Mo du na Umbasitise ho Mo Aruganga Tiro ni na Kura Apai Ya

1. Gini tandu mangaapai Yekova afuhe furani, na tipagine?

YEKOVA akusi rani ngba iiriwo gene: Ani na rengba tipa ka berã, ka wirika vovo apai, na ka ino wai ka mangapai kuti gupai ani nawirikihe. Tipagine Yekova ambakadi rani ti ni ngba gi gene re? Ko naida ani gbia gu “inahe nga ga Mbori” na ki mangi agu adiaberã nga ga tatamana ringbisihe kuti gu inahe nga ga rengo wa ani nikaa irisoko.​—Snz. 2:1-5; Rom. 12:1.

2. (a) Ginipai si aida ani inihe tipa tirani? (Eyobo 37:23, 24) (Oni bi sura a.) (b) Tipagine duhe ti ni ni nyanyakipa pai furani ani rugutirani na gupai nga si aidanga ani inipai tipa apai dunduko te?

² Yekova akusi rani na gu tandu nga ga wirika dungu apai, ono kura badungu apai kinaho ani ainongo pai tipaha ya. (Oni gedi ARomo 11:33, 34.) Mo berẽnga kurii gu kpiapai nangia ga Eyobo. Yekova asana Eyobo na dungu asanahe nga gu naundo Eyobo ko rugutiko na gupai nga dungu apai adu kinaho ko aainongo ho ya. Gu fugodagbase na Yekova re aundo Eyobo ko ini gupai nga si aaida ko du na umbasitise na ki aria gako berãpai. (Eyo. 42:3-6) Si ni wenepai furani ani rugutirani na gupai nga ani ainongo apai dunduko te. Ho ani atingida gupai ni nga dungu apai gu du kinaho ani ainongo ho ya, si naundo rani ani du na umbasitise na kidu na gu kido nga Yekova dedede nika pe gupai furani si aida ani inihe nzunzu tipa ka manga wene adiaberã.​—Snz. 2:6.

3. Ginipai ani nika sakapai tipaha rogo gi kekeapai re?

³ Rogo gi kekeapai re, ani nika sakapai tipa gu bete apai ani ainongo ho ya na agu akpakarapai rengbe ani ka gbiaha ni sangbanaha. Ani nika wisigopai a tipa ndu gupai duhe ni wenepai ti ni nga ani ainongo gu kura apai te. Gupai ani nika wirikaha nika undo rani ani du na gu kido nga Yekova, nga “gu ko du ziazia rogo inahe,” nape agu apai furani dunduko si aida ani inihe.​—Eyo. 37:16.

ANI AINONGO GU REGBO DIGIDO GI SINO RAKA RE NIKA DA TI NI TE

4. Ringbisihe kuti Matayo 24:36, gini rengopai sa duho ani ainongo ho ya?

⁴ Oni gedi Matayo 24:36. Ani ainongo gu regbo digido gi sino raka re nika ye ti ni te. Zavura ho Yesu adu ni auru kpotosende ane, ko ainongo “gu uru na gu saa” re te.a Ko ape gupai fu amokedi kusa nga, Yekova du na rengo be ko ka diaberã tipa gu regbo si aida kura apai mangi ti ni. (Amo. 1:6, 7) Yekova ima diaberã tipa gu regbo digido gi sino raka re nika ye ti ni, ono ani arengbanga ka ino ndikidi gu regbo si nika ye ti ni te.

5. Gini maapai rengbe ka du ku rirani bambiko gupai nga ani ainongo gu regbo digido rago nika ye ti ni te?

⁵ Nibi gupai Yesu apehe, ani ainongo bagizo regbo wai si nika diarani na ni tipa ani sungudi gu regbo digido rago nika ye ti ni te. Ni sangbana gipai re, ani ima rengba ka zanga du na zerangbaduse kidu na gberãrago, gu susi asusa gbe nga ka si du nga ani aima digo nisungudi ga Yekova uru. Ani ima rengba kadu a na gberãrago ka si du nga kura gaani aborokporo watadu gu kura aboro nasawia rani bambiko digido rago ata yengo te. (2 Pet. 3:3, 4) Ani ima rengba ka berã gupai nga ka ani ni ini ndikidi gu uru digido rago nika da ti ni, ka si du taata furani ani sungudi gu regbo re na ka ani adunga na gberãrago ya ka si vura du nga gu kura aboro nasawia rani vurũ.

