Oni Naata Kindi Rogo Idapase Yo

1. Tipagine Pauro adu ti ni na ngbarago tipa wai ko araki gako raka?

TI GU kura regbo sa, Pauro aima ino gupai nga ko nika kpi barambeda, ono ho ko aberẽpa wai ni ko araki gako raka, ko adu na bakere ngbarago. Ho ko angere ni kusayo ko aya: “Mi digisi gi sunge, mi ka kuti idapase.” (2 Tim. 4:6-8) Pauro aima manga wene adiaberã rogo gako raka yo nga ga Kristano, na ko aima bihe nga Yekova adu na ngbarago na ko. Ani ima rengba a ka manga wene adiaberã na Mbori ki idi na ani. Waigu rengbe ani ka mangaha wo?

2. Rogo gupai yo nga ka ta rogo idapase yo nga gine?

² Pauro ape gupai tipa tiko na gu kura ruru aKristano nga: “Ani naata rogo idapase rogo bipai te.” (2 Kor. 5:7) Ginipai Pauro aida ka pehe? Rogo Baibiri yo, gu fugo nga, “naata” ti kura aregbo ima rengba kadu nga wai boro nasia ka raka gani raka. Agu aboro adunga na idapase kuti Yekova ya namanga diaberã riimburu gupai i abihe ni bangiriyo, gu i agiaha na tuyo, na wai i abi apai. Ono gu boro du na idapase kuti Yekova naberãpa gupai Yekova aidaha ho ni amanga adiaberã ni. Ni ima ino gupai nga ho ni apekafuo agu arugute ni nga ga Yekova du Baibiri yo, ni nika raka wene raka awere na Yekova nikafu dungu amaku afu funi kumbatayo.​—Tam. 119:66; Eb. 11:6.

3. Gini aundo naye mbiko ta ani rogo idapase? (2 AKorindo 4:18)

³ Ani dunduko ninaamanga adiaberã amanga riimburu gupai ani abihe, na gu ani agiaha ti kura aregbo. Ono ka si du nga ani namanga nyanyaki adiaberã riimburu agu apai ani abihe na kini gihe, ani ima rengba ka manga iraira diaberã. Tipagine? Bambiko agu apai ani abihe na kini gihe ti aregbo dunduko ni ruruhe te. Ka ani mangi adiaberã riimburu agu apai ani abihe na kini gihe, niyangaraha, ani nika manga gupai amanga nga gu Yekova aidanga ani mangihe ya. (Batu. 11:9; Mt. 24:37-39) Ono ho ani amanga adiaberã ni riimburu gaani idapase, ani nika “ngba ti Gbia.” (Ef. 5:10) Mangapai kuti ga Mbori arugute nasarani ani du na zereda nga ga berãse yo na ani kidu na ndikidi ngbarago. (Tam. 16:8, 9; Yes. 48:17, 18) Na ka ani andu kindi kumbatayo kaa ta rogo idapase yo, ani nika raka nyeanye kindi.​—Oni gedi 2 AKorindo 4:18.

4. Waigu rengbe boro ka ino singia ni nata rogo idapase yo watadu rogo bipai yo?

⁴ Waigu rengbe ani ka inoho singia ani nata rogo idapase yo watadu rogo bipai yo? Gini apai nasarani ani mangi agu adiaberã re? Ya mo ani namanga gaani adiaberã riimburu agu ahe gbua ani abihe abi? Watadu ani nakido kuti agu arugute naye be Yekova? Ani nika sakapai tipa wai rengbe ani kaa ndu kindi kumbatayo kaa kido kuti ga Yekova rugapai rogo gi bangiri aba du biata re: ho ani asia sunge marã ni, ho ani asia badiarogatise ni, na ho riigbu afu rugapai ni furani. Tipa agi apai re ni basasa, ani nika fura tipa gini apai si aida ani berẽkuriihe tipa ka manga wene adiaberã.

