Ya Mo Si Rẽarẽ Boro du Rogo Riigbu Pambori?

Gu karagapai nga ga Baibiri

Ii, mbiko Mbori naida aboro dunguratiyo tipa ka irisoko. Baibiri naya: “Ani bérẽ pa akuarani ka nyakasa yo kuti nyemuse na wene mangaapai ka ani hé nga dungura tirani na akuarani” ya.​—AEbere 10:24, 25.

Yesu ayugu gupai nga apefuoko nika du ni dunguradungura yo ku rogo riigbu ho ko aya ni fuyo wẽ: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yoane 13:35) Gu bangua gene si aidi ga Kristio abawiriki yugu gi nyemuse re ngbaha nga kaa kodatiyo na akurayo aidipase. Si adu nga i nika du ni mbakadimbakadi yo ku rogo adungurati tipa kaa kodatiyo dedede tipa irisombori. (1 AKorindo 16:19) Si adu nga i dunduko nika kusa gu riigbu nga ga awirina du rogo zegino dũ.​—1 Petero 2:17.

Dungu apai gu duho si aidaha kupati gu nga ga du ni boro pambori

Wa vura duhe nga Baibiri nayugo gupai nga si naida aboro dunguratiyo tipa ka irisombori, si ayugongo gupai nga boro rengbe ka sa ngbarago ti Mbori gbua nidu ni ni papara gu riigbu pambori re te. Tipa Mbori idi na boro, si naida gani pambori du namaapai kurii gani raka na a′uru dunduko. Ni kpiapai, Baibiri naya: “Ziazia idapambori barangba gaani Mbori, Barani, nga gu agberã nga ya nga gere, nga ka ndu ka bi awirinyaure na adekurugbo rogo gayo rungo, ki nibanda tini be zegino, ka birikoho adu nga ti ni ya.”​—Yakoba 1:27.