6. Tipagine duhe ti ni ni wenepai nga ani ainongo gu regbo digido rago nika ye ti ni te?

⁶ Bambiko gupai nga Yekova apenga pa gu ndikidi uru digido rago nika ye ti ni te, ani na mamu berani ka yugo gupai nga ani nairisoko bambiko ani ima kpinyemuko na kini kido kuti ko. Ani naida ka iriso Yekova nyeanye kindi, angianga kina ti gu regbo sa digido rago nika da ti ni ya. Sidu, kuba gupai nga kaa berã gbe kina kuriipa gu regbo “ga Mbori uru” nika ye ti ni, si adu ni wenepai furani ka ani aberã kina tipa gu weneapai nika manga ho gu uru re nika ye ni. Gipai re nika undo rani ani mbedi gbe na Yekova, ki kido kuti ko, na ki mangi gupai rengbe ani ka mangaha ka sa ngbarago ti ko.​—2 Pet. 3:11, 12.

7. Ginipai ani nainihe?

⁷ Si ni nyanyakipa pai furani ka berãkurii gupai ani naima inoho. Ani ima ino gupai nga yangara arame atona rogo 1914. Rogo Baibiri yo, Yekova ima fu dungu sangbaanebi furani nga gu nayugo gupai nga gu garã nangia 1914 yangara arame atona ti ni. Ko ima pe dungu futufutuapai a furani tipa wai si adu nga zegino nika du fuo gu garã re. Bambiko gupai nga gi sangbaanebi re ima digiso tihe, ani ima ida kuti gupai nga “gu bakere rago nga ga Yekova du mbembedi.” (Zef. 1:14) Ani ima inopa gu sunge a Yekova aida ani mangihe. Ko naida ani pepa gu “wene pangbanga nga ga ngbi” fu dungu aboro wa rengbe omerani na ni. (Mt. 24:14) Ani natungusa gi wene pangbanga re rogo arago naima mbeda kuti 240 na rogo afugo naima susa 1,000. Si aidanga ani inipa “gu uru na gu saa” mbata ani kini ru kadu zaaza gene sunge tungusapai yo te.

ANI AINONGO WAI RENGBE YEKOVA KA MANGAPAI TE

8. Ginipai “gu mangapai nga ga Mbori” arukubaha? (Batungusipai 11:5)

⁸ Ani ainongo “gu mangapai nga ga Mbori” ti aregbo dunduko te. (Oni gedi Batungusipai 11:5.) Gu fugo re narukuba gupai Yekova asaha si mangi watadu ko ambu gene fuhe si mangi tipa ka digiso gako ringbisapai. Ani arengbanga ka ino gu ndikidi nduapai Yekova ambu gene fu pai si mangi watadu gu nzunzu pai ko nika mangaha tipa ka undo rani te. (Tam. 37:5) Baibiri naringbisa “gu mangapai nga ga Mbori” nga gu ani ainongo ho ya kuti wai gude ninaasona rukumbu na ni yo na ka ani ainongo ho ya. Zavura aboro birĩ-inohe ainongo wai wenengai gude ninaasona rukumbu na ni yo te. Wakina gure a, ani ainongo wai Yekova nika manga apai te.

