GU KEKEAPAI DU TIPA WISIGOHO 23
BIA 2 Yekova Nga Rimoro
Rimo Yekova na Nyanyakipaha fu Rani
“‘Oni nga gimi adezire,’ wo poi Yekova.”—YES. 43:10.
GU MEMEAPAI DU ROGO GI KEKEAPAI RE
Gupai rengbe ani ka mangaha tipa ka yugo na ni nga Yekova ni ziazia ko na agu apai dunduko Satana apehe tipa ko nga ziree.
1-2. Waigu ani aino gupai nga rimo Yekova na nyanyakipaha fu Yesu?
RIMO Yekova na nyanyakipaha gbe fu Yesu. Boro ho namangi dungu apai wa ko tipa ka sa rimo Yekova aboro inihe te. Rogo gu kekeapai nasusi, ani awiriki gupai nga, Yesu aima du na nyemu ka kpi tipa ka yugo gupai nga Yekova ni ziazia ko na gako agene dunduko ni ruruhe. (Mk. 14:36; Eb. 10:7-9) Na tingbafuo ga Yesu Zogarago Tipa Agarã Kutu, ko nika fu pagbia dunduko fu Bako mbiko ko naida Yekova gbia taarimo dunduko. (1 Kor. 15:26-28) Agu apai dunduko Yesu amangihe fu Yekova nayugo gupai nga ko ima kpinyemu Yekova ni bakerehe gbe.
2 Yesu aye ku auru kpotosende tipa ka pepa agu apai dunduko fu aboro Yekova aaida i inihe. (Yo. 5:43; 12:13) Ko asa gupai nga apefuoko ini rimo Bako. (Yo. 17:6, 26) Ho ko ayugupai ni fu aboro na ki mangi iiriwoapai, ko aima yugoho ziazia nga Yekova du nafu gu tatamana na ome re fuko ko mangi agi apai re. (Yo. 10:25) Zavura Yesu asana Yekova ko kakuti gako abawiriki “ni rimo [Ko].” (Yo. 17:11) Si tie ziazia nga, rimo Mbori adu na nyanyakipaha gbe fu Yesu kisusi ai pai. Sidu, waigu rengbe ai boro ka pe gupai nga ni nga Kristano ono ka ni ainongo rimo Yekova watadu ka mangasunge na ni ya?
3. Gini apai ani nika sakapai tipaha rogo gi kekeapai re?
3 Bambiko gupai nga ani nga ndikidi aKristano, ani nawirika Yesu niyugo ani nyemuse gbiati irisa tipa rimo Yekova. (1 Pet. 2:21) Rogo gi kekeapai re, ani nika bi ndu gupai Yekova nafu rimo ko ti ni kurii agu aboro natungusa “wene pangbanga nga ga ngbi.” (Mt. 24:14) Ani nika sakapai asaka a tipa wai si aida pa rimo Yekova du na nyanyakipaha furani ni basasa.
“ABORO . . . SA RIMOKO”
4. (a) Ginipai Yesu apehe fu gako abawiriki ngbutuko mbata fu ko ga ku ngbangbaturũ yo? (b) Gini sanahe ani nika sakapai tipaha?
4 Ngbutuko mbata fu Yesu ga ku ngbangbaturũ yo, ko ape gupai fu gako abawiriki nga: ‘Oni adía tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na digida sende yo.’ (Amo. 1:8) Sidu, si adu nga abawiriki nika tungusa wene pangbanga rogo aba dunduko, angianga kina Yisaraere yo sa ya. Niyangaraha, si adu nga aboro rogo zegino dunduko nika du adu na momu tipa kada ni apefuo Yesu. (Mt. 28:19, 20) Ono Yesu aya: ‘Oni adu ni adezirere.’ Ya mo si aaida gi vovo abawiriki re ini rimo Yekova, watadu si adu nga i nika du gbua ni kina adezire Yesu sa? Agu apai i nasakipai tipaha rogo Amokedi kapita 15 naundo rani ani karagapai kuti gu sanahe re.