HO ANI ASIA SUNGE MARÃ NI

5. Ginipai si aida ani berẽkuriihe ho ani asia gu sunge ni ani nika mangaha?

⁵ Ani dunduko si aida aida ani gbia guhe si aidaha tipa rani na gaani aborokporo. (Batu. 7:12; 1 Tim. 5:8) Gu kura asunge kinaho du na bakere marã ti ni. Tipa kura asunge, boro ima rengba ka gbia marã ti ni nga gu rengbe ni ka ngerafuo gani aborokporo na ki banda gu kuraha. Ono gu kura asunge marã ima rengba kadu ni kina wiri toonihe, si kini sa gupai nga boro gbia kina agu ahe nyakipaha fu gani aborokporo wa gu nga riahe, gu ba ka i raki rogoho, na aroko. Ho ani asia gu sunge ni si aida ani mangihe, rengo ngaha nga, ani naaberãpa gu marã aberã ani nika gbiaha ti ni. Ono tie, ka si du nga kina pa gu marã ani agbiaha ani aberã paha, ani ata nga rogo idapase yo te.

6. Waigu rengbe ani ka ta rogo idapase yo ho ani sia gu sunge ani nika mangaha ni? (AEbere 13:5)

⁶ Ka ani ata rogo idapase yo, ani nika berãpa wai a gu sunge re nika du namaapai kurii gaani pagume na Yekova. Ani ima rengba ka sana tirani nga: ‘Ya mo gu sunge re nika sa re mi mangi gupai Yekova asogaha?’ (Snz. 6:16-19) ‘Ya mo si asa re mi naakpa adunguratise na kidu na kina bete regbo bere gbua tipa tungusapai na wisigopai nisase na mi kini di gbanga regbo kusayo pati gimi aborokporo?’ (Frp. 1:10) Ka karagapai tipa agu asanahe re du nga ii, si adu ni patatamana ka ani idi nga pa gu sunge re ya, ka si vura du vurũ nga pa gbia sunge ima kpakara. Bambiko gupai ani nata rogo idapase yo, ani namanga gu diaberã nayugoho nga ani na gu kido nga Yekova nika ngera angerafuo gaani azingo.​—Mt. 6:33; oni gedi AEbere 13:5.

7-8. Waigu gu kura wirina sa South America yo ata rogo idapase yo? (Oni bi sura a.)

⁷ Oni bingo wai Javier,a nga wirina South America yo, abi wai nyakipa ta rogo idapase yo. Ko aya: “Mi afu rimore tipa gu sunge nga gu bakio marã ha adu wa bara ue ti gu sunge mi aamangaha mbata.” Ono tie, Javier aida aida a ka mangasunge abazakigene. Ko ape gu kura pai nga: “I asia re tipa mi ndu fuo bangerekurii sunge ko sasana re. Mbata fu i sasana re, mi akpari fu Yekova bambiko mi aima ino gupai nga Ko aima ino gupai du ni wenehe tipa re. Mi aida aida kadu na dungu asunge bere ba gi sunge yo tipa i nifu bakere marã fere, ono mi aidanga gi sunge re ká na mi ti da ti gimi asasa te.”

⁸ Javier ape gupai nga: “Ti regbo sasana re tipa sunge, bangerekurii sunge ape gupai fere nga mi nikaa mangasunge dedede kugii regbo yo. Mi ape gupai fuko ngba zezeredi gene nga, mi arengbanga ka manga gu sunge re te mbiko gimi pa irisombori.” Sidu, Javier adiberã ka zanga manga gu sunge re. Aposo ue kusa, ko atona mangasunge abazakigene. Na kusa rogo gu garã re, ko agbia gu sunge ko amangaha kina rogo bete aˈuru rogo poso yo. Ko aya: “Yekova agi gimi kparakpee na ki fu gu sunge fere narengbe ka mbu regbo fere tipa mi nimangi sunge abazakigene. Mi na bakere ngbarago tipa ka gbia gu sunge nga gu nambu regbo fere tipa mi du na bakere regbo bere tipa ka mangasunge fu Yekova na fu awirinami.”

