Mo Wiriki Wai ka fu Wene Arugute fu gu Kura Aboro

1. Da si aida ni fu rugute? Oni sakingo rogoyo.

YA MO mo nidu na nyemu ka fu rugute fu kura aboro? Gipai re taata fu kura aboro tipa ka mangaha wo. Ono kura aboro ni naagunde agunde ka fu rugute fu aboro watadu rago ni naangbanga tiyo ka fu rugute fu aboro te. Ka apai vura du wai tipa rani vurũ, ani dunduko si aida aida ani fu rugute ti kura aregbo. Tipagine? Bambiko gure nga gu gene ani ayugo nyemuse ngbaha fu awirinarani. Yesu ape gupai nga, si naida ani kpinyemu akuarani ka ani aida kadu ni gako abawiriki. (Yo. 13:35) Berewe a, Baibiri nape gupai nga ho ani afu ndikidi rugute ni fu akuarani, gure nga ani nanyakasa gaani pabakure.”​—Snz. 27:9.

2. Ginipai si aida abaakumba du na rengba ka mangaha, na tipagine? (Oni bi gu sanduki a nga “Rugute ti Regbo gu Dunguratise Nga ga Bebere Poso.”)

² Si naida abaakumba ini wai ka fu wene arugute fu kura aboro. AYekova na Yesu du sia agi akumba re tipa i naangerafuo dungurati. (1 Pet. 5:2, 3) I nangerafuo rani ho i amanga agu agumbapai ni du na wene arugute rogoyo du rogo Fugo Mbori yo. I nafu arugute a furani ho ani aidaha ni. Na i naundo agu aboro niima mbu Yekova tipa i karagatiyo ku rogo dungurati. Waigu rengbe abaakumba, kodihe na ani dunduko ka fu wene arugute?

3. (a) Waigu rengbe ani ka wirika kadu ni wene abafurugute? (Yesaya 9:6; oni bi gu sanduki a nga “Oni Wiriki Yesu ho Oni Afu Wene Arugute Ni.”) (b) Ginipai ani nika sakapai tipaha rogo gi kekeapai re?

³ Ani ima rengba ka wirika badungu apai tipa wai kadu ni wene abafurugute ni wisigo ani gu kpiapai du rogo Baibiri yo, gu susi gbe nga ga Yesu. Rimo sa dagba agu arimoyo i niima fuhe fuko nga “Baiiriwo, Barugupai.” (Oni gedi Yesaya 9:6.) Rogo gi kekeapai re, ani nika sakapai tipa gupai rengbe ani ka mangaha ka boro sana rani tipa rugute na gupai rengbe ani ka mangaha ho si aida ani fu rugute ni zanga boro sana rani asana tipaha. Ani nika bi wai abi a nyakipa fu rugute ti wene regbo na ngba wene gene.

HO BORO ASANA RANI NI TIPA RUGUTE

4-5. Ho boro nasarani ni tipa rugute, gini bambata sanahe si aida boro sana tini na ni? Oni funga kpiapai.

⁴ Ho bakureamo asana ro ni tipa rugute, mo ima rengba kadu na ngbarago nga ni nakido akido kuti ro. Na mo ima rengba ka undo ni nibasa. Ono ni bambataha, si naida mo berẽ wenengai na ki rugutiro wenengai na gupai si aida mo fu rugute tipaha fu bakureamo na si naida mo sana tiro nga, ‘Ya mo mi na gu inohe nga gu si aidaha tipa ka fu wene rugute fu bakureami?’ Ti kura aregbo, gu wene gene rengbe ani ka undo ni ngbaha nga, ni zanga ani fu rugute funi, ono kuba gure, ani rengbe ka keda ni fuo gu boro niima rẽ ka fu rugapai nibipa gupai ni aida rugute tipaha re.

⁵ Oni bingo gi kpiapai re. Ani ya nga kere kaza zi mbembedi bakureamo. Ni pe gupai foro nga, ni aima tona manga wetekapai tipa gu ngbatunga gene husa rengbe kadu ho tipa ni, na fuo gure, ni ki sana ro tipa mo fu gamo berãpai tipa gu gene husa mo abihe nga si ngba gbe. Wa vura duhe nga mo ima rengba ka sia gene husa funi, munganga nga mo te na mo agbianga rabahe tipa ka fu husa a te. Rogo gu bangiriba re, gu wene gene rengbe mo ka undo bakureamo ngbaha ka gbata gu boro naima gbia rabahe nga ga husa gu kaza re.

6. Gini wenepai si aida ani mangihe mbata fu ani fu rugute?

⁶ Ti kura aregbo, ani ima rengba ka bihe nga ani ima rẽ ka fu rugute fu bakurearani. Ono tie, si rengbe kadu ni wenepai ka ani afunga gu rugute re nibasa ya. Asanza 15:28 nape gupai nga “Berã ruru boro nawisiga pa karagapai.” Sidu, ka ani vura berã gupai nga ani ima ino gupai si aida ani pehe, si adu ni wenepai ka ani mangi wetekapai mbata, kini mangi kparakpee, na ki berẽkurii gini ngbatunga rugute ani nika fuhe na rubangirise. Ni manga ani gipai re, gaani rugute nika du ringbisihe kina kuti gupai Yekova aida ani pehe. Oni bingo gu kpiapai nga ga gu nebi nangia Natana.

