Ya mo Mo Rengbe ka Gbia Undo Kindi ti Bangua Ayugopai Nga ga Baibiri?

1. Waigu agu ayugopai nga ga Baibiri adu na maapai kurii ro ho mo awiriki rengo ni ni bambataha?

BANGUA ayugopai nga ga Baibiri ima aria gaani raka. Ni kpiapai, ho ani awiriki gupai ni nga rimo Mbori nga Yekova, gu bambata diandue ani amangihe nga ka da ni abakureako. (Yes. 42:8) Ho ani awiriki gu rengo ni du tipa kpikpi aboro, ani aabakanga bangirani berewe singia gu gaani aboro ani azanga yo rogo kpio yo narungo te. (Batu. 9:10) Na ho ani awirikipai ni tipa ga Mbori kidohe tipa paradizo auru kpotosende ane, ani aabakanga bangirani berewe tipa gaani raka kumbatayo te. Ani aima ye ka ino gupai zanga kapa nga ani ima rengba ka raka ni gbangaha, angianga kina tipa guru regbo gbua ya wa agarã​—70 watadu 80​—ono nyeanye kindi.​—Tam. 37:29; 90:10.

2. Waigu 2 Petero 1:12, 13 ayugo gupai nga zavura agu aKristano niima nyaka rogo toro yo ima rengba ka gbia undo ti bangua ayugopai nga ga Baibiri?

² i aidanga bangirani go ti wai du bangua ayugopai nga ga Baibiri na nyanyakipaha te. Rogo gu ue waraga yo gu mokedi nangia Petero akehe, ko akepai fu agu aKristano nadu ‘ni nyakasinyakasi yo rogo rengo yo.’ (Oni gedi 2 Petero 1:12, 13.) Ono ti gu regbo re, gbegberẽ aboro adu rogo dungurati nga aguyo naaida ka nyaga awirina kusayo ti rengo. (2 Pet. 2:1-3) Petero aaida gupai nga ka nyakasa awirinako nga akumba na adee tipa gupai nga i bandatiyo be agu aziree agu aboro re aayugoho. Tipa ka manga gipai re, ko atingidi yo na pa agu apai i aima wirikaha. Agi ayugopai re arengbe ka undo tipa i nye ni ruru yo fu Yekova.

3. Tipagine si aida ti ni aKristano dunduko ndu kumbatayo kaa berãkurii agu ayugopai nga ga Baibiri i awirikihe ni bambataha? Oni funga kpiapai

³ Ka si vura du vurũ nga ani ima iriso Yekova tipa dungu agarã, ani ima rengba kaa gbia undo kindi ti gu bangua ayugopai nga ga Baibiri. Ni kpiapai: Gu boro naima ino pasa riahe wenengai na gu boro nawirika ha kindi ima rengba ka mangasunge na kina gu bangisa aũpasa riahe ho i pasaha ni. Ono wa regbo nikaa susa, gu boro nga gu ni nawirika wai ka pasa riahe ima rengba ka mangasunge na agu aũriahe re ngba vovo agene ni basasa na ki pasi wene riahe. Wakina gure a, agu rani naima iriso Yekova tipa gbanga regbo ima rengba ka wirika apai ni bakiakia kina rogo bangisa averesi ki susi agu aboro nga aguyo tona ka wirika Baibiri. Ngba gini agene? Si nawiraha wa agu apai du tipa rani na agu apai ani amangaha ti ngba ga Yekova sunge ima ariatihe tona kinaho ani azi bapatiza ni. Ho ani aberã ni kurii agu ayugopai nga ga Baibiri ani awirikihe bakuru kusayo, ani nabi vovo agene nga gu rengbehe ka undo rani awere ngbaha. Ani bingo agu apai agu aKristano naima nyaka rogo toro yo narengbe ka wirikaha ti bangua arengo nga ga Baibiri ti baraha biata.