9. Ginipai oni nawirikihe ti gu kpiapai nga ga Trésor?

⁹ Na ginipai ka mangi ka ani bihe nga gu sunge ani amangaha awere asanga rani tipa ani naata rogo idapase yo te? Oni bingo gu kpiapai nga ga Trésor, du Congo yo. Ko ape gupai nga: “Gimi vovo sunge angia gu sunge mi aima digo ni gbataha. I aafu marã fere wa bara biata susi gu sunge mi anaamangaha mbata, na aboro anaabi re na nyanyakipa re.” Ono tie, Trésor anaakpa adunguratise dedede bambiko ko anaamangasunge kugii regbo yo. Na berewe a, gako abadiasunge anaasa ko ti kura aregbo ko nipe ziree tipa gu gbegberẽ apai gayo basunge anaamangaha. Trésor aaida aida kambu gu sunge re, ono ko aabakabangiriko singia ko rengbe ka gbia kura sunge berewe. Ginipai naundo ko? Ko aya: “Abakuka 3:17-19 aundo re mi ini gupai nga, ka mi vura zanga gu sunge re, Yekova nika ngera angerafuo re. Sidu, mi ambu gu sunge re.” Ko ape gupai nga: “Dungu aboro naberã gupai nga i ima rengba kambu pa kura apai, kodihe na gayo aborokporo, gbiati irisombori ka si du nga i gbia gu sunge i agbia bakere marã ti ni. Mi na bakere ngbarago nga mi abanda gimi pagume na Yekova. Garã sa kusa, Yekova aundo re mi gbia gu sunge nga gu mi aagbia marã ti ni rengbe mi arengba ka ngerafuo gimi azingo na ni, na kidu na bakere regbo tipa ka mangasunge fu Yekova. Ho ani amaa Yekova ni ni bambata boro rogo gaani raka yo, ti tonatonaha, zingo marã ima rengba ka manga rani, ono Yekova nika ngera angerafuo rani.” Ka ani kido kuti ga Yekova arugute gbiati akidohe, ani nikaa ndu kindi kumbatayo kaa ta rogo idapase yo na ko nika fu maku afu furani.

HO ANI ASIA BADIAROGATISE NI

10. Ginipai rengbe ka sarani ani naata kina rogo bipai yo nga ga bangirise ho ani aberãpa rogotise?

¹⁰ Rogatise nga gamahe be Yekova, na gbegberẽpai ho ka si du nga boro naida ka manga rogatise te. Ho gu wirina nga dee aberãpa manga rogatise ni, ri ima rengba ka berãpa ngbanya gu kumba ri aida ka dia ko, wai ko amanga pai, wai kura aboro abiko, gu gene ko amangasunge na marã ngbaha, singia si naida ko ngerefuo agumeko, watadu ko nasari ri du na ngbarago.b Agi apai re dunduko na nyanyakipaha. Ono tie, ka si du nga kina agi apai re ri amaa berãri tipaha, gure ima rengba kadu nga ri nata rogo bipai yo.

11. Waigu rengbe ani kaa ta rogo idapase ho ani asia gaani badiarogatise ni? (1 AKorindo 7:39)

¹¹ Yekova na bakere ngbarago na agu awirina namangapai kuti gako arugute ho i asia badiarogatise ni! Ni kpiapai, i namangapai kuti agu arugute nga ga Baibiri na ki sungudi daho i nika nyaka ni ki da ba manga rogotise i kini ru ka tona mbakadapa rogatise. (1 Kor. 7:36) I nabihe nga gu boro i aida ka manga rogotise na ni re na agu asino ti ni Yekova aya si naida si du ti kumbakudee watadu diakumba. (Snz. 31:10-13, 26-28; Ef. 5:33; 1 Tim. 5:8) Ka gu boro angianga irisi Yekova ya aida ka manga rogatise na ni, ni namangapai kuti gu rugute nga ka manga rogotise “kina rogo Gbia yo,” a wa duhe rogo 1 AKorindo 7:39. (Oni gedihe.) I namangaha wo bambiko i ima ino gupai nga Yekova nika ngera angerafuo gayo nyemupai ti aregbo dunduko.​—Tam. 55:22.