7. Ginipai mo nawirikihe ti gu kpiapai nga ga gu nebi nangia Natana?

⁷ Ho Bakindo Davide aafura ni na gu nebi nangia Natana, Davide ape gupai fuko nga ko aaida ka me yekaru fu Yekova. Natana aruguko ko mangihe nibasa. Ono si aaida Natana di regbo mbata ka sana Yekova tipaha. Tipagine? Bambiko Yekova aaidanga Davide me yekaru te. (1 Peka 17:1-4) Awa gi kpiapai re ayugoho, ho boro asana rani ni tipa rugute, si nipa tatamana furani ani ‘rõasi tirani tipa gumba pai.’​—Yak. 1:19.

8. Gini kura ndupai si aida ani du ti ni na rubangirise ho ani afu rugute ni?

⁸ Ani bingo kura ndupai si aida ani du ti ni na rubangirise ho ani afu rugute ni fu boro: Ka ani fu iraira rugute fu boro, i ima rengba ka bira rani ka gbegberẽpai mangi. Ni rengo, si ni nyanyakipa pai ani berẽ wenengai mbata fu ani fu rugute.

FU RUGUTE HO I ASANANGA RANI ASANA NI TIPAHA YA

9. Ginipai si aida abaakumba inihe mbata fu i fu rugute? (AGaratio 6:1)

⁹ Ti kura aregbo, si naida abaakumba fu rugute fu gu wirina mangi “ingapai” watadu mangi iraira diandue. (Oni gedi AGaratio 6:1.) Boro ima rengba kaa manga mumungo asiapai nga gu rengbe ka sa ni ni mangi kere ingapai. Abaakumba naida ka undo gu boro re tipa ni naandu kumbatayo kindi kaa iriso Yekova na ka raka nyeanye kindi. (Yak. 5:19, 20) Ono tie, tipa gayo rugute re du na ome ti ni, si naida i bi gupai mbata nga gu boro re ima manga iraira diandue. Yekova ima mbu gene furani dunduko ani mangi adiaberã nibipa gaani sangbakpotoseyo. (Rom. 14:1-4) Ono na ka si dunga abaakumba ima ino gupai nga boro ima manga gupai rengbe ka gbarasa gani pagume na Yekova, waigu rengbe yo ka fu rugute funi?

10-12. Ginipai si aida abaakumba mangihe ho si aida i fu rugute ni fu gu wirina asananga he tipa rugute ya? Oni funga kpiapai. (Oni bi asura a.)

¹⁰ Si taata te fu abaakumba i fu rugute fu gu boro asananga he tipaha ya. Tipagine? Pauro ape gupai nga boro arengbanga ka inoho nga ni ima manga iraira diandue te. Sidu, mbata fu abaakumba fu rugute fu gu boro re, kura apai kinaho si aida i mangihe tipa ka saha taata fu gu boro re ni degetuni kuti gu rugute re.

¹¹ Mo berẽnga kurii gi kpiapai re: Basopobino naida ka ru ahe rogo gu sende angbanga tipa ru ahe ya. Mbata fu gu basopobino re tona ru ahe, ni ninaabukio gu sende re. Gipai re narungburasi gi sende re tipa tunga ahe kuru rogoho. Fuoho, ni ki ru gu tunga ahe re. Niyangaraha, ni natuda gu tunga ahe re tipa si kuru. Wakina gure a, kura apai kinaho si aida bakumba mangihe tipa ka saha taata fu gu wirina re ni di rugute kugume. Ni kpiapai, ni nasungudo wene regbo na ki pe gupai fu gu wirina re nga ni naberãpa ni aberã na pai kinaho ni aida ka fura na ni tipaha. Ka si du nga aboro ima ino gu boro nafu rugute ni gu boro du nakpinyemu aboro akpi na kini mangipai na aboro rogo weneringise yo, si nika du taata fu kura aboro i di rugute beni.

¹² Ti regbo gu sakapai re, gu bakumba re ima rengba kaa ndu kumbatayo kindi kaa saha taata ni peko gupai fu gu boro re nga, aboro dunduko ni naamanga aingahe amanga na naida aida na arugute ti aregbo dunduko. (Rom. 3:23) Rogo zezeredi fugo na rogo irisa yo, gu bakumba re nayugo wai funi rogo Baibiri yo ni namangi gu diandue du ni irairaha. Bara sa kindi gu wirina re aino gupai nga niima manga ingahe, gu bakumba re nasaka gupai funi gbaiga si aida nimangihe ka manga ariapai. Ti digido gu fugodagbase re, gu bakumba re nasaha taata fu gu wirina re tipa ni idi kuti gu rugute re nipe ni pa gu wene apai gu wirina re ni naamangaha, na ni manga ni kparakpee wa sa na ni.​—Yak. 5:15.