YEKOVA NGA BAKUSIAHE

4. Waigu pa wirika ani gupai nga Yekova nga Bakusiahe adu na maapai kurirani?

⁴ Ani ima ino gupai nga gu Bakusiahe du na tatamana na ome nakusi kpotosende na agu ahe dunduko du rogoho. Baibiri naya: “Gu ko nadua ahe dunduko nga Mbori.” (Eb. 3:4) Ono dungu apai kinaho nga gu rengbe ani ka wirikaha ti gi rengo re. Bambiko Yekova nakusi rani, ko ima ino apai dunduko tipa rani. Ko naberãpa rani aberã na ki ini gupai ngba gbe tipa rani. Sidu, pa ino ani gupai nga Yekova nga Bakusiahe ima aria gaani raka ngba dungu agene nga gu du ni wenehe na ki fu gu raka furani du na rogoyo ti ni.

5. Gini rengo rengbe ka undo rani tipa ani sonosi gu sino nga ga umbasitise? (Yesaya 45:9-12)

⁵ Gu rengo nga Yekova nga Bakusiahe ima rengba ka yugo gupai furani nga si naida ani du na umbasitise. Ni kpiapai, tipa bete regbo, Eyobo ape bete irairaapai tipa Yekova. Bangiriko aima go ti gupai nadu na nyanyakipaha na ko aaberã kina pa tiko na kini asadi ka yugoho nga gako pai nadu ni ruruhe. Ono Yekova atingidi ko na gupai nga Ko nga Bakusiahe du na tandu apai dũ. (Eyo. 38:1-4) Gure aundo Eyobo ko ini gupai nga agu apai dunduko Yekova amangaha ni ruruhe ti aregbo dũ. Ringbisihe kuti gipai re, gu nebi nangia Yesaya ake gupai nga: “Ka pere ya fu gu ni name he, ‘Gini he mo amanga?’”​—Oni gedi Yesaya 45:9-12.

6. Gini regbo si aida nzunzu ani berẽpa wai du gaani Bakusiahe na tatamana ki du na ome ti ko? (Oni bi sura a.)

⁶ Ho boro naima iriso Yekova ni tipa dungu agarã, ni ima rengba ka tona kaa kido kina kuti gani aberãpai kuba gupai nga ni ngere koyo du Yekova gbiati Fugoko tipa rugapai. (Eyo. 37:23, 24) Sidu, waigu si aundo ni tipa ni berẽ dudunguro tipa Bakusi ni nga Yekova na wai du ko na tatamana na bakere ome ti Ko? (Yes. 40:22; 55:8, 9) Gi bangua rengo re ima rengba ka undo ni tipa ni ini gupai nga ga Yekova aberãpai nyakipaha kisusi, na gipai re nika undo ni tipa ni du na umbasitise.

7. Ginipai Rahela amangihe tipa ka idakuti vovo rugapai?

⁷ Berãkurii gu rengopai nga Yekova nga Bakusiahe, aundo Rahela nga gu ri naraka Slovenia yo, tipa ri idi na agu aˈariapai namanga rogo ga Yekova riigbu. Ri ape gupai nga: “Ti kura aregbo, si naadunga fere taata tipa mi idi kuti agu adiaberã agu aboro nangbembatayo amangaha te. Ni kpiapai, ho mi abi gu Tingidapai be Riigbu Bipasunge nga ga 2023 #8 ni nibipa funosi maingba, si aangera fere ni irairapai ka bi wirina ti bambata regbo ko nimangi gumbapai na maingbako ti ni. Sidu, mi akparikpee fu Yekova tipa ko undore mi idi kuti gu ariapai re.” Rahela aye ka ino gupai nga bambiko gupai nga Yekova nga Bakusiahe, ko ti aregbo dũ ima ino gu wene gene ko anungusa gako riigbu ngbaha. Ka mo bihe nga si ima kpakara tipa ka ida kuti vovo giarogopaiyo wa vovo rugapai, mo di regbo tipa ka berãkuriipa wai du Bakusiahe na tatamana ki du na ome ti ko.​—Rom. 11:33-36.