9. Gini kpakaraapai rengbe ani ka gbiatirani na ni mbiko gupai nga ani ainongo wai Yekova nika mangapai te?

⁹ Ho ani ainongo wai ni nzunzu Yekova nika undo rani ya, ani ima rengba kadu na ndundu tipa ka manga gu kura adiaberã. Ani ima rengba kadu na ndundu tipa ka mbupa gu kura apai ka kiiso gaani sunge tungusapai, wa gu nga ka sa gaani raka si du taata watadu ka ndu ku rogo gu ba du na zingo abatungusipa Kindo rogoho. Watadu ani ima rengba ka berã gupai nga rago angbanga ti Yekova na ani te ka ani asadi ka mangapai gbe ti ngba gako sunge ono ka ani adanga ti gaani sasa ya. Watadu ani ima rengba kadu zaaza gene sunge tungusapai yo ono ka ani adunga na abawisigi Baibiri ya, watadu ani ima rengba ka manga gu kura kparakpara sunge nyanyaki rogo ga Yekova riigbu, ono ani kini gbiatirani na dungu akpakarapai. Bambiko gipai re, ani ima rengba kaa bi tirani nga Yekova aundongo rani te.

10. Gini nyanyakipa asino ani narengbe ka sonosaha bambiko gupai nga ani ainongo gupai nzunzu Yekova nika mangaha te?

¹⁰ Bambiko gupai nga ani ainongo gupai nzunzu Yekova nika mangaha te, ani na bakere rengbanapai ka sonosa nyanyakipa asino wa gu nga umbasitise. Si naundo rani ani rugutirani na gupai nga Yekova ima ino gupai ti aregbo dũ ngba gbe tipa rani. (Yes. 55:8, 9) Ani nawirika wai a kadu na bakere kido kuti Yekova nga ko nika fu diabese afu furani. Ho ani agbia wene asangbanapai ni rogo sunge tungusapai yo watadu sunge siokrasia, ani nafu gu taarimo fu Yekova rengbe tipa ko. (Tam. 127:1; 1 Kor. 3:7) Ka si du nga bete gu kura apai amanganga kina boro wai ani aidaha te, si naida ani tingidi gupai nga Yekova ima inoho dunduko. (Yes. 26:12) Ani namanga gupai rengbe ani ka mangaha, na kidu na gu kido nga Yekova nika undo rani ti aregbo dũ. Ani ima ino gupai nga ko nika fu arugapai afu furani ka si vura du vurũ nga si adunga ngba iiriwo gene wa gu ko anaamanga ha bakuru kusayo te.​—Amo. 16:6-10.

11. Gini apai ani nainihe nga gu rengbe ka undo rani?

¹¹ Ani ima ino gupai nga Yekova dedede nga Mbori nyemuse, ruru sarangbanga, na tatamana. Ani ima ino gupai nga Yekova nakpinyemu rani ni bakerehe gbe tipa agu apai ani amangaha fuko na fu awirinarani. Na ani ima ino gupai nga Yekova dedede nafu mosoro fu agu aboro du ni ruruyo fuko.​—Eb. 11:6.

ANI AINONGO GUPAI NIKA MANGA GBA TE

12. Ginipai ani awirikaha rogo Yakoba 4:13, 14?

¹² Oni gedi Yakoba 4:13, 14. Gu rengo duho nga ani ainongo gupai nika manga tipa rani gba te. Dungu apai ima rengba ka manga rani nga gu ani aaberãnga paha ya watadu gu ka ani adunga na rengba tipa ka diaha kusayo ya. (Batu. 9:11) Ni sangbanaha, ani arengbanga ka ino singia agu apai ani aberãpaha nika du na diabese watadu ani adu ni ungarani tipa ka mangaha te.

13. Waigu rengbe ani kadu ti kura aregbo bambiko gupai nga ani ainongo agu apai dunduko nika manga kumbatayo te?

¹³ Si ima rengba ka kpakara furani ka hipai bambiko ani ainongo gupai nzunzu nika manga kumbatayo te. Waigu duhe wo? Ka ani abakabangirani nikerehe tipa gupai rengbe ka manga, ani ima rengba ka zanga gaani ngbarago. Gaani raka ima rengba ka ariatihe ngba agu agene ani aaberãnga paha ya watadu gbegberẽ apai ima rengba ka manga rani ni tunguotunguoho na gipai re ima rengba ka sarani ani du na bakere gberãrago. Watadu ho apai amanga ni ngba gu gene ani aaidanga ha ya, ani ima rengba kadu na bakere gberãrago.​—Snz. 13:12.

