Ka mo Mbunga ai Pai si ká na mo ti Zio Bapatiza Ya

1. Gini wene nduapai duho si aida mo zi bapatiza ti ni?

YA MO mo nakpinyemu Yekova, nga gu boro niima fu wene agamahe foro, kodihe na unga nitihe? Ya mo mo naida ka yugo gamo nyemuse fuko? Gu bawene gene rengbe mo ka mangaha ngbaha nga, ni kpara mo tiro fuko na ki yugu gamo kparatise ni zio mo bapatiza rogo ime. Ho mo amangaha ni wo, mo nada ni papara ga Yekova aborokporo. Ni sangbanaha, Bamo na ni Bakureamo nika ngbe foro kumbatayo bambiko wa mo nika du ni gako boro. (Tam. 73:24; Yes. 43:1, 2) Berewe a, ho mo akpara gamo raka ni fu Mbori na ki zi bapatiza, mo nadu na gu maabangirise nga ga raka nyeanye kindi na ngbarago.​—1 Pet. 3:21.

2. Ginipai ani nika sakapai tipaha rogo gi kekeapai re?

² Ya mo pai ho naká na mo ti zio bapatiza? Kangia wo duhe, mo nisaro te. Mbata foro, dungu amirioni aboro kinaho si aaida i mangi aˈariapai ti gayo mangapai na gayo aberã tipa ka rẽ tipa bapatiza. I nairiso Yekova awere na ngbarago zaaza. Ginipai rengbe mo ka wirikaha be kura aboro nazi bapatiza rogo bambata sakama agarã? Ani nika sakapai tipa bete agu akpakarapai i agbiatiyo na ni na gupai rengbe ani ka wirikaha ti gayo kpiapai.

ABORO SOMORONA AZI BAPATIZA

3. Gini akpakarapai si awiraha wa kura aboro Somorona aima gbiatiyo na ni?

³ Aboro Somorona angia badona nga ga aboro pambori ti rago Yesu. Badungu aboro Somorona araki Yuda yo ku nodiyo. Mbata fu aboro Somorona rengbe ka zio bapatiza, si aaida i idi kuti agu apai dunduko du rogo Fugo Mbori yo na ki wirikipai ti ni. Aboro Somorona aidi kuti gupai nga, kina agu abuku gbua du bisue tona ti Bambata Pai kuti Pa Fu Rugute ni Ue he, na isoke Yosua nga gu buku naye be Mbori. Ono tie, aboro Somorona aaberã gupai nga Masiya nika ye ringbisihe kuti gu ga Mbori kidohe du rogo Pa Fu Rugute ni Ue he 18:18, 19. (Yo. 4:25) Tipa i rẽ ka zio bapatiza, si aaida i idi kuti gupai nga Yesu angia gu Masiya i akido pako. “Dungu aSomorono” namangi gupai re. (Yo. 4:39) Berewe a, mbiko gupai nga dungu gu bambata aKristano re angia aYudo, si aaida kura aboro Somorona aria gayo bipai aria tipa aYudo.​—Rk. 9:52-54.

4. Ringbisihe kuti Amokedi 8:5, 6, 14, waigu kura aboro Somorona amangipai kuti gupai Firipo aatungusaha?

⁴ Ginipai naundo aboro Somorona tipa i zi bapatiza? Ho gu batungusi wene pangbanga nangia Firipo atungusi “pa Kristo fu aboro” ni, kura aboro Somorona “aka kuti ga Mbori Pai” (Oni gedi Amokedi 8:5, 6, 14.) I aakánga ka degatuyo fu Firipo wa vura duhe nga ko angia Yudo te. Isoke, i aima tingidapa agu averesi nape gupai nga Mbori akparanga boro te. (Pa Rug. 10:17-19) I ki “mongo ye tuyo fu agu apai Firipo agumba” tipa Kristo, na ki idi kuti gu gopai nga Mbori du nakedi Firipo. Ko aamanga dungu iiriwoapai a wagu nga ka husa akaza gbiati do adaimona.​—Amo. 8:7.