GU NDUPAI MBORI NAMBUGENE TI NI FU ARUNGO

8. Waigu ani nagbia undo ni wirika ani gu ndupai Mbori nambugene ti ni fu arungo?

⁸ Tipagine Mbori nambu gene ti ni fu arungo? Gu kura aboro ainongo karagapai kuti gu sanahe re ya, ima zinga kuti Mbori watadu ima dakuti gu digisopai nga Mbori ti ni te! (Snz. 19:3) Ono mo ima wirika gupai nga aboro narungo na kini kpiki bambiko zangarengba, angianga mbiko gupai nga Yekova du mangi gbegberẽpai ya. Mo ima wirika gupai a nga bambiko Yekova na zerangbaduse na ko ata digisongo arungo te, dungu amirioni aboro ima rengba ka ye ka ino ko na ki wirikipai tipa wai ko nika digiso arungo. (2 Pet. 3:9, 15) Pa ino mo gu ndupai Yekova nambugene ti ni fu arungo ima fu wasa foro na ki saro mo mbedi na ko.

9. Ti gini aregbo si narengbe ka ida ani fugu agu andu apai Yekova nambugene ti ni fu arungo si mangi?

⁹ Ani ima rugutirani na ni nga si naida ani du na zerangbaduse wa ani nikaa sungudo Yekova tipa ko digisi arungo. Ono ho gu boro ani akpinyemuni akpi ni, na ho ani na gaani aborokporo agbiatirani ni na akpakarapai, watadu ho boro namangi rani ni gbegberẽ, ani ima rengba kadu na gberãrago bambiko ani nabihe nga Yekova nadia gbanga regbo tipa ka digiso arungo. (Abak. 1:2, 3) Ho ani abihe ni wa gure, si ni wenepai furani tipa ka wisigo gu nduapai Yekova nambugene ti ni fu arungo.a (Tam. 34:19) Ani ima rengba a ka berãkurii gako ringbisapai tipa ka digiso arungo nyeanye kindi.

10. Ginipai naundo Anne tipa ri gbia wasa tingbafuo kpio nari?

¹⁰ Pa ino ani gu nduapai Yekova nambugene ti ni fu arungo ima rengba ka undo rani tipa ani hi akpakarapai. Anne, nga gu ri naraka rogo gu kisanga nga Mayotte du Indian Ocean yo ape gupai nga: “Pakpio nina bete agarã kusayo asa re mi du na bakere gberãrago. Ono tie, mi anaatingida tire na gupai dedede nga anga Yekova du naye na gimi arungo te. Ko regerege ka digiso arungo naabaha na ki zingisi gu gaani aboro ani akpinyemuyo nakpiki. Berãkurii agi arengo re nasa re mi du na zereda nga ga berãse yo na kina iriworago nati tire.”

11. Waigu pa ino ani gu nduapai Yekova nambugene fu arungo ti ni narengbe ka undo rani ani naandu kumbatayo kindi kaa tungusapai?

¹¹ Pa ino ani gu ndupai Mbori nambugene ti ni fu arungo ima rengba ka fõ kpotoraniyo tipa ani ndu kumbatayo kindi kaa tungusapai. Tingbafuo Petero sakipai nga Yekova na zerangbaduse bambiko gupai nga ko naida aboro saberãyo na ki bati, Petero ake gupai nga: “Oni ka du ni gini ngbatunga aboro tipa manga ziazia apai na sinombori?” (2 Pet. 3:11) Pai sa dagba “sinombori” nga gaani sunge tungusapai. Ani nakpinyemu aboro wakina Barani. Ani naida gupai nga i raki rogo ga Mbori vovo zegino. Bambiko ga Yekova zerangbaduse, ko nafu momu fu agu aboro du rogo gaani dagbarago i ye ka irisoko. Mo na bawene momu bero ka du ni ga Mbori badiasunge na ka undo dungu aboro wa rengbe omero na ni i wiriki rengo mbata fu digido rago ye!​—1 Kor. 3:9.

