Oni Tingidi Gupai Nga Yekova “Nga Unga Mbori”

1. Ginipai naundo ga Yekova aboro i nye kaa irisoko kindi i ki vura kaa gbiatiyo vurũ na akpakarapai?

BAIBIRI nape gupai nga, ani naraka ti “gbegberẽ rago.” (2 Tim. 3:1) Ga Yekova aboro nagbiatiyo na akpakarapai wakina gu kura aboro du rogo gi ga Satana gbegberẽ zegino re agbiatiyo na ni. Ono i narungosi rani arungosi a mbiko ani nairiso Yekova. Ginipai naundo rani tipa ani naairiso Yekova ani ki vura kaa gbiatirani na agi akpakarapai re vurũ? Bangua ndupai sa nga, ani ima bi ga Yekova undo na ki ini gupai nga ko “nga unga Mbori.”​—Yere. 10:10; 2 Tim. 1:12.

2. Ginipai ani nainihe tipa Yekova nga gu rengbe ka nyakasa rani?

² Yekova nabi agu akpakarapai abi dunduko ani agbiatirani na ni na ko naida aida ka undo rani. (2 Peka 16:9; Tam. 23:4) Ho ani atingida gupai ni nga gaani Mbori nangera angera fuo rani na ko ti aregbo dunduko regerege ka undo rani, si ima rengba ka fu ome furani tipa ani hi ai aˈasada. Ani bingo wai gupai re adu ni rengo tipa Bakindo Davide.

3. Ginipai Davide aaida ka pehe ho ko aya ni “Yekova du ni ungako”?

³ Davide aini Yekova na kini kido kuti Ko. Ho Bakindo Saura gbiati kura aboro aˈasada ni ka imo Davide, ko akpari fu Yekova tipa undo. (Tam. 18:6) Tingbafuo Mbori karagapai kuti ga Davide kparakpee na ki batasi ko, ko aya: “Yekova du ni ungako!” (Tam. 18:46) Ginipai Davide aaida ka pehe? Gu kura buku sa nape gupai nga Davide aanyakasa gupai nga, Yekova nga gu ndikidi Mbori naundo gako amoyambu ti aregbo dunduko. Davide aima ino gupai nga gako Mbori aima ino gupai ko aasusa rogoho na ko adu regerege tipa ka undo ko. Gupai re nangarasi ko tipa ko naandu kumbatayo kindi kaa iriso Yekova na kini tambua ko.​—Tam. 18:28, 29, 49.

4. Waigu ani agbia undo ti bi ani Yekova ni unga Mbori?

⁴ Pa du ani na gu kido nga Yekova nga unga Mbori ima rengba ka undo rani tipa ani du zaaza ka irisiko. Ani nika du na ome ka hi aasada na kidu na nyemu kaa ndu kindi kumbatayo kaa manga gako sunge nyanyaki. Ani nika diaberã a tipa ka nye mbembedi na Yekova.

UNGA MBORI NIKA NYAKASA RONI

5. Ginipai rengbe ka fu kido furani ho ani agbiatirani ni na aˈasada? (AFiripoio 4:13)

⁵ Ani nika du na rengba ka hi ai asada, singia tooni he watadu kikiihe, ka si dunga ani natingida gupai nga Yekova ni unga ko na ko na rengba ka undo rani ti aregbo dunduko. Ko ima rengba ka undo rani, bambiko pai ho ka gasi gaani Mbori te. Ko Du na Tanduapai Dũ, na ko ima rengba ka fu ome furani tipa ani hipai. (Oni gedi AFiripoio 4:13.) Gipai re nasarani ani du na kido ho ani agbiatirani ni na aasada. Na ho ani abi wai ni Yekova aundo rani ho ani agbiatirani ni na agu aˈasada du ni rukutuhe, ani na gu kido nga ko nika undo rani aundo ti regbo bakere aˈasada.

6. Ginipai namangi rogo ga Davide raka yo ho ko adu ni ni paranga nga gu nasako ko kido kuti Yekova ni bakerehe?

⁶ Ani bingo agu apai ue namangi Davide nga gu nasako tipa ko kiisi gako kido kuti Yekova. Ho Davide adu ni ni paranga babanda akandoro, urusi na bahu azi ga bako akandoro. Ti agu aregbo ue re dunduko, Davide adu na wingbaduse ki do fuo agu anya re na ki batasi agu akandoro re. Ono Davide aaberãnga gupai nga ko amangi gipai re ngba gako ome ni tiko te. Ko aima ino gupai nga Yekova du naundo ko. (1 Sam. 17:34-37) Bangiri Davide aagonga ti agu apai namangiko re te. Pa berãko kurii gupai re aima undo ko ko du na gu kido nga unga Mbori nika nyakasa ko anyakasa kumbatayo.