12. Ginipai mo awirikaha ti gu kpiapai nga ga Rosa?

¹² Oni bingo gu kpiapai nga ga Rosa, du nga nazakigene Colombia yo. Kura kumba ba gari sunge yo naangianga irisi Yekova ya atona ka yugo gupai nga ko nakpinyemu ri. Ko aima ngba ti Rosa a. Ri aya: “Ko aangera wa wene kumba. Ko anaaundo aboro rogo gako dagbarago, na ko angera wa wene boro. Rago aima ngba tire na wai ko aamangapai na mi. Ko aima du na agu asino tiko mi aida si du ti gu kumba mi nika diako, ono gupai sa nakpa nga ko adunga ni irisi Yekova te.” Ri ape gu kura pai nga: “Si aima kpakara fere tipa mi pe gupai fuko nga mi aidanga ka mbakadapa rogatise na ko te. Ti gu regbo re, mi aabi tire nga mi nisare, na mi aaida ka manga rogatise, ono mi aabingo gu boro nga wirina rogo dungurati ka mi amangi rogatise na ni rogo rengo yo te.” Wa si avura du wo, Rosa amaanga berãri kuti guhe ri abihe te. Ri aberẽkurii gu sangbanapai gu diaberã re narengbe kadu na ni kurii gari pagume na Yekova ka ri diberã tipa ka dia gu kumba re. Sidu tie, ri akati gu pabakure naadu dagbari na gu kumba re na ki moi berãri kuti gari sunge fu Yekova. Ngbutuko tifuo gure, i ayambu ri tipa Gu Sukuru Du Tipa Abatungusipa Kindo na ri namangasunge awere ni kparakpara nazakigene. Rosa naya: “Yekova ima fu bakere amaku fere nga gu sa re mi du na bakere ngbarago.” Dedede, si taata tipa ka manga gupai nga gu Yekova aya furani ani mangihe te, gbe ka si du nga ani ima kpinyemu gupai nga ha re. Ono ho ani amangapai ni kuti ga Yekova aberã, ani nagbia undo agbia ti ni ti aregbo dunduko.

HO ANI AGBIA ARUGAPAI NI BE RIIGBU

13. Waigu rengbe ani kadu ho ani agbia arugapai ni be riigbu?

¹³ Ani naagbia arugapai dedede nga gu naye be Yekova vurube​—abaakumba rogo gaani dungurati, babi adungurati, be-basunge, watadu Riigbu Bipasunge​—nga gu naundo rani ani irisi Yekova. Ono ti kura aregbo, ani arengbanga ka ino ndu gupai i afu gu kura arugapai ti ni furani te. Ani ima rengba kadu na kapa singia gu rugapai re ni wenehe. Ani ima rengba ka tona maa berãrani a kuti agu aingahe nga ga agu awirina nafu gu rugapai re.

14. Ginipai nika undo rani ani mangipai kuti gu rugapai naye be riigbu? (AEbere 13:17)

¹⁴ Ho ani ata ni rogo idapase yo, ani na gu kido nga Yekova du nanungusa gako riigbu. Na ni sangbana gipai re, ani regerege ka giasangba na ani namangaha wo na ruru bipai. (Oni gedi AEbere 13:17.) Ani ima ino gupai nga ho ani apekafuo rugapai ni, ani naundo dungurati si nye na kodatise. (Ef. 4:2, 3) Ani ima du na kido kuti Yekova a, na ani ima ino gupai a nga agu awirina nangbe rogo apai yo nga kpakpa aboro, ono ho ani agiasangba ni, Yekova nika fu maku afu furani dunduko. (1 Sam. 15:22) Na ani na idapase a nga, ka si du nga si naida i mangi ariapai ti rugapai, Yekova nika mangaha amanga.​—Mika 7:7.

