapai.

15. Ginipai rengbe gu bariikporo nasota ka ngerafuo gaani aborokporo rogo borose yo ka mangaha ka si du nga zingo marã na ní wa pai?

¹⁵ Nikpiapai, si rengbe kadu nga si nimbumbuhe fu bariikporo ní ngerefuo “gani aboro kporo” rogo borose yo. (1 Tim. 5:8) Ní rengbe ka ida gu sunge nika sa gupai nga ní naakpa ti agu adunguratise nga ga aKristano, ti nungusa gu irisombori nga ga aborokporo, watadu ti sunge tungusapai dedede. Ka si du nga ní naberã tipa kina gupai ní aida ka mangaha, ní rengbe ka bihe nga pai ho gberẽ ti manga ní gu sunge re te. Ono tie, si rengbe ka ye na kaza watadu kpio funi rogo toro yo. Gupai ka ngba gbe nga ní mangisunge na gu rugute du rogo Asanza 3:5, 6! Soromo agumba gupai yo nga: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.”

16. (a) Gini kpiapai Yesu amoihe nikido ko kuti gu tatamana nga ga Yekova kuba kido kina kuti gako tatamana nitiko? (b) Wai gu dungu abariikporo awirika ga Yesu kpiapai nga ga kido kuti Yekova ti agu aregbo du apai nimbumbuhe?

¹⁶ Ho Yesu agbiatiko ni na asada, ko aká ka kido kina kuti gako berãpai. Oni berẽnga kuriihe tigaoni! Gu kere tatamanatatamana boro naraki auru kpotosende ane aká ka kido kina kuti gako tatamana. Nikpiapai, ho Satana aʹasada ko ni, ko anaakaragapai dedede niyaa: “Si ni keke he ya.” (Mt. 4:4, 7, 10) Ko akido kuti ga Bako tatamana tipa ka diabe aʹasada, ki yugu gu umbasitise Satana nasogoho nikerehe na adunga tiko ya. Ya mo ani naamangaha wo? Gu bariikporo nawirika Yesu wai ko anaangera angera kindi, ní nambu Fugo Mbori si nungusi ní gbe ti agu aregbo du apai nimbumbuhe. Rogo zegino dunduko, dungu abariikporo namangaha kina boro wo. I namaa ga Mbori Kindo gbiati ziazia irisombori mbatayo rogo gayo raka yo, na mbatayo fu agu apai nga ga borose. Ngba gi gene re, i nangerafuo gayo aborokporo ngba wene gene. Yekova nafu maku kurii gu ome i amangaha tipa kaa ngerafuo agu azingo nga ga gayo aborokporo a wa Fugoko akidoho.—Mt. 6:33.

17. Ginipai nafõngbaduroniyo oni wiriki wai Yesu anaangera angera kindi?

¹⁷ Zanga kapa, Yesu nangia wene kpiapai nga ga gu boro nangera angera kindi. Gako kpiapai na bakere undo ti ni na nigu kpiapai rengbe arengba ka batasa unga. Oni tingidi gupai nga Satana naida oni ra rogo toro yo, gaoni idapase zere, ka gaoni irisombori dunga wenengai ya, na oni gberesi pa gaoni kakuti ruru mangaapai. (1 Tesa. 5:6) Ka oni mbunga ko ko du na diabese ya! Oni ningera angera kindi kina wai Yesu amangihe. Oni ningera angera kindi rogo kparakpee yo, rogo gaoni sunge tungusapai yo, na rogo gu gene oni amangapai ngbaha ti regbo aʹasada. Ka oni mangihe wo, oni nika raka gu raka du niwenehe, na ki gbia ngbarago rogo gi zegino napaya apaya re. Ka oni angera angera kindi, si nika sa gupai nga Yesu ye ki gbia gupai nga oni namanga gupai Bako akpinyemuhe zaaza ho ko nika ye ni tipa ka nyasa riipa gi gbegberẽ zegino re. Yekova nikadu na bakere ngbarago tipa ka fu mosoro furoni tipa du oni niruru roni!—Yugo. 16:15.

[Gu sura du ti kpewaraga 16]

Yesu atungusipai fu dee pati guga. Gini amomu oni naagbataha tipa kaa tungusapai naʹauru dunduko?

[Gu sura du ti kpewaraga 17]

Ho oni angera ni fuo gaoni aborokporo rogo agu apai yo nga ga toro, gure nayugo gupai nga oni nangera angera kindi