7. Ginipai Davide agbe berãko kuti ni, na tipagine gupai re aundo ko ti ni ko sovura na Goriata?

⁷ Kusa, ho Davide adu ni kindi ni paranga gude mbata fu garãko da nga 20, ko andu ku rogo gu bataya agu abanzengere nga ga aYisaraere yo adu rogoho. Ko andu ki bi gupai nga abanzengere aagunde agunde bambiko gu ngburunga Fereseto rimoko angia Goriata ‘apayasi pa ga aYisaraere arikavura.’ (1 Sam. 17:10, 11) Agu abanzengere re aagunde agunde bambiko i aagbe berãyo kuti wai bakio Goriata adu na agu apai ko aagumbaha fuyo. (1 Sam. 17:24, 25) Ono tie, Davide aagbe berãko kuti kurapai kia. Davide aima ino gupai nga, ho Goriata apayasi agu abanzengere ni nangia ga aYisaraere yo, gure nga ko aasenga gu “arikavura nga ga unga Mbori.” (1 Sam. 17:26) Davide aaberã tipa Yekova. Davide aima du na gu kido nga gu Mbori naundo ko ho ko adu ni ni babanda akandoro nika undoko aundo berewe ti gi regbo re. Ni rengo, mbiko ga Mbori undo, Davide asovura na Goriata na ki di beko!​—1 Sam. 17:45-51.

8. Ginipai rengbe ka nyakasa gaani kido nga Yekova nikaa undo rani aundo? (Oni bi sura a.)

⁸ Ani ima rengba a ka hi aˈasada ka ani tingidi gupai nga gu Mbori du ni ungako regerege ka undo rani. (Tam. 118:6) Ani ima rengba ka nyakasa gu gaani kido nga Yekova nika undo rani aundo ni berã ani kuriipa gupai ko amangihe mbata kusayo. Mo gedi agu apangbanga du rogo Baibiri yo nga gu natingida ro na pa wai Yekova abatasi airisiko mbata kusayo. (Yes. 37:17, 33-37) Berewe a, mo gedi watadu ka bi agu atingidapai du rogo gaani bangiriba nga ga Internet nga jw.org nga gu nayugopa wai Yekova naundo awirinarani ti gi gaani regbo re. Kurigure, mo tingidi pa agu aregbo Yekova amangipai foro. Isoke, mo nabihe nga Yekova amanganga pai foro ngba iiriwo gene wa gu nga ka batasa ro be bahu watadu urusi te. Gu rengo duho nga, Yekova ima manga badungu apai foro rogo gamo raka yo! Ko ima yamba ro tipa mo da ni bakureako. (Yo. 6:44) Zavura awere, mo nairisoko kindi mbiko gako undohe. Sidu, mo sana Yekova tipa ko undoro mo tingidi pa agu aregbo ko akaragapai kuti gamo akparakpee, ko afu kina boro guhe foro mo aaidaha ti kina boro wene regbo, watadu ko angerefuo ro ti kpakarakpakara regbo. Pa berã mo kurii agi apai re nika nyakasaro mo du na gu kido nga Yekova nikaa ndu kindi kumbatayo kaa undo ro.

9. Ginipai si aida ani tingidihe ho ani agbiatirani ni na aˈasada? (Asanza 27:11)

⁹ Ho ani agbiatirani ni na aˈasada, si naida ani gbeberã rani kuti gupai du na nyanyakipaha gbe. Bakitingbanga nape gupai nga, ho ani agbiatirani ni na akpakarapai, ani nambu Yekova ambu. Sidu, gu gene ani amangapai ngbaha kuti gaani aˈasada na kina maapai kurii Yekova. (Eyo. 1:10, 11; oni gedi Asanza 27:11.) Ono ho ani anye ni niruru rani fu Yekova ani ki vura kaa gbiatirani na aˈasada, ani nayugo gaani nyemuse koyo du Yekova ni na ki yugu Bakitingbanga ni iraziree. Si rengbe kadu nga mo naraka rogo gu ba airangbii asoga ga Yekova aboro asoga rogoho, si rengbe kadu nga mo na kpakarapai nga ga zingo marã, watadu agu aboro mo atungusapai fuyo na nyemu wene pangbanga te, watadu isoke, mo narungo be gu kura apai ngba kura gene. Ka ngia wo duhe, mo tingidi gupai nga agu apai mo agbia tiro na ni re nafu momu foro tipa mo sa kpoto Yekova yo si du na ngbarago. Mo tingidi gupai a nga, ko ambunga ro i asadi ro susi gu kaa fu rii omero te. (1 Kor. 10:13) Ko nika fu gu ome foro mo aidaha tipa ka hipai.