5. Waigu amokedi gbiati sosono akumba Yerusarema yo ayugu gupai nga si aaida aboro dunduko ini rimo Yekova? (Oni bi sura a.)
5 Rogo gu garã nangia 49 Fuo Batikayo Kristo, amokedi gbiati kura sosono akumba Yerusarema yo adunguratiyo sa tipa ka sakapai singia si naida agu aboro naangianga aYudo ya naayeratiyo tipa ka da ni aKristano. Ti digido gu sakapai re, Yakoba nangia wirina Yesu aya: ‘[Petero] nipeke pa ha wa Mbori andu koyo du aGendiria ni mbata, ka roga aboro dagba yo sa rimoko.’ Rimo da du Yakoba aafura tipaha? Ni dia ko pai rogo fugo gu nebi yo nangia Amosa, ko agbia gupai kuti ni nga: ‘Ya yangara aboro gbata Gbia, na aGendiria dunduko, nga agu yo yambu yo rimore ti yo, Gbia nipoi wo.’ (Amo. 15:14-18) Anga gupai sa si adu nga gi vovo abawiriki re nika mangaha nga ka wirika kina pai tipa Yekova te ono i nika ‘yamba rimoko’ kurii yo a. Gere aayugo gupai nga i nika yugo rimo Mbori fu kura aboro na aboro nika ino yo ni agu aboro narukuba gu rimo re.
Ti regbo gu dunguratise nangia ga gu riigbu bipasunge naadu rogo bambata sa kama agarã, gu ruru akumba re aima bi gupai ziazia nga si naida aKristano du ni aboro tipa rimo Mbori (Oni bi genewaraga 5)
6-7. (a) Tipagine Yesu aye ti ni ku auru kpotosende? (b) Gini kura nyanyakipa ndupai berewe gbe Yesu aye ti ni ku auru kpotosende?
6 Rogo rimo Yesu yo nga “Yekova Nga Bata,” na Yekova amangisunge na Yesu tipa ka batasa agu aboro dunduko du na idapase kuti ko na kuti Wiriko. Yesu aye ku auru kpotosende ka fu gako raka tipa aboro. (Mt. 20:28) Ni fu ko motumo tumorii, ko asaha taata fu aboro tipa i gbia bata na i gbia nyenye unga.—Yo. 3:16.
7 Ono tipagine aboro aaida na motumo ti ni? Bambiko gupai namangi ati Edene yo. Wa gu i apehe rogo gu kekeapai nasusi, agu aboro navungu aboro dunduko nangia Adamu na Eva asamungu kuti Yekova na ki zanga gu momu nga ga raka nyeanye kindi. (Bam. P. 3:6, 24) Ono Yesu aye ku auru kpotosende ka manga gupai paha aima nyaka gbe kisusi pa batasa aboro. Satana ape kere aziree tipa Yekova. (Bam. P. 3:4, 5) Sidu, si aaida aboro ini gupai nga Yekova amanganga gbegberẽpai te na rimoko adu ni ziazia ha. Na Yesu nangia gu wene boro kisusi tipa ka yugo gipai re mbiko ko aarukuba Yekova na ki mangi agu apai dunduko Yekova aaida ko mangihe ngba rengberengbe gene.
Waigu rengbe boro ka ya ni nga Kristano ono ka ni ainongo rimo Yekova watadu ka mangasunge na ni ya?
8. Ginipai si aida agu aboro napeka fuo Yesu dunduko rugutiyo na ni?
8 AKristano dunduko si adu nga si nika ida i ini ndikidi Mburu gayo bata, du nga, Bavungu Yesu nga Yekova Mbori. (Yo. 17:3) Kurii gure, wakina Yesu, si adunga i nika ino yo ti rimo Yekova. Si aaida i rugutiyo na pa wai duhe na nyanyakipaha tipa ka ziasi gu rimo re. Si aaida i mangi gipai re tipa Yekova idi na yo na i ki gbia nyenye unga. (Amo. 2:21, 22) Sidu, ruru apefuo Yesu dunduko si aaida i wirikipai tipa Yekova gbiati Yesu. Ani ima rengba ka bi ndu gupai Yesu adigisi gu gako kparakpee ti ni du rogo Yoane 17 na agi afugo re: ‘Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.’—Yo. 17:26.