5. Gini apai rengbe mo ka wirikaha be aboro Somorona?

⁵ Agu aboro Somorona re aima rengba ka ká ka wirika gupai Firipo aayugoho bambiko ko angia Yudo watadu i aagianga ngbatunga gu Yugopai re mbata te. Aboro Somorona aakeesa nga ka zio bapatiza tifuo i idi kuti gupai nga, gupai Firipo atungusihe fuyo angia rengo te. Gu pangbanga nga ga Baibiri nape gupai nga: “Ho i aidi pa Firipo ni wa ko atungusa wene pangbanga tipa ga Mbori ngbi na pa rimo Yesu Kristo, i ki bapatizi yo, akumba na ade a.” (Amo. 8:12) Ya mo mo idi kuti gupai nga Fugo Mbori nga rengo? Na ya mo mo idi kuti gupai nga aDezire Yekova ima wirika wai ka yugo gu nyemuse Yesu apehe nga i nika ino gako abawiriki ti ni? (Yo. 13:35) Sidu, ka mo gunde nga ka zio bapatiza ya. Mo ima rengba kadu na gu kido nga Yekova nika fu maku afu foro.

6. Waigu rengbe ga Ruben kpiapai ka undo ro?

⁶ Ruben nga guko naraka Germani yo, asono rogo gu ngbadimokporo nga ga aDezire Yekova. Ono tie, ho ko adu ni ni paranga, ko aainongo ho singia Mbori ti ni te te. Waigu ko adibe gako akapa? Ko aye ka bi gupai nga ko aadunga na inohe tipa gupai re te, sidu, ko adiberã tipa ka wirika badungu apai tipa gupai re. Ko aya: “Rogo gimi wisigopai nisase, mi aaida ka ino gupai nangia rengo na gupai nangia ziree. Si aaida mi mangi wisigopai bara dunguhe tipa gu yugopai nga ahe akuru nisaha.” Ko agedi gu buku nga Is There a Creator Who Cares About You? Gu buku re aima undo Ruben ni bakerehe. Ko ape gupai fu tiko nga, ‘Nina! Yekova nga ndikidi boro.’ Na ti gu regbo Ruben andu ku rii-basunge yo nga ga zegino, ko atona ka kpinyemu gu gaani riikporo nga ga awirina du ni kodikodi yo rogo zegino dunduko. Ho Ruben akaragatiko ni ku Germani yo, ko azi bapatiza ho garãko adu ni 17. Ka mo du na akapa tipa Mbori, Baibiri, watadu kurapai, mo mangi wisigopai rogo gaani awaraga. “Ndikidi inohe” ima rengba ka diabe gaani akapa. (Ef. 4:13, 14) Na wa mo nikaa gia apangbanga tipa gu nyemuse na kodatise du dagba ga Yekova aboro rogo apapara zegino na kini bi gu gopai re rogo gamo dungurati, gamo tambuahe tipa gaani aborokporo nga ga toro yo rogo zegino dunduko nika sona.

SAURA BORO TARUSEU AZI BAPATIZA

7. Ngba gini gene si aaida Saura aria gako berãpai?

⁷ Ani bingo gu kpiapai nangia ga Saura boro Taruseu. Ko aima wirikapai tipa gu ndiko nangia ga aYudo wenengai na ko ki ima du ni baworimo dagba aYudo. (Gara. 1:13, 14; Frp. 3:5) Ti gu regbo re, dungu aYudo aidi kuti gupai nga aKristano angia abasamungu. Sidu, Saura arungosi yo nikerehe. Ko aberẽ gupai nga ko aamanga gupai Mbori akpinyemuhe. (Amo. 8:3; 9:1, 2; 26:9-11) Ka Saura adu na idapase kuti Yesu na ki da ni gu Kristano niima zio bapatiza, ka si aima ida ko du na nyemu i rungosi ko.

8. (a) Ginipai naundo Saura tipa ko zi bapatiza? (b) Ringbisihe kuti Amokedi 22:12-16, waigu Anania aundo Saura? (Oni bi sura a.)

⁸ Ginipai naundo Saura tipa ko zi bapatiza? Ho Yesu afura ni fu Saura ngbangbaturũ yo, bakere imarago asa Saura ni iravurari. (Amo. 9:3-9) Ko agino riahe tipa aˈuru biata, na si nawiraha wa ko aima berã dudunguro kurii gupai namangiko re. Nirengo, Saura aima du na gu kido nga Yesu du nangia Masiya na apefuoko aamanga ndikidi pambori. Si nawiraha nga Saura aima du na bakere gberãrago mbiko gupai nga ko du naidihe tipa i imi Setefano! (Amo. 22:20) Ti digido arame biata, gu bawiriki rimoko angia Anania andu fuo Saura, ki husi gako vurari, na ki ngarasi ko tipa ko zi bapatiza zanga keesa. (Oni gedi Amokedi 22:12-16.) Saura adu na umbasitise, ki degetuko fu Anania, na ki zi bapatiza.​—Amo. 9:17, 18.