UNGA MBORI NIKA FU MOSORO AFU FORO

10. Ginipai unga Mbori nika mangaha fu agu aboro nairisoko?

¹⁰ Yekova ti aregbo dunduko nafu mosoro fu agu aboro nairisoko. (Eb. 11:6) Ko nafu zereda na rengbabepai awere furani na ko nika fu nyenye unga furani kumbatayo. Ani ima du na gu kido nga, Yekova naida ka fu mosoro furani na ome kina beko tipa ka mangaha wo. Mbiko gi ndupai re, ani nandu kindi kumbatayo kaa manga gupai rengbe ome rani na ni ti ngba irisoko kina wai gu gako amoyambu naadu mbata kusayo amangihe. Gure du nga gupai Timoteo amangihe.​—Eb. 6:10-12.

11. Tipagine Timoteo aamangasunge nyanyaki ti ni rogo dungurati? (1 Timoteo 4:10)

¹¹ Oni gedi 1 Timoteo 4:10. Timoteo adu na nyanyaki idapase kuti unga Mbori nga ko nika fu mosoro afu fuko. Gure du nga ndu gupai ko amangisunge ti ni nyanyaki fu Yekova na fu kura aboro. Ginipai ko amangihe? Gu mokedi nangia Pauro angarasiko tipa ko da ni wene bayugupai gene tungusapai yo na rogo dungurati. Pauro ape gupai fuko nga, si naida ko du ni wene kpiapai fu akurako aidipase, gu paranga yo na gu sosono yo. Pauro afu nyanyaki sunge a fuko nga gu naakoda fu nyanyaki rugute ono rogo nyemuse yo fu agu aboro si aaida i fuhe fuyo. (1 Tim. 4:11-16; 2 Tim. 4:1-5) Ti kura aregbo, kura aboro aabingo gu nyanyaki sunge Timoteo aamangaha te watadu i aadunga na tambuahe tipaha te, ono ko aima du na gu kido nga Yekova nika fu mosoro afu fuko tipaha.​—Rom. 2:6, 7.

12. Tipagine abaakumba amangasunge nyanyaki ti ni rogo dungurati? (Oni bi sura a.)

¹² Abaakumba ima rengba kadu areme a na gu kido nga, Yekova nabi gu sunge abi i amangaha na nyanyakipaha. Kupati fu wasa fu awirina, yugopai, na tungusapai, dungu abaakumba naundo aundo na sunge mekaarago gbiati fu undo ti rago gberãngo. Aguyo namangasunge na agu aRondo Du Tipa Biko Aborokaza watadu gu Rondo Du Tipa Sakapai na Amunganga. Abaakumba ima ino gupai nga ga Yekova dungurati du angianga ga aboro ya. Ni sangbanaha, i namangasunge nyanyaki rogo dungurati na kidu na gu kido nga Mbori nika fu mosoro afu fuyo tipa gayo sunge.​—Koro. 3:23, 24.

13. Waigu Yekova abi agu aome ani amangaha ti ngba irisoko?

¹³ Anga aboro dunduko rengbe kada ni abaakumba te. Ono ani dunduko ima rengba ka fuhe fu Yekova. Gaani Mbori na ngbarago ho ani amanga ome ni kaa irisoko. Ko nabi wai abi ani afu gaani agamahe tipa gu sunge namanga rogo zegino dunduko ka si vura umba kina wai vurũ. Ko na bakere ngbarago ho ko abi rani ni ani tumba berani ti regbo adunguratise ka fu karagapai si ki vura du nga zee namanga rani amanga na ho ani ambupai ni fu agu aboro naimisa rani. Ka si vura du nga mo nabihe nga gupai mo amangaha fu Yekova ni toonihe, mo du na gu kidonga Yekova nabi gupai abi mo amangaha re na nyanyakipaha. Ko ima kpinyemuro tipa kina gupai mo amangaha re, na ko nika fu mosoro afu foro tipaha.​—Rk. 21:1-4.

