Waigu Rengbe Ani ka Nyakasa Gaani Idapase Kuti gu ga Yekova Kidohe du Tipa Vovo Zegino?

1-2. Ginipai si aida ani naamangaha wa ani asungodo vovo zegino?

ANI na bakere tambuahe nga Yekova kidohe nga ko nika dia gi gbegberẽ zegino re kusayo ki ye na ruru vovo zegino. (2 Pet. 3:13) Wa vura duhe nga ani ainongo gini regbo nzunzu gu vovo zegino re nika ye ti ni te, agu agopai duho nayugo gupai nga ani asungodo nga ho tipa gbanga regbo te.—Mt. 24:32-34, 36; Amo. 1:7.

² Wa du rago tie re, ka si vura du nga ani ima dia gbanga regbo kurogo rengo yo, ani dunduko si aida ani nyakasi gaani idapase kuti gu kidohe re. Tipagine? Bambiko zavura nyanyaki idapase ima rengba ka rungbura. Nirengo, gu mokedi nangia Pauro ape gupai tipa zanga idapase nga, si nga ‘gu ingapai ninaye dedede ka manga rani.’ (Eb. 12:1) Tipa ka zanga mbu gaani idapase si rungbura, si naida ani naafugö agu agopai dedede nga gu nayugo gupai nga vovo zegino nika yeaye nzunzu barambeda.—Eb. 11:1.

3. Ginipai ani nika sakapai tipaha rogo gi kekeapai re?

³ Rogo gi kekeapai re, ani nika sakapai tipa agene biata nga gu rengbe ka nyakasa gaani idapase kuti ga Yekova kidohe du tipa vovo zegino: (1) ni berã ani kurii pa ga Yesu motumo tumorii, (2) ni berã ani kurii pa ga Yekova ome, na (3) ni dia ani regbo kuti agu apai nga ga toro. Na ani nika sakapai tipa wai ga Yekova pangbanga fu Abakuka narengbe ka nyakasa gaani idapase areme. Ni bambataha, ani sakingo pai tipa agu apai nga gu rengbe ani kaa gbiatirani na ni awere nga gu naida na nyanyaki idapase tipa gu kidohe du tipa ye vovo zegino.

AGU APAI NAIDA NA NYANYAKI IDAPASE

4. Gini adiaberã naida na nyanyaki idapase?

⁴ Aˈuru dunduko ani amanga agu adiaberã naida na nyanyaki idapase. Ni kpiapai, ani namanga adiaberã nibipa agu apai nakoda pa agu aboro ani azio bakure na yo, aũngbarago, wirikapai nga ga sukuru, rogatise, agude, na sunge marã. Si naida ani sana tirani nga: ‘Ya mo gimi asiapai nayugo gupai nga mi na gu kido nga gi sino raka re gbua tipa bete regbo na barambeda ga Mbori vovo zegino nika dia baha? Watadu ya mo mi nasia ka manga kina agu apai agu aboro amangaha aidanga kuti gupai nga i rengbe ka raka nyeanye kindi ya?’ (Mt. 6:19, 20; Rk. 12:16-21) Ani nika manga wene adiaberã ka ani nyakasi gaani idapase kuti gupai nga ga Mbori vovo zegino ima mbeda ka ye.

5-6. Tipagine ani aida na nyanyaki idapase ti ni ti regbo fudifudiapai? Oni fu nga kpiapai.

⁵ Ani nagbiatirani a na agu aˈasada naida na nyanyaki idapase. Si ima rengba kadu nga ani nahi arungosiro, kere kaza, watadu gu kuraapai rengbe ka sa rani ani du na bakere gberãrago. Ti tonatonaha, ani ima rengba ka bihe nga ani ima rengba ka hi gaani akpakarapai. Ono dedede, akpakarapai wa gere ninaandu kumbatayo tipa gbanga regbo—sidu, si nikaa ida ani du na nyanyaki idapase tipa—ka hipai na kini irisi Yekova na ngbarago.—Rom. 12:12; 1 Pet. 1:6, 7.