14. Ginipai si aida ani mangihe na ki inihe tipa kadu na ndikidi ngbarago? (Oni bi sura a.)

¹⁴ Ka kina ginipai vura manga vurũ rogo gaani raka yo, ani ima rengba ka yugo gupai nga ani nairiso Yekova bambiko ani ima kpinyemu ko. Agu apangbanga nga ga Baibiri nayugo gupai nga si aidanga ani berẽhe ya Yekova nika banda rani abanda be gbegberẽ apai dunduko te, na ko amanganga mbakadapai mbu regbo koyo tipa agu apai nika manga rogo gaani raka yo te. Ko ima ino gupai nga ani ima rengba kadu na ngbarago ka si vura du nga ani ainongo agu apai dunduko nika manga furani te. Ono kuba gure, ani rengbe kadu na ngbarago ka ani andu kumbatayo kindi kaa sanako tipa gako rugaapai rogo gaani raka yo na kini gisangbako. (Yere. 10:23) Ka ani angera koyo du ko ni ho ani amanga adiaberã ni, ani abakanga bangirani tipa gupai rengbe ka manga te. Ani ima rengba kadu na gu bipai Yakoba adu na ni ho ko aya ni we: “Ka Gbia idi he, ani ata du ni ungarani, ki nimangi gere na gure.”​—Yak. 4:15.

15. Ginipai ani nainihe tipa kumbatayo?

¹⁵ Ani ainongo gupai nika manga rogo aˈuru nibasasa te, ono ani ima ino gupai nga Yekova ima kido rani na pa nyenye unga​—singia ngbangbaturũ yo watadu auru kpotosende. Ani ima ino gupai nga ko arengbanga ka pe ziree te na pai ho ka ká na ko ti digiso gako akidohe te. (Tito 1:2) Kina ko sa rengbe ka taka “pande pa digidapai ti tonatona rago na pa agu ahe ata manga nga ya bakuru yo.” Gupai re nga rengo tipa agu apai namangi bakuru kusayo, na si nika du nga rengo tipa agu apai du kumbatayo. (Yes. 46:10) Ani ima ino gupai nirengo nga pai ho nika dingiso Yekova ti kpinyemu rani te. (Rom. 8:35-39) Ko nika fu tatamana furani, wasa, na gu ome ani aidaha tipa ka hi ai kpakaraapai. Ani ima rengba kadu na gu kido nga Yekova nika undo rani aundo na ki fu maku furani.​—Yere. 17:7, 8.

ANI ARENGBANGA KA RUGATIRANI SIRISIRI NA PA WAI YEKOVA NAINI RANI TE

16. A wa duhe rogo Atambuahe 139:1-6, gini inohe du Yekova na ni nga gu ani arengbanga ka rugatirani na ni ya?

¹⁶ Oni gedi Atambuahe 139:1-6. Bakusirani ima ino apai dunduko tipa rani. Ko ima ino wai ani aberã na ndu gaani mangaapai. Ko ima ino agu apai ani apehe, na agu apai du ngbadurani yo. Ko ima ino agu apai a dunduko ani amangaha na ndu gupai ani amangaha ti ni. Bakindo Davide ape gupai nga Yekova ti aregbo dũ regerege tipa ka undo rani. Waigu si asa ro mo du ka ino gupai nga Mbori tandu apai dũ, nga guko nga Bahe kisusi nakusi ahe dunduko naberã paro aberã? Davide ape gupai nga: “Inahe wa gure si nagasa re agasa; si susi re, mi arengba nga na ni te.”​—Tam. 139:6.