ONI NYE MBEMBEDI NA UNGA MBORI

14. Waigu pa nye ani mbembedi na Yekova aundo rani ani nye ni rururani? (Oni bi sura a.)

¹⁴ Ka ani du na mbembedi pabakure na Yekova, si nika du furani taata tipa ani nye ni rururani fuko. Gure nga gupai namangi tipa Yosefa. Ko aru nyanyaki ka kà wasiwasi kodaba. Ko aima inoho nga si nika ba gberãrago ti Yekova. (Bam. P. 39:9) Tipa kadu na mbembedi pabakure na Yekova, si naida ani gbia regbo ka kpara fuko na ka wisigo Fugoko. Rogo gi gene re, gaani pabakure na ko nika sona. Ka gaani pabakure du mbembedi na Yekova wa ga Yosefa, ani adunga na nyemu ka manga gupai nika ba gberãrago tiko te.​—Yak. 4:8.

15. Ginipai rengbe ani ka wirikaha ti gupai namangi aYisaraere ngbakungbo yo? (AEbere 3:12)

¹⁵ Agu aboro mbu kido kuti Yekova, si taata fuyo i zanga du ni ruruyo fuko. Ani bingo gupai namangi tipa aYisaraere ho i adu ni ngbakungbo yo. I aima ino gupai nga Yekova kina ti ni, ono i atona kaa kapa singia ko rengbe ka ngerafuo gayo azingo. Zavura i asanahe nga: “Yekova dagba rani watadu ko ho te?” (Gate 17:2, 7) Ni sangbanaha, i asamungu kuti Mbori. Nirengo, ani aidanga ka pekafuo gayo gbegberẽ kpiapai te.​—Oni gedi AEbere 3:12.

16. Ginipai rengbe ka asada gaani idapase?

¹⁶ Zegino nasaha ni kpakarakpakaraha furani tipa ani nye mbembedi na Yekova. Badungu aboro nakà ka ida gupai nga Mbori kina ti ni. Dedede, raka agu aboro amanganga pai kuti ga Mbori arugute ya ima rengba kaa ngera wa si wenengai. Ho ani abi gipai re ni si nimangi, gaani idapase ima rengba kadu ni asadiasadihe. Wa vura duhe nga ani ima ida kuti gupai nga Mbori kina ti ni, ani ima rengba ka tona kaa kapa singia ko aundo rani. Bake papara Atambuahe 73 aima tona bakabangiriko tipa gipai re. Ko abi gupai nga, agu aboro naamanganga pai kuti ga Mbori andiko ya aagbia ngbarago agbia rogo raka yo. Ni sangbanaha, ko atona kaa kapa singia si wenepai kaa iriso Mbori.​—Tam. 73:11-13.

17. Ginipai nika undo rani ani nye mbembedi na Yekova?

¹⁷ Ginipai naundo gu bake papara Atambuahe re ko aria berãko? Ko aberẽkurii pa gupai rengbe ka manga agu aboro nambu kido kuti Yekova. (Tam. 73:18, 19, 27) Ko aberẽ a kurii pa agu amaku naye ti iriso Mbori. (Tam. 73:24) Ani ima rengba a ka berãkuriipa agu amaku Yekova nafuhe furani. Na mo bingo wai ka raka rani nidu kia ka si nidu nga ani airisongo Yekova te. Ka ani tingidi ndu gupai duhe ti ni ni wenepai ka iriso Yekova, si nika undo rani tipa ani nye ni rururani fuko na ani nika du wakina gu bake papara Atambuahe nga guko naya: “Si ni wene he fere ka mbeda na Mbori.”​—Tam. 73:28.

18. Tipagine si aidanga ani gunde be agu apai nika manga kumbatayo ti ni ya?

¹⁸ Ani ima rengba ka hi ai agu akpakarapai rengbe ani ka gbiatirani na ni rogo gi yangara arame re bambiko ani namangapa “unga Mbori nga irarengo.” (1 Tesa. 1:9) Gaani Mbori naberãpa rani aberã na ko nikaa undo rani ti aregbo dunduko. Ko aima undo gu gako amoyambu naadu mbata kusayo na ko naundo rani aundo areme a. Ani nika gbiatirani barambeda na bakere gberãngbi nga gu nika manga auru kpotosende. Ono ani adunga nisarani te, Yekova nika du na kina rani. (Yes. 41:10) Sidu, ani dunga adu dunduko na ngarã “wenengaĩ ki ya, ‘Gbia nga gimi mounda; mi agúnde nga wa sa te.’”​—Eb. 13:5, 6.