9. Gini apai rengbe mo ka wirikaha be Saura?

⁹ Apai kinaho rengbe ani ka wirikaha be Saura. Ko aima rengba ka mbu rukö watadu gunde be aboro si ká na ko ti zio bapatiza. Ono ko aambunga gupai re si mangi te. Saura adu na umbasitise na kidu na nyemu ka manga ariapai rogo gako raka yo tipa ka da ni pefuo Kristo. (Amo. 26:14, 19) Saura aima du na nyemu ka da ni Kristano wa si avura du vurũ nga i nika rungosiko arungosi. (Amo. 9:15, 16; 20:22, 23) Tifuo gako bapatiza, ko aandu kumbatayo kindi kaa kido kuti Yekova tipa ko undoko ko hi dungu aasada. (2 Kor. 4:7-10) I ima rengba ka asada gamo idapase watadu mo ima rengba ka gbiatiro na rungosiro ho mo nika zio bapatiza ni na ki da ni boro sa dagba aDezire Yekova. Ono tie, mo ima rengba kadu na gu kido nga Mbori gbiati Kristo nika fu gu undo afu foro ti aregbo dunduko mo nika idaha tipa ka nye niruru ro.​—Frp. 4:13.

10. Waigu rengbe mo ka gbia undo ti ga Anna kpiapai?

¹⁰ Anna asono Putu yo. Tingbafuo navungu Anna zi bapatiza, bari aidihe furi tipa ri tona wirika Baibiri ho garãri adu ni 9. Ono tie, ho gu kura agume ri ainihe ni nga ri nawisigo Baibiri na aDezire Yekova, i atona ka rungosi ri. Agu agumeri re aidi kuti gupai nga si nipa zee ka boro sa dagba gayo aborokporo mbu gu pambori atitayo adu rogoho. Ho garã Anna adu ni 12, ri asana ba ri ko idihe furi tipa ri zi bapatiza. Ko aaida ka inoho singia gari diaberã du nadu ni tiri watadu boro kinaho naasosoda ri tipa ri mangihe. Ri akaragapai fuko nga, “Mi ima kpinyemu Yekova.” Ba ri aidihe ri zi bapatiza. Tifuo ri zi bapatiza, agumeri aandu kumbatayo kindi kaa mangapai na ri ngba gbegberẽ gene. Kura gumeri sa ape gupai furi nga: “Gupai ka ngba foro nga mo naaraka wasiwasi gene raka na kini vugundö ti gu nga mo du ni boro sa dagba aDezire Yekova.” Waigu Anna adibe gupai re? Ri aya, “Yekova aundo re tipa mi du nyanyaki, na nina gbiati buba aima songoda re ni bakerehe.” Anna ni naake pa agu aregbo ake sande ni basasa Yekova aundo ri rogo gari raka yo. Dedede, ri naabi agu agene abi nga gu Yekova aundo ri ngbaha tipa gupai nga ka bangiri go nga ti wai Yekova naundo ri ya. Ka mo aagunde nga i nika rungosi ro, mo tingidi gupai nga Yekova nika undo ro aundo a.​—Eb. 13:6.

KORUNERIO AZI BAPATIZA

11. Ginipai naima rengba ka sa Korunerio ko naakeesa ti zio bapatiza?

¹¹ Ani ima rengba a ka wirika nyanyakipa apai ti gu kpiapai nga ga Korunerio. Ko angia barukurii aboro 100 dagba gu rikavura nangia ga aRomo yo. (Amo. 10:1.) Mbiko gipai re, badungu aboro aima rengba ka inoko rogo gu dagbarago re na dagba abasovura yo. Ko “anagama ahe agama fu aboro ni rengo.” (Amo. 10:2) Yekova akedi gu mokedi nangia Petero ko tungusi wene pangbanga fuko. Ya mo Korunerio aakeesa akeesa ka zio bapatiza mbiko wa aboro aima inoko?