⁶ Ti regbo aˈasada, ani ima rengba ka bihe nga ga Yekova vovo zegino ayengo berewe te. Ya mo gere nayugo gupai nga gaani idapase ima rungbura? Anga wo du he te. Oni bingo gi kpiapai re. Ho mai ana ni tipa dungu aposo, ani ima rengba ka berã gupai nga uru afaanga berewe te. Wakina gure a, ho du ani ni na bakere gberãrago, ani ima rengba kaa bihe nga vovo zegino aye nga te. Ono ka gaani idapase du ni nyanyakihe, ani ima ino gupai nga ga Mbori akidohe nika digiso tihe adigiso. (Tam. 94:3, 14, 15; Eb. 6:17-19) Ka ani du na ngbatunga gu kido re, ani nikaa ndu kindi kumbatayo kaa maa iriso Yekova ni bambatapai rogo gaani raka yo.

7. Gini ngbatunga aberãpai si aida ani banda tirani ti ni?

⁷ Oni bingo gu kura bangiriba nga gu si aida na nyanyaki idapase rogoyo—sunge tungusapai. Dungu agu aboro ani atungusapa gu “wene pangbanga” fuyo du tipa ye ga Mbori vovo zegino nabihe nga ka gupai re mangingo te. (Mt. 24:14; Yeze. 33:32) Si naida ani du na rubangirise ki zanga du na kapa wa gu du yo na ni tipa agu apai Yekova ayugoho furani. Tipa ka zanga mbu gipai re si mangi, si naida ani naandu kindi kumbatayo kaa nyakasa gaani idapase. Ani bingo agene biata nga gu rengbe ani ka manga gipai re ngbaha.

ONI BERẼKURIIPA MOTUMO TUMORII

8-9. Waigu pa berã ani kuriipa motumo tumorii narengbe kadu na maapai kurii gaani idapase?

⁸ Gene sa rengbe ani ka nyakasa gaani idapase ngbaha nga, ni berã ani kuriipa motumo tumorii. Motumo tumorii nafu gu kido furani nga ga Mbori akidohe nika da ada nirengo. Ho ani aberã ni dudunguro kuriipa gupai i afu motumo tumorii ti ni na agu apai si akodihe, ani nanyakasa gaani idapase kuti gu ga Mbori kidohe nga ga raka nyeanye kindi rogo bawene zegino nga si nika digiso tihe adigiso. Tipagine ani pehe ti ni wo?

⁹ Sidu, motumo tumorii akodi gini apai? Yekova akedi bambata Wiriko, nga gu boro i aima mbeda na ni gbe, ko ye ngbangbaturũ yo ku auru kpotosende no i vunguko ni rengberengbe boro. Ho Yesu adu ni auru kpotosende, ko ahi dungu ngbatunga akpakarapai. Ko arungo na ki kpi kere iigirã kpio. Nairiwo gu nyanyakipa he Yekova afuhe re! Gaani Mbori nyemuse aarengbanga ka mbu Wiriko ko ye ka rungo na ki kpi tipa ani raki wene raka nga gu nika du ni wiri guruhe te. (Yo. 3:16; 1 Pet. 1:18, 19) Bambiko wa Yekova afu nyanyakipa he nga Wiriko ko ye ka kpi tipa ka undo rani, Yekova nika bi gupai nga ani ima du na rengba ka raka nyeanye kindi rogo vovo zegino.

ONI NAABERÃ KURIIPA GA YEKOVA OME

10. Ringbisihe kuti AEfeso 3:20, ginipai du Yekova na rengba ka mangaha?

¹⁰ Gu ue gene rengbe ani ka nyakasa gaani idapase ngbaha nga berãkuriipa ga Yekova ome. Ko na ome tiko ka manga agu apai dunduko ko nakido pa mangaha. Rengo ngaha nga, dungu aboro areme nabihe nga ka ani raki nga nyeanye kindi rogo vovo zegino te. Ono dedede, Yekova nakido pa manga agu apai ka wiri aboro amanganga ha ya. Ko ima rengba ka manga ai pai bambiko ko nga gu Mbori Du na Tanduapai Dũ. (Eyo. 42:2; Mk. 10:27) Sidu, ngbarani azeranga ka bi gupai nga ko namanga gi bawene akidohe re te.—Oni gedi AEfeso 3:20.

11. Oni fu nga kpiapai sa nga ga gu nyanyakipa akidohe Mbori amangihe. (Oni bi gu sanduki nga, “Bete gu Nyanyakipa Akidohe Nadigisitihe.”)