ANI NARAKA ROGO “KUSA RAGO”

12. Waigu pa wirika ani gupai nga ani naraka rogo ‘yangara arame’ naundo rani?

¹² Baibiri ima pe pa wai aboro nika du rogo “kusa rago” watadu yangara arame. (2 Tim. 3:1-5) Ho ani abi gu mangaapai ni nga ga gu aboro du pati rani, ani ima rengba ka bihe gbaiga nga gupai Baibiri apehe nga rengo. Ani nabi ga aboro mangapai na gayo abipai si ni gberẽ kina kumbatayo. Gipai re nasarani ani idi kuti gupai zanga kapa nga Fugo Mbori nga rengo.​—2 Tim. 3:13-15.

13. Ringbisihe kuti ga Yesu kpiapai du rogo Ruka 12:15-21, gini asanahe rengbe ani ka sana tirani na ni?

¹³ Ani namangapai kuti gu rengo nga ani naraka rogo yangara arame ni manga ani pai ni ipiipihe. Oni bingo gupai rengbe ani ka wirikaha ti mangapai ni ipiipihe ti ga Yesu kpiapai du rogo Ruka 12:15-21. (Oni gedihe.) Tipagine i ayambu kumukokumuko kumba ti ni nga “Iramungo”? Si aadunga wa gure bambiko ko angia irakumuko te, ono bambiko ko aperesipa agu apai mbatayo paha aanyakanga ya. Ko aadungura “ũkumuko tipa tiko ono ka [ko] akumuko nga fu Mbori ya.” Pa mangako sunge na gako regbo zanga tatamana angia kere ingahe bambiko gu regbo nanye fuko adu ni kina guruhe. Mbori aya fu gu kumba re we: “I adía mbisimoro adia ni gi yuru re.” Waigu gi pangbanga re narengbe ka undo rani areme? Kina bete regbo nye koyo tipa digido zegino ye. Sidu, si ni wenepai ka sana tirani nga: ‘Ya mo asasa bere nga gu nayugo gupai nga mi namangasunge na gimi regbo na tatamana? Gini ngbatunga asasa mi naaundo awire tipa i moihe? Ya mo mi namangasunge na gimi ome, regbo, na marã tipa ka dungura aũkumuko tipa tire watadu ka dúngura aũkumuko ku ngbangbaturũ yo?’

14. Waigu ga Miki pangbanga aundo rani ani bi gu ndupai duhe ti ni ni nyanyakipa pai furani ka tingida gupai nga ani naraka rogo yangara arame?

¹⁴ Ho ani aberã ni dudunguro kurii gu rengopai nga ani naraka rogo yangara arame, si ima rengba ka undo rani ani ini gini adiaberã si aida ani mangihe. Gure nga gupai namangi wirina ni dee du rimori nga Miki. Ri ape gupai nga: “Ho mi anyasi sinia (secondaire) ni, mi aaida ka gbia gu sunge nga gu narengbe ka undore mi wirikipai tipa anya. Mi aima du a na gu sasa nga ka mangasunge abazakigene na ka ga ku rogo gu ba du na bakere zingo rogo. Gu kura awirina rogo gimi dungurati ape gupai fere nga mi berẽ wenengai singia si adu taata fere mi mangi gu sunge nga gu mi aida ka mangaha re na ki du na rengba ka mangasunge a ni nazakigene watadu ka ga kurogo gu ba du na bakere zingo. I atingidi re na gupai nga gi sino raka re nika digo adigo barambeda. Ono i atingidi re a na gupai nga rogo vovo zegino, Mi nika wirikapai nyeanye kindi tipa anya. Sidu mi adiberã ka mbu wirika gupai narengbe ka dia bakere regbo re. Kuba gure, mi adiberã ka wirika gupai narengbe ka dia re na kina bete regbo na nga gu mi arengbe ka wirika wene abirĩ sunge ti ni. Gure ambu gene fere mi gbia gu sunge narengbe ka songoda re rogo sunge abazakigene na kusa mi andu ku Ecuador yo, nga gu ba nadu na bakere zingo.” Miki na kumbari namangasunge biko adungurati awere rogo gu ringara re.