12. Ginipai naundo Korunerio ko zi bapatiza?

¹² Ginipai naundo Korunerio tipa ko zi bapatiza? Ani nageda gupai nga “ko anagunde agunde ti Mbori na kpuko dũ.” Na Korunerio anaakpara fu Mbori dedede. (Amo. 10:2) Ho Petero atungusi wene pangbanga ni fu Korunerio, ko gbiati gako aborokporo aidi kuti Kristo na ki zi bapatiza nibasa. (Amo. 10:47, 48) Nirengo, Korunerio adu na nyemu ka manga ai ariapai tipa wa ka ko irisi Yekova kina sa na gako aborokporo.​—Yos. 24:15; Amo. 10:24, 33.

13. Ginipai rengbe mo ka wirikaha be Korunerio?

¹³ Wakina Saura, Korunerio aima rengba ka mbu gu bangiriba ko adu rogoho tipa si ká na ko ti da ni Kristano. Ono ko aambunga gupai re si mangi te. Ya mo si naida mo mangi bakere ariapai amanga rogo gamo raka yo tipa wa ka mo zi bapatiza? Kangia wo duhe, Yekova nika ngia gamo Mounda. Ko nika fu maku afu kurii gamo diaberã tipa ka irisoko ringbisihe kuti gu bangua arengo nga ga Baibiri.

14. Waigu rengbe mo ka gbia undo ti gu kpiapai nga ga kura wirina sa du Japan yo?

¹⁴ Si aaida wirina nga gu ko naraka Japan yo mangi ariapai amanga ti gako sunge tipa wa ka ko rẽ ka zio bapatiza. Ko angia bangerekurii gu sukuru aboro aima inoho wenengai nga gu naayugo wai fu aboro rengbe yo ka ambumbudo. Bangerekurii sukuru anaambakada ambumbudo kporo akpee yo na kini ngbembatayo rogo gu vugaahe nga gu pambori nga ga aBuda (Buddhist). Ono ho bangerekurii sukuru anaadunga ni na rengba kadu pati ni ya, gu wirina re anaandu tipa ka manga gu sunge vugaahe re kuba ko. Ono tie, ho gu wirina re awiriki gu rengo ni du tipa kpio, ko aini gupai nga ko arengbanga ka zio bapatiza ka ko aandu kindi kumbatayo kaa mangasunge vugaahe te. Ko adiberã tipa ka zanga vugaahe berewe. (2 Kor. 6:15, 16) Gu wirina re afura fu bangerekurii sukuru tipa gupai re. Sangbanaha angia gine? Ko adu na rengba ka banda gako sunge zanga ko ni rimisi tiko kurogo sunge vugaahe yo. Ko azi bapatiza tifuo ko wiriki Baibiri tipa garã sa.a Ka singia mo naida ka manga ariapai ti gamo sunge tipa ka sa ngbarago ti Mbori, mo du na gu kido nga, Yekova nika fu guhe afu foro du mo na zingoho gbiati gamo aborokporo.​—Tam. 127:2; Mt. 6:33.

ABORO KORINDA AZI BAPATIZA

15. Ginipai naima rengbe ka rugusa agu aboro nadu Korinda yo ti zio yo bapatiza?

¹⁵ Agu aboro naaraka rogo gu bagbata nga Korinda rogo bambata sakama agarã, adu na bakere nyemu aũzegino tiyo na kini raki wasiwasi raka. Dungu aboro yo nanaamanga agu apai Mbori aidanga ha ya. Sidu, si aima rengba kadu ni bakpakarakpakaraha fu agu aboro naaraka rogo ngbatunga gbata wa gure tipa i tona iriso Yekova. Wa si avura duwo, ho gu mokedi nangia Pauro andu ni ku rogo gu gbata re na ki tungusi wene pangbanga tipa Kristo, “aKorindo ki gi pai ki idi pa ha ni dungu yo, i ki bapatizi yo.” (Amo. 18:7-11) Fuoho, Gbia nga Yesu Kristo ki yugu tiko fu Pauro rogo yuguyugupai yuru ki ya: “Dungu aboro rogo gi bakporo re nga gimi yo.” Sidu, Pauro aandu kumbatayo kindi kaa tungusapai yo tipa garã sa na beberehe.