¹¹ Oni makianga bete agu apai Yekova Mbori akidopaha fu gako aboro bakuru kusayo nga gu aboro abihe nga si arengbanga ka manga te. Ko ape gupai fu Abarayama na Sara nga, i nika vunga kumbagude ngba gbinza yo. (Bam. P. 17:15-17) Ko ape gupai fu Abarayama a nga i nika fu ringara Kanana fu atita ko. Vuru gu dungu agarã yo atita Abarayama nangia aYisaraere adu ni akanga Ezipeta yo, si aima rengba ka ngera wa gu kidohe re adigisongo ti he te. Ono si aima digiso tihe. Kusa, Yekova ape gupai nga gu gbinza dee nangia Erizabeta nika vunga gude. Ko ape gupai a fu gu ngasudee nangia Maria nga, ri nika vunga Wiriko, si adu nga gipai re nika digiso gu kidohe Yekova amangihe dungu kutu agarã kusayo ati Edene yo!—Bam. P. 3:15.

12. Ginipai Yosua 23:14 na Yesaya 55:10, 11 akido rani na ni tipa ga Yekova ome?

¹² Ho ani aberã ni tipa agu akidohe dunduko Yekova namangihe na si ki digisitihe, ani naye ka ino pa gako bakere ome, na gaani idapase nada ni nyanyakihe. (Oni gedi Yosua 23:14; Yesaya 55:10, 11.) Gipai re naundo rani tipa ani mbakadi tirani tipa ka undo kura aboro i ini gupai nga gu kidohe nga ga vovo zegino, anga kungbo musumo gbua watadu kungbopai nga ha te. Yekova nitiko ape gupai tipa vovo ngbangbaturũ na vovo kpotosende nga: “Si nga ruru he nga rengo a.”—Yugo. 21:1, 5.

ONI MANGI AGU APAI NAMBEDISA RONI NA YEKOVA

13. Waigu rengbe agu adunguratise nga ga dungurati ka nyakasa gaani idapase? Oni sakingo rogoyo.

¹³ Gu biata gene rengbe ani nyakasa gaani idapase ngbaha nga, ka dia regbo kuti agu apai nga ga toro. Ni kpiapai, oni bingo wai ani agbia aundo ti gaani adunguratise nga ga dungurati. Anna, nga gu ri naima dia dungu bawe agarã kutingba dungu angbatunga sunge Kindo ti aregbo dunduko, ape gupai nga: “Dunguratise naundo re tipa mi naabanda gimi idapase si du ni nyanyakihe. Ka si vura du nga bagumbapai nga wene bayugupai te, watadu ni apenga vovo pai te, dedede, mi nagia gupai agia rengbe ka undo re mi gi rogo gu rengo yo nga ga Baibiri na gipai re nanyakasa gimi idapase.”b Na kina rengo ngaha nga, gaani idapase ima rengba kadu ni nyanyakihe ho ani adega turani ni kuti agu akaragapai nga ga awirina ti regbo adunguratise.—Rom. 1:11, 12; 10:17.

14. Waigu sunge tungusapai anyakasa gaani idapase?

¹⁴ Ani nanyakasa gaani idapase a ho ani andu ni gene tungusapai yo. (Eb. 10:23) Barbara, nga gu ri naima iriso Yekova tipa agarã naima susa 70 aya: “Mi aima bi gupai nga sunge tungusapai nga gupai nanyakasa idapase. Kina wai mi afura fu aboro tipa ga Yekova bawene akidohe, kinawo gimi idapase anyaka a.”

15. Waigu wisigopai nisase anyakasa gaani idapase? (Oni bi asura a.)

¹⁵ Gu kurapai kinaho berewe nanyakasa gaani idapase: wisigopai nisase. Susan ape gupai nga, ri nagbia bakere undo gbe ho ri amanga mbakadapai ni tipa ka wisigopai. Ri aya: “Rago Poso, mi naawisigo gu Ngbaõbambu Sinziri nga gu ani nika wirikaha rogo gu poso naye mbata yo. Rago Sa Sunge na Rago Ue, mi naambakada gu dunguratise nga ga bebere poso. Rogo gu yangara aˈuru re, mi naamanga wisigopai nisase.” Mbiko gupai nga Susan naamangapai kuti gari ringbisa regbo mangaapai, ri nandu kumbatayo kindi kaa me gari idapase. Irene, nga gu boro naima mangasunge tipa dungu bawe agarã rogo rii-basunge, bi gupai nga manga wisigopai tipa gu sangbaanebi nga ga Baibiri nanyakasa gari idapase. Ri aya, “Kina iriworago nati tire ka bi gupai nga ga Yekova sangbaanebi nadigisotihe na futufutuhe dunduko.”c

