Kere Ugure—Ginipai Baibiri Ayugoho?

• “Gu ringara nga China ape gupai nga, rogo gi garã re, rago ima faa yo ‘nikerehe’ gbiati zingo mai susi gu niidu mbata.”—The Guardian, Mbirinvuo 7, 2022.

• “Agu agarã biama ti kina genehe nika ye kumbatayo, apapara Afirika nika mbu nikerehe be kere ugure.”—UN News, Buza 26, 2022.

• “Kerepai kinaho nga ga ugure rogo dungu papara arago Putu yo, na si nangera wa ka i ya si nika ngia kere ugure kisusi.”—BBC News, Buza 23, 2022.

Badungu abangbasia abainipai nape gupai nga, ngbatunga gu ugure re nikaa ndu kindi kumbatayo kaa manga na si nika gberã kisusi. Ya mo maabangirise ho nga apai angba kumbatayo nzunzu? Ginipai Baibiri ayugoho?

Ugure gbiati gu sangbaanebi nga ga Baibiri

Baibiri aima gumba gupai kumbatayo tipa gaani regbo nga:

• ‘Bakere angbongi nika du. . . rogo agu arago.’—Ruka 21:11.

Dedede, ugure ninaaye na bakere zingo riahe. Ngbatunga gu bakere zingo riahe re, naye na arungo, gbiati kpio, si kini digisi gu sangbanebi nga ga Baibiri.—Yugoti 6:6, 8.

Tipagine ugure akio ti ni kina kumbatayo

Baibiri nape agu andu apai ugure akio ti ni kina kumbatayo. Si naya:

• “Anga si fu gu boro nata tipa ka ruga gani diandue te.”— Yeremaya 10:23.

Gipai re nayugo gupai nga aboro arengbanga kadu na diabese “ka ruga [gayo] diandue te,” watadu ka zoga tiyo ni tiyo te. Gayo gbegberẽ adiaberã dedede ninaaye na ugure gbiati bakere zingo riahe.

• Badungu aboro birĩ-inohe ima ida kuti gupai nga, agu apai aboro amangaha naye na kere faarago, na ni sangbanaha, ugure ima kio rogo zegino dunduko.

• Gu mangaapai nga ga aboro-ngbaduse gbiati agu aboro namanga adiaberã zanga i berẽpa kumbatayo, nasa gupai nga i nagbarasa abure, kini gberesi wege, na kini mangisunge na agu ahe Mbori akusihe ngba gbegberẽ gene. Ni sangbanaha, ani ima rengba ka zanga nyanyakipa kikindigi aime.

Ono tie, Baibiri nafu maabangirise.

Ya mo maabangirise ho nga apai angba kumbatayo?

Baibiri nakidohe nga, Mbori nika mangapai amanga kuti gu zingo ime du awere re. Ngba gini gene?

1. 1. Mbori nika “gbarasa agu yo nagbarasa kpotosende.” (Yugoti 11:18) Ko nika dia agu aboro adia kusayo nga aguyo nasa gupai nga kere zingo ime ninaamanga—nga gu gbegberẽ aboro-ngbaduse nga aguyo gayo mangaapai agbarasa kpotosende.—2 Timoteo 3:1, 2.

2. 2. “Gu ngume nakĩ imaima asa tihe ni munga.” (Yesaya 35:1, 6, 7) Mbori nika mbakada agu apai dunduko ugure naye na ni na ki sa gi kpotosende re ni paradizo na ime kidu ni bakerehe.

3. 3. “Mo nangera ku kpotosende no ki nikedi mai ku auru he, mo ninakumukosi he gbe.” (Atambuahe 65:9) Mbiko ga Mbori amaku, kpotosende nika du na wene ariahe gbiati gigiri ime fu aboro dunduko.