15. Waigu gu kpiapai nga ga Yakoba aundo rani ani bi ndu gupai si aidanga ani mbu agu aboro ata yugongo nyemupai tipa wene pangbanga ti ni ya? (Oni bi sura a.)

¹⁵ Si aidanga rago gberẽ tirani ho aboro aká wene pangbanga ni ti bambata regbo te. Aboro ima rengba ka manga ariapai. Oni berẽnga kurii gu kpiapai nga ga gu wirina Yesu nangia Yakoba. Ko abi wai Yesu aasona, ki da ni Masiya, na kini yugupai ngba gu gene kura boro aayugongo pai mbata ngbaha ya. Ono tie, tipa dungu agarã, Yakoba aapeka nga fuo Yesu te. Ko ada ni bawiriki sa fuo i zingisi Yesu be kpio. Ni rengo, Yakoba ada ni gu bawiriki nadu zaaza!b (Yo. 7:5; Gara. 2:9) Si ni nyanyakipa pai tipa ka mo mbunga agu agumero nga aguyo ata yugongo nyemupai ya na si naida mo tungusipai fu aguyo naadeganga tuyo mbata foro ya. Mo tingidi gupai nga ani naraka ti yangada arame, sidu si naida ani mangisunge tungusapai ni ipiipihe. Gupai mo apehe fuyo awere ima rengba kadu na bakere maapai kuriyo kusa, zavura fuo bakere gberãngbi tona.c

ONI DU NA TAMBUAHE TIPA GA YEKOVA TINGIDAPAI

16. Waigu mo nagbia undo ti ga Yekova atingidapai? (Oni bi gu sanduki a nga “Mo Mangisunge na ni ka Undo gu Kura Aboro.”)

¹⁶ Bete gu bangua yugopai nga ga Baibiri gaani riigbu akusaha, si tipa ka undo agu aboro ini wiripai tooni gbua tipa Baibiri. Ni kpiapai, gaani agumbapai gbaiga i naamangaha na aposo dũ, kura kekeapai na avidio rogo jw.org, kodihe na gaani amagazini, i ambakadihe gbe tipa agu aboro angianga aDezire Yekova ya. Wa vura duhe wo, ani nagbia undo agbia a ti agu atingidapai re. Si nanyakasa gaani nyemuse tipa Yekova, na kini nyakasi gaani idapase kuti Fugoko, na ki ni undo rani ani yugu rengo ngba wene gene fu gu kura aboro.​—Tam. 19:7.

17. Rogo gini abangiriba si aida mo berẽkurii gu bangua ayugopai nga ga Baibiri?

¹⁷ Tipa agu rani naima digo niirisi Yekova tipa gbanga regbo, ani na bakere ngbarago ho ani agbia vovo giarogopai yo ni nga ga gu rengo du rogo Baibiri. Ono tie, ani na bakere tambuahe a tipa gu tonatona ayugopai nga ga Baibiri nga gu nagbe rani ku rogo rengo ti bambata regbo. A wa ani nawirikihe, agi arengo re ima rengba ka undo rani awere. Ho ani agbia rugapai ni be riigbu ono ani kini berẽ gupai nga gaani berãapai watadu gaani gene mangaapai ngba gbe, ani natingidapa gupai ni umbasitise nga Yekova, gaani Bakusiahe du na tatamana ki du na bakere ome kisusi nafu rugapai fu gako riigbu. Ho ani watadu gu boro ani akpinyemuni ahi aasada ni, ani ima rengba ka du na zerangbaduse na ki ni berẽkurii gu ndupai Yekova nambugene ti ni fu arungo. Na ho ani amanga diaberã ni tipa wai si aida ani mangisunge na gaani regbo gbiati agu ahe du berani, ani natingida gupai nga ani naraka ti yangara arame na gu regbo nye koyo ni guruhe digido rago ki da. Agu atingidapai nga ga Yekova ni ndunga andu kindi kumbatayo kaa sarani ni airatatamana na ani kini ndu kumbatayo kaa irisoko ni ruru rani.