“ONI NGA GIMI ADEZIRE”
9. Waigu rengbe ani ka yugoho nga rimo Yekova na nyanyakipaha furani?
9 Nibipa agu apai ani nasakipai tipaha, si tie ziazia nga, tipa ani du ni ndikidi apefuo Yesu, ani du wa ka ani ziasi rimo Yekova. (Mt. 6:9, 10) Si naida ani bi rimo Yekova nga nyanyakipa rimo kisusi. Na si naida ani yugu gupai nga ani nabihe abi wo. Sidu, ginipai rengbe ani ka mangaha tipa ka ziasi rimo Yekova na ka yugoho nga gupai Satana apehe tipa Yekova aangianga rengo te?
10. Ginipai ani agedapai tipaha rogo kapita 42 kuti44 rogo gu buku nga ga Yesaya? (Yesaya 43:9; 44:7-9) (Oni bi sura a.)
10 Rogo Yesaya 42 kuti 44, ani nawirikapai yo tipa gupai rengbe ani ka mangaha tipa ka ziasi rimo Yekova. Rogo agu akapita re, Yekova nasana agu aboro airisongo ko ya tipa i yugu na ni nga gayo ambori ni ndikidi yo. Kina wai i naape ngbanga, ko sanahe singia adezire ho rengbe ka yugo gipai re. Ono aboro ho te!—Oni gedi Yesaya 43:9; 44:7-9.
Ani nayugo gupai rogo agene yo dunduko nga kura Mbori ho berewe te ono kina Yekova sa (Oni bi genewaraga 10-11)
11. Ginipai Yekova apehe fu gako aboro rogo Yesaya 43:10-13?
11 Oni gedi Yesaya 43:10-13. Yekova ape gupai tipa gako aboro nga: “Oni nga gimi adezire . . . mi nga Mbori.” Yekova nasana yo i karagapai kuti gi sanahe re nga: “Kura Mbori ho berewe fuo re?” (Yes. 44:8) Sidu, ani na bakere momu berani ka karagapai kuti gu sanahe re. Na gupai ani apehe na kini mangihe, ani nayugo gupai nga kura Mbori ho berewe te ono kina Yekova sa. Rimoko du kurii arimo dunduko. Ani nayugoho nga ani ima kpinyemu Yekova nzunzu na ani niruru rani fuko ngba gu gene ani araka ngbaha, ka Satana vura saha vurũ ni kpakarakpakaraha furani. Ngba gi gene re, ani na momu berani ka ziasi rimo Ko.
12. Waigu gu sangbanebi du rogo Yesaya 40:3, 5 adigisitihe?
12 Ho ani asongoda rimo Yekova ni, ani nawirika Yesu Kristo. Yesaya ape gupai a nga, boro nika ‘mbakada ga Yekova gene.’ (Yes. 40:3) Waigu gupai re adigisi tihe? Yoane Bafu Bapatiza ambakadi gene fu Yesu nga gu ko naye ti rimo Yekova na ki fura ti rimo Yekova. (Mt. 3:3; Mk. 1:2-4; Rk. 3:3-6) Kina gu bangisa sangbaanebi re ape gupai nga: ‘Ga Yekova taarimo adú ni kusikusi he.’ (Yes. 40:5) Waigu gipai re adu? Ho Yesu aye ni ku auru kpotosende, ko arukuba Yekova ngba rengberengbe gene si kidu wa ka i ya kina Yekova du nitiko naye ku auru kpotosende.—Yo. 12:45.