“SI AYÉ AYE NI RENGO”

16. Gu kidohe Yekova amangihe fu Abakuka, waigu duhe na rogoyo ti ni furani areme? (AEbere 10:36, 37)

¹⁶ Bete gu kura ga Yekova amoyambu aima digo nisungudi digido gi sino raka re tipa gbanga regbo. Kura aboro naberã gupai nga pa digido gi zegino re naima nikerehe. Ono Yekova ima ino wai gako amoyambu abi apai, na nirengo, ko akido gu nebi nangia Abakuka nga: “Yuguyugupai nasunguda ragoho kindi; si naipisa tihe sa digidaha–si aré nga zire te. Ka si du wa si ayé yee, mo súngudi he; si ayé aye ni rengo, si aíma nga te.” (Abak. 2:3) Ya mo Mbori afu gi kidohe re sa tipa kina gu undo nga ga Abakuka? Watadu ya mo Gako afugo na rogoyo ti ni areme furani? Yekova afu rugapai fu gu mokedi nangia Pauro ko mangisunge na agu afugo re fu agu aKristano nasungodo vovo zegino na nyemuhe. (Oni gedi AEbere 10:36, 37.) Ani ima rengba kadu na gu kido nga, ka ani vura kaa berã gupai nga ga Yekova kidohe tipa ka batasa rani nadia gbanga regbo adia tipa ka digisotihe, “si ayé aye ni rengo, si aíma nga te.”

17. Waigu kura wirina sa amangipai kuti gu rugute Yekova afuhe fu Abakuka?

¹⁷ Dungu ga Yekova amoyambu ima mangapai kuti gu rugute nga “mo súngudi he”—tipa dungu bawe agarã. Ni kpiapai, Louise atona iriso Yekova rogo 1939. Ri aya: “Mi aaberã gupai nga, Aramegido nika ye mbata fu mi nyasi sinia (secondaire). Si aamanganga te. Tipa dungu agarã, geda agu apangbanga du tipa agu aboro nasungudi Yekova tipa ko digisi gako kidohe ima undo re tipa mi nisungudi Yekova ko digisi gako kidohe—mi naagedapai tipa Noa, Abarayama, Yosefa, na gu kura aboro nasungudi tipa gbanga regbo mbata fu i gbia gayo mosoro be Yekova nga gu ko akido paha. Pa ida mi ti aregbo dunduko kuti gupai nga, agu akidohe re nika digiso tihe adigiso ima undo re gbiati gu kura aboro mi du na gu kido nga vovo zegino ima mbeda gbe ka ye.” Dungu agu aboro naima iriso Yekova tipa gbanga regbo ima ida kuti gipai re!

18. Waigu rengbe pa bi kusikusi ahe ka nyakasa gaani idapase tipa ye vovo zegino?

¹⁸ Rengo ngaha nga, vovo zegino ata da nga te. Ono tie, oni berẽnga pa agu ahe du ane—akerekuru, angua, anya, gbiati akuaroni aboro. Boro ho rengbe kadu na kapa nga agi ahe re nga ndikidi ahe te te, wa vura duhe nga gu kura regbo adu kinaho agu ahe re adunga ti ni ya. Agi ahe re ane bambiko Yekova nakusihe. (Bam. P. 1:1, 26, 27) Gaani Mbori ima kidohe nga ko nika ye na vovo zegino. Ko nika digiso gu gako kidohe re adigiso. Rogo vovo zegino, aboro nika gbia ngbarago ti raka nyeanye kindi na wene kpotoyo. Ani ima rengba kadu na gu kido nga, vovo zegino nika ye aye ti gu regbo Mbori nasia ha si ye ti ni.—Yes 65:17; Yugo. 21:3, 4.

19. Waigu rengbe oni ka nyakasa gaoni idapase?

¹⁹ Wa du rago re, oni mangingo agu apai amanga dunduko rengbe oni ka mangaha tipa ka nyakasa gaoni idapase. Oni du na tambuahe tipa motumo tumorii ti aregbo dũ. Oni berẽkuriipa ga Yekova ome. Oni nimangi agu apai nambedisa roni na Yekova. Ni manga oni he wo, oni ima rengba kadu dagba aguyo yo “du ni adikumbo akidohe mbiko idapase na hipai.”—Eb. 6:11, 12; Rom. 5:5.