15-16. Ginipai naundo wirina ko ta rogo idapase yo wa vura duhe nga ko adu na kapa tipa gu rugapai i agbiaha? (Oni bi sura a.)

¹⁵ Oni bingo gu kpiapai nayugo gu wenepai ani agbiaha ho ani amangapai ni kuti gu rugapai naye be riigbu. Peru yo, wa vura duhe nga dungu aboro nape pa aboro Sepania, dungu aboro nape afugo aboro gu ringara re. Fugo sa dagba agu afugo re nga Quechua. Tipa dungu agarã, agu awirina nape Quechua agbata agu aboro nape gu fugo re rogo gu dagbarago re. Ono tie, tipa gupai nga i mangipai kuti agu arugute nga ga airangbii, i amangi aariapai nibipa gu gene i aagbata aboro ngbaha. (Rom. 13:1). Ni sangbanaha, kura aboro aabaka kina bangiriyo singia i agbia aboro rogo gu dagbarago re. Ono tie, ho awirina apekefuo agu arugapai re ni, Yekova afu maku kurii gu ome i aamangaha na i agbia dungu agu aboro naape gu fugo nga Quechua.

¹⁶ Kevin nga bakumba rogo gu dungurati nga ga Quechua adu dagba agu aboro yo naabakabangiriyo. Ko ape gupai nga: “Mi aberẽ gupai nga, ‘Waigu ani nika gbia agu aboro awere nape gu fugo nga Quechua?’” Ginipai Kevin amangihe? Ko aya: “Mi aberẽpa Asanza 3:5. Na mi aberẽpa Moize. Si aaida ko kusi awiri aYisaraere Ezipeta yo na ki ndu ka susa Zamba Baime yo, na si aangera wa yo du aEzipeto nika nyasariipa yo ni nga aguyo naado fuoyo. Wa si avura du wo, ko agisangba na Yekova ki fu maku fuko ni manga ko iiriwoapai ka batasa yo.” (Gate 14:1, 2, 9-11, 21, 22) Kevin adu regerege ka manga ariapai kuti kura gene tungusapai. Sangbanaha angia gine? Ko aya: “Kina ngbare nazere ka bi wai Yekova afu maku furani. Mbata kusayo, ani anaata nikerehe gene tungusapai yo na ti kura aregbo ani anibi boro sa gbua watadu ue nga gu ni nape gu fugo nga Quechua. Awere, ani nandu ku rogo gu dagbarago badungu aboro ape gu fugo rogoho nga Quechua. Ni sangbana gipai re, ani nafura na dungu aboro, kini karaga tirani fuo dungu aboro, na kini wirikipai na dungu aboro. Dungu aboro naye awere tipa gaani adunguratise.” Ho ani ata ni rogo idapase yo, Yekova nafu maku furani ti aregbo du.

17. Ginipai mo nawirikihe rogo gi kekepai re?

¹⁷ Ani sakipai tipa abangiriba biata du ni nyanyakihe nga gu si aida ani mangi adiaberã riimburu gupai Yekova aida ani mangihe. Ono si naida ani mangi adiaberã riimburu gupai Yekova aidaha berani rogo gaani raka yo naabaha, wa gu nga ho ani asia gu vidio ni si aida ani bihe, gupai ani asia ka mangaha ti gaani kungbo regbo, bakio gu wirikapai si aida ani wirikihe, na wai ka sonosa awirani. Ka si vura ngia kina gini diaberã du ani ka mangaha, si aidanga ani mangihe riimburu gupai ani abihe te, ono si naida ani berẽpa gaani pagume na Yekova, gako arugute, na gu gako kidohe du tipa ka ngerafuo rani. Ka ani mangihe wo, ani aduadu na rengba ka ‘tá na rimo Yekova gaani Mbori nye anye kindi.’​—Mika 4:5.