13. Waigu rengbe ani ka wirika Yesu?
13 Wakina Yesu, ani nga ga Yekova adezire. Ani na rimo Yekova rirani na ani napepa gako bawene mangaapai fu agu aboro dunduko ani agbia yo. Ono tipa kadu ni wene adezire fu Yekova, si naida a ani sa aboro i ini agu apai dunduko Yesu amangihe tipa ka ziasi rimo Yekova. (Amo. 1:8) Boro ho namangi dezire tipa Yekova wa gu Yesu amangihe te, na ani napekafuo gako kpiapai. (Yugo. 1:5) Ono ngba gini kura gene berewe ani ayugo gupai ngbaha nga rimo Yekova na nyanyakipaha furani?
GU KURA AGENE SI AIDA ANI YUGUHE NGBAHA NGA RIMO YEKOVA NA NYANYAKIPAHA FURANI
14. Wa gu i napehe rogo Atambuahe 105:3, waigu ani abi rimo Yekova?
14 Ani namanga rũko na rimo Yekova. (Oni gedi Atambuahe 105:3.) Yekova na bakere ngbarago ho ani asambuo rimoko ni. (Yere. 9:23, 24; 1 Kor. 1:31; 2 Kor. 10:17) Ka ‘sámbua tirani rogo rimo Yekova’ yo nayugo gupai nga kadu na rũko nga Yekova nga gaani Mbori. Ani nabihe nipa momu tipa ka yugo irisa tipa rimoko na ka songodaha. Si aidanga zee zi rani tipa ka pe gupai fu gaani abadiasunge, agude riko sukuru yo, amurakporo, gbiati kura aboro nga ani nga aDezire Yekova te! Bakitingbanga naida ani mbu fura tipa rimo Yekova fu kura aboro. (Yere. 11:21; Yugo. 12:17) Nirengo, Satana gbiati agu aboro nagbataka gako aziree naida ka sa aboro bangiriyo go ti rimo Yekova. (Yere. 23:26, 27) Ono mbiko gupai nga ani ima kpinyemu rimo Yekova, ani naida kaa sambuo ko ti aregbo dunduko—Tam. 5:11; 89:16.
15. Ginipai si ayugoho ka kpara ti rimo Yekova?
15 Ani nandu kumbatayo kindi kaa kpara ti rimo Yekova. (Yoe. 2:32; Rom. 10:13, 14) Manga kparakpee ti rimo Yekova nakoda dungu apai ti gu gbua nga ka ino rimo Mbori na kini mangisunge na ni. Ani naye ka ino Mbori wa ndikidi boro, kini kido kutiko, na kini ngere koyo du ko ni tipa undo na ngbembatayo. (Tam. 20:7; 99:6; 116:4; 145:18) Kpara ti rimo Yekova a nayugo gupai nga ka pepa rimo ko fu kura aboro gbiati gako wene asino. Na ani naundo yo i mangi ariapai rogo gayo raka yo tipa wa ka i sa ngbarago tiko na i ki gbia bata.—Yes. 12:4; Amo. 2:21, 38.
16. Waigu rengbe ani ka yugoho nga Satana nga iraziree?
16 Ani na nyemu ka rungo tipa rimo Yekova. (Yak. 5:10, 11) Ho ani anye ni niruru rani ti regbo rungosiro, ani nayugoho nga Satana nga iraziree. Ho Eyobo adu ni kindi ni unga ko, Satana ape gupai tipa agu aboro nairiso Yekova nga: “Agu ahe dunduko du be boro ni afu kina ha tipa ungani.” (Eyo. 2:4) Gupai Satana aaida ka pehe nga, aboro rengbe ka iriso Yekova sa kina ti wene aregbo na i ima rengba ka mbu iriso Yekova ho ka i gbiatiyo ni na akpakarapai. Eyobo aima yugo gupai nga rengo nga gipai re te. Areme, ani a ima rengba ka yugoho nga ka gaani raka vura kpakara akpakara wai vurũ watadu ho Satana nika asada ni ka ba gberãrago tirani, ani ambunga iriso Yekova te. Ani na gu bakere kido nga, Yekova nikaa ndu kumbatayo kindi kaa kakuti rani mbiko rimoko.—Yo. 17:11.