16. Ginipai naundo kura aboro Korinda yo tipa i zi bapatiza? (2 AKorindo 10:4, 5)

¹⁶ Ginipai naundo agu aboro nadu Korinda yo i zi bapatiza? (Oni gedi 2 AKorindo 10:4, 5.) Fugo Mbori gbiati gako ziazia toro du na bakere ome ti ni naundo yo i mangi bakere aˈariapai rogo gayo raka yo. (Eb. 4:12) Agu aboro nadu Korinda yo nga aguyo nagi wene pangbanga tipa Yesu adu na rengba ka mbu manga agu apai duwa kpibuda, dĩ, na azapaditise na akumba.​—1 Kor. 6:9-11.b

17. Ginipai rengbe mo ka wirikaha be agu aboro nadu Korinda yo?

¹⁷ Mo tingidi gupai nga, wa vura duhe nga si aaida kura aboro Korinda yo mangi bakere aˈariapai amanga, i aabingo ho nga gipai re ni kpakarakpakaraha tipa kada ni aKristano te. I amangi ome nyanyaki tipa ka ndu ngba fitikiri gene, ono nga gu nandu sa nyenye unga. (Mt. 7:13, 14) Ya mo mo nasota asota tipa ka diabe gbegberẽ sino watadu mangapai tipa wa ka mo rẽ ka zio bapatiza? Ka omero batingo ya! Mo zungodi Yekova tipa gako ziazia toro si undoro mo ká nyemu manga gupai du ni gbegberẽhe.

18. Waigu rengbe mo ka gbia undo ti ga Monika kpiapai?

¹⁸ Monika naraka rogo gu ringara nga Georgia, amangi ome nyanyaki tipa ka mbu wasiwasi afugo na ka mbu degaturi na kini bi gbegberẽ aũngbarago tipa wa ka ri mangi sonakumbatayo tipa ka zio bapatiza. Ri ape gupai nga: “Mbata fu mi zi bapatiza, mi agbia gu ome mi aaida na ni ka manga ariapai ni manga mi kparakpee fu Yekova. Yekova aima ino gupai nga mi aaida ka manga gupai nadu ni ruruhe, na ko anaaundo re ti aregbo dunduko na kini ngbe fere kumbatayo.” Monika azi bapatiza ho garãri adu ni 16. Ya mo amanga apai ho si aida mo mbuhe tipa wa ka Yekova idi na gamo iriso? Mo naandu kindi kumbatayo kaa sanako ko fu gu ome foro mo aida na ni ka manga ariapai. Yekova nafu gako ziazia toro ni bakerehe.​—Yo. 3:34.

GAMO IDAPASE IMA RENGBA KA TURÃ AGANGARA

19. Ginihe nika undo ro mo dibe agu akpakarapai du wakina bagangara? (Oni bi sura a.)

¹⁹ Mo du na gu kido nga Yekova ima kpinyemu ro na ko naida mo da ni papara gako aborokporo. Gipai re nga rengo ka mo vura kaa gbiatiro na kina gini apai vurũ rogo raka yo nga gu nasaha foro ni kpakarakpakaraha tipa mo zi bapatiza. Yesu ape gupai fu gako badona abawiriki nga: “Ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari; a nga pai sa ka gasi roni te.” (Mt. 17:20) Agu aboro nadu ho Yesu aape gipai re ni adu na Yesu tipa bete agarã gbua, sidu, gayo idapase aasona kindi. Ono Yesu akido yo na gupai nga, ka i sonosi idapase rengbe arengba, Yekova nika undo yo i dibe agu akpakarapai du wakina bagangara. Na Yekova nika undo ro a mo mangi kina gu bangisapai re!

20. Waigu agu akpiapai nga ga agu aKristano nadu rogo bambata sakama agarã na aguyo du ti gi gaani regbo re nga gu i nafura tipaha rogo gi kekeapai re nangarasi ro?

²⁰ Ka si dunga pai kinaho rogo gamo raka yo nga gu rengbe ka ká namo ti zio bapatiza, mo mangipai nibasa tipa ka diabehe. Mo gbia wasa na ome ti gu kpiapai nga ga agu aKristano nadu rogo bambata sakama agarã na agu aKristano du ti gi gaani regbo re. Gayo kpiapai ngarasinga ro angarasa na ki fõngbaduroyo tipa mo kpara gamo raka fu Yekova na ki zi bapatiza. Si nga gu bawene diaberã kisusi rengbe mo ka mangaha!