13. Waigu rengbe abaakumba ka yugo gupai nga gu boro i afu rugute funi ima rugatini na gu rugute re?

¹³ Ti kura aregbo, boro arengbanga ka rugatini wenengai na gu rugute i afuhe funi te. Ginipai rengbe abaakumba ka mangaha tipa kadu na gu kido nga gu boro re ima rugatini na gupai i agumbaha? I ima rengba ka gbeberã gu boro re kuti gupai i aida ka pehe ni mangayo sunge na asanahe rogo tatamana yo. (Batu. 12:11) Ga gu boro re akaragapai naundo gu boro nafu rugute tipa ni inihe nga gu boro re ima rugatini na gu rugute ni nafuhe funi re.

FU RUGUTE TI WENE REGBO NA NGBA WENE GENE

14. Ya mo si naida ani fu rugute ho du ani ni na zinga? Oni sakingo rogoyo.

¹⁴ Ani dunduko nga kpakpa aboro, sidu, ti kura aregbo, ani ima rengba ka manga gupai watadu ka pe gupai rengbe ka ba gberãrago ti kura aboro. (Koro. 3:13) Baibiri nape gupai nga ti kura aregbo, boro ima rengba ka pe gupai watadu ka manga gupai rengbe ka sarani ani zingi. (Ef. 4:26) Ono si aidanga ani fu rugute ho du ani ni na zinga te. Tipagine? Bambiko “gu zinga nga ga boro si amanga nga gu rurupai nga ga Mbori te.” (Yak. 1:20) Ka si du nga ani nika fu rugute ho du ani ni na zinga, si nawiraha nga ani nika gbarasa apai kisusi gu ka ani nimbakadihe. Anga gere nayugo gupai nga si aidanga ani pepa gaani aberãpai na wai du ani fu gu boro imisi rani te te. Ono tie, ani rengbe ka fura ngba wene gene ka si du nga ani nika sungo mbata daho gaani zinga nika zera ni. Ani ima rengba ka wirikapai be Eriu nga gu ko nafu wene rugute fu Eyobo.

15. Ginipai ani awirikaha ti ga Eriu kpiapai? (Oni bi sura a.)

¹⁵ Tipa dungu aˈuru, Eyobo aasadi ka rugapai ku bara ko yo nibipa gu gbegberẽ apai abakureako agumbaha tipa ko. Eriu adegetuko kuti gupai Eyobo agumbaha. Nunga Eyobo aima zio Eriu. Ono ho Eyobo aasadi ka yugo gupai ni nga gbegberẽpai ho ko amangihe te, ko agumba dungu apai tipa Yekova nga gu nangianga rengo ya na gipai re asa Eriu ko zingi nikerehe. Ono Eriu aafuranga nibasa te, ko azeredi, na ki mangipai rogo irisayo ho ko afu rugute ni fu Eyobo. (Eyo. 32:2; 33:1-7) Ani ima rengba ka wirika nyanyakipa pai be Eriu. Si ni wenepai furani ani fu rugute ho adunga ani ni na zinga ya na ki fuhe rogo irisayo na rogo nyemuse yo.​—Batu. 3:1, 7.

ONI NINDU KINDI KUMBATAYO KAA FU RUGUTE NA KAA DIAHA KUGUME

16. Ginipai mo nawirikihe rogo Atambuahe 32:8?

¹⁶ Yekova nape gupai nga “Mi arúga ro ni maa bangire ti ro.” (Oni gedi Atambuahe 32:8.) Gipai re nayugo gupai nga ko nikaa ndu kumbatayo kindi kaa undo rani. Ko nakidohe ka fu arugute furani na ka undo rani ani mangipai kuti ni. Nga gu bawene kpiapai furani! Ho ani aida ka fu rugute ni fu kura aboro, ani ima rengba kaa ndu kumbatayo kindi kaa ngarasayo na kini undoyo tipa i mangi agu adiaberã nga ga tatamana.

17. Ho abaakumba afu gu rugute ni furani du mburuhe rii Baibiri, i nadu wakina gine? Oni sakingo rogoyo. (Yesaya 32:1, 2)

¹⁷ Si naida ani nifu wene arugute na kini dihe kugume kisusi gu nidu mbata. (2 Tim. 3:1) Agu abaakumba nafu agu arugute du mburuhe rii Baibiri wakina “ime rogo gene ime rogo ugurago.” (Oni gedi Yesaya 32:1, 2.) Ani na tambuahe tipa agu abakure nga aguyo akeesa nga ka fu gu rugute furani ani aida na ni ya. Afugo yo wakina “zuzu ngua wa dahabu rogo baga feda yo.” (Snz. 25:11) Ani dunduko naandunga andu kindi kumbatayo kaa sonosa gu tatamana ani aida na ni tipa ka fu wene arugute na ka diaha kugueme.