17. Ngba gini kura gene rengbe ani ka ye na irisa kuti rimo Yekova wa gu i nagumbaha rogo 1 Petero 2:12?
17 Ani nayugo irisa tipa rimo Yekova. (Snz. 30:9; Yere. 7:8-11) Bambiko aboro ima inoho nga ani nga aDezire Yekova, gupai rengbe ani ka mangaha ima rengba ka ye na irisa kuti rimoko watadu ka ye na zanga irisa. (Oni gedi 1 Petero 2:12.) Sidu tie, ani naida ka manga ai gupai rengbe ani ka mangaha tipa ka sambuo Yekova rogo gaani afugo yo na gaani mangaapai. Ho ani amanga gipai re ni, si ki vura du vurũ nga ani nga rengberengbe aboro te, ani nika yeaye na taarimo kuti rimo Yekova.
18. Gini kura gene duho rengbe ani ka yugoho na ni ngbaha nga rimo Yekova na nyanyakipaha furani? (Oni bi rukutu kekeapai a.)
18 Ani nabihe nga rimo Yekova du na nyakipaha gbe furani kisusi gupai aboro aberãha tipa rani. (Tam. 138:2) Tipagine du gipai re ti ni na nyanyakipaha gbe? Bambiko ho ani amanga agu apai ni nasa ngbarago ti Yekova, dedede, si arengbanga ka ngba ti aboro te na i ima rengba ka pe gbegberẽ apai tipa rani.a Ho Yesu akpi ni, aboro abi ko wa bamangi gbegberẽ apai na i ki sogoko. Ono Yesu aima du na nyemu ka kpi ngba gi gene re tipa Yekova rengbe ka gbia taarimo. Ko aabakanga bangiri ko ni bakerehe gbe tipa gupai aboro aberẽhe tipa ko te. (Eb. 12:2-4) Ko amaaberã ko tipa gupai Mbori akpinyemuhe.—Mt. 26:39.
19. Gamo bipai nga gine tipa rimo Yekova, na tipagine?
19 Ani na ngbarago ka iriso Yekova na si ni pa irisa furani i naayamba rani nga aDezire Yekova. Mbiko gupai nga rimo Yekova na nyanyakipaha gbe furani, ani nikaa ndu kumbatayo kindi kaa sambuo ko ka aboro vura kaa bi rani vurũ na parani kusende. Rimo Yekova na nyanyakipaha gbe furani susi gupai aboro aberãha tipa rani. Sidu, ani naandunga andu kumbatayo kindi kaa sambuo rimo Yekova ka Satana vura kaa asada vurũ ka ba gberãrago tirani. Ngba gi gene re, ani nika yugoho nga rimo Yekova na nyanyakipaha gbe furani, kina wai duhe fu Yesu Kristo.
BIA 10 Ani Fu Taarimo fu Yekova Gaani Mbori!
a Zavura gu ruru kumba nangia Eyobo aima tona ka berã gbe a tipa wai aboro aabi ko ho akumba biata ape gupai ni nga si nawiraha wa ko ima manga gbegberẽpai. Ti tonatonaha, ho ko azanga awiriko ni na gako ahe, “Eyobo amanga nga ingapai te, ko agumba nga gbegberẽpai kuti Mbori a te.” (Eyo. 1:22; 2:10) Ono ho i akitingbanga Eyobo ni na pa manga gbegberẽpai, ko atona ka songoda pai kubara ko yo na kini fura ni “aura.” Pa rimoko nanyaki gbe fuko susi fu taarimo fu Yekova.—Eyo. 6:3; 13:4, 5; 32:2; 34:5.