17. Tipagine rengbehe kadu ni kpakarakpakaraha ti ni ka ida kuti gupai nga Yekova ima ino rani wenengai?

¹⁷ Isoke, mbiko gupai namangi rogo gaani ngbadimo kporo, sino mangaapai, watadu gupai ani aidi kutini mbata fu ani wiriki rengo, ima rengba ka saha furani ni kpakarakpakaraha ani nibi Yekova ni Mbori nyemuse nga gu Barani naberã parani aberã. Watadu ani ima rengba ka bihe nga agu aingahe ani amangihe kusayo ima du ni kere gbegberẽhe na Yekova aidanga na ani te na kini bihe nga ko tuturũ tirani​—kina wai a Davide adu na ngbatunga gu bipai re ti kura aregbo. (Tam. 38:18, 21) Watadu gu boro namanga nyanyaki asadatise ka aria gani gene raka na ka raka ngba gu gene nafu ngbarago fu Mbori ima rengba ka berã gupai nga, ‘Ka si du nga Mbori ima rugatiko nzunzu na mi, tipagine ko aida mi mbu gu gene raka nga gu du ni kpakarakpakaraha fere ka mbuhe ti ni?’

18. Waigu ani agbia undo ho ani aida gupai ni nga Yekova ima ino rani wenengai ki susi wai ani naini tirani? (Oni bi asura a.)

¹⁸ Ani ima rengba ka wirika wai ka ida kuti gupai nga Yekova ima ino rani wenengai ki susi wai ani naini tirani na ko ima rengba ka bi gu weneapai du rogo rani yo nga gu ka ani abingo ho ya. Ko nabi gaani aingahe abi, ono ko ima ino gini ngbatunga boro ani aida kadu nga ni na ko ima kpinyemu rani. (Rom. 7:15) Ho ani aye ni ka ino gupai nga Yekova dedede nabi gu ngbatunga boro rengbe ani kadu nga ni, si nafu gu ome furani ani aidaha tipa ka irisoko ni rururani na kidu na ngbarago.

19. Ginipai ani nainihe tipa Yekova?

¹⁹ Ani ima ino gupai nga Yekova nga nyemuse. Kapa ho wagu tooni tipaha te. (1 Yo. 4:8) Ani ima ino gupai nga agu apai dunduko ko apehe furani ani mangihe watadu ka ani mangingo ho ya, si wa gure bambiko ko ima kpinyemu rani na ko naida bawene raka tipa rani. Ani ima ino gupai nga Yekova naida ani raki nyeanye kindi. Ko afu motumo tumorii tipa ka sa gupai re taata. Gu gamahe nga ga motumo nakido rani na gupai nga ani ima rengba kadu na diabese ani ki vura du vurũ ni aboro zangarengba. (Rom. 7:24, 25) Na ani ima ino gupai nga “Mbori nga bahe ti kpotorani yo” ini apai dũ. (1 Yo. 3:19, 20) Yekova nabi agu apai du tipa rani dunduko, na ko na gu kido nga ani ima rengba kadu na diabese rogo manga gupai ko aidaha.

20. Ginipai nika undo rani tipa ka ani bakingo bangirani nikerehe tipa gupai ani ainongo ho ya?

²⁰ Yekova nape agu apai furani dunduko nga gu si aida ani inihe. Sidu, si aidanga ani bakibangirani tipa gupai ani ainongo pai tipaha ya te. Kuba gure, si naida ani gbeberã rani kuti gupai nyakipaha gbe. Mangaha wo nayugo gaani kido kuti Yekova nga, “gu boro du ni ziazia ni rogo inahe yo.” (Eyo. 36:4) Wa vura duhe nga ani aruganga tirani na kura apai awere te, ani ima ino gupai nga Yekova nikaa ndu kindi kumbatayo kaa yugo vovo apai furani nyeanye kindi. Na ani na ngbarago mbiko gupai nga ani arugusanga wirika vovo apai tipa gaani bawene Mbori te.​—Batu. 3:11.