Ya mo Mbori Rogo Ai Ba?
Gu karagapai nga ga Baibiri
Mbori na rengba ka bi apai dunduko na ka mangapai rogo ai gu ba ko asia ka mangaha rogoho. (Asanza 15:3; AEbere 4:13) Wa vura duhe wo, Baibiri ayugonga gupai nga Mbori rogo ai ba, watadu rogo ahe dunduko te. Kuba gure, si nayugo gupai nga ko nga boro, na ba kina ho ko asungo rogo ho.
Wai du Mbori: Mbori nga toro. (Yoane 4:24) Ka aboro bingo ko te. (Yoane 1:18) Agu ayuguyugupai du tipa Mbori ni kekehe rogo Baibiri nayugo ko ti aregbo dunduko nga ba kina ho ko araka rogoho. Si ayugonga gupai nga ko naraka rogo arago dunduko te.—Yesaya 6:1, 2; Yugoti 4:2, 3, 8.
Gu ba Mbori araka rogoho: Mbori naraka rogo ngbii atoro nga gu ba du kia ti kpotosende. Rogo gu ba re, ba kinaho beko “ngbangbaturũ yo nga ga banye.” (1 Abakindo 8:30) Baibiri fura tipa gu regbo awiri Mbori ni atoro “aye ni ku bara bangiri Yekova,”a nayugo gupai nga, ba kinaho Mbori araka rogoho.—Eyobo 1:6.
Ka si du nga Mbori rogo arago dunduko te, ya mo ko rengbe ka berãpa re nzunzu?
Ii. Mbori naberãpa aboro aberã duduko ni basasa. Wa vura duhe nga Mbori naraka ngbangbaturũ yo, ko naino agu aboro aino naida ka sa ngbarago ti ko auru kpotosende na ko namangapai amanga tipa yo. (1 Abakindo 8:39; 2 Pekapai 16:9) Mo makianga pa wai Yekova ayugo ho nzunzu nga ko naaberãpa agu aboro aberã nairiso ko:
Ho mo amanga kparakpee ni: Yekova rengbe ka gia gamo kparakpee ti gu regbo mo amangaha ti ni.—2 Pekapai 18:31.
Ho du mo ni rogo bakere gberãrago: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”—Atambuahe 34:18.
Ho mo aida arugapai ni: Yekova nika ‘rába ro ki yugu pai foro’ vuru be Fugo ko nga Baibiri.—Atambuahe 32:8.
Iraira aberãpai tipa gupai nga Mbori rogo arago dũ
Iraira berãpai: Mbori rogo arago dunduko rogo kusikusiahe yo.
Rengo: Mbori arakanga auru kpotosende no watadu rogo kura ba kia rogo haurago a te. (1 Abakindo 8:27) Kina rengo du nga akerekuru gbiati gu kura kusikusiahe “ninataka pande gu taarimo nga ga Mbori.” (Atambuahe 19:1) Wa vura duhe wo, Mbori arakanga rogo gako kusikusi ahe yo wo gu badua bambu naaraka rogo gu bambu ni naduaha te. Ono tie, gu bambu ni nambakadihe re ima rengba ka yugopai furani tipa gu boro nambakadihe. Wakina gure a, wai zegino angera, nayugo pai furani tipa agu “apai ka i abi nga ya,” du ti Bakusiahe, du wa gu nga ome, tatamana, gbiati nyemuse.—ARomo 1:20.
Iraira berãpai: Mbori du wa ka ko du rogo arago dunduko tipa wa ka ko du na rengba ka ino apai dunduko na ki du na bakere ome gbe.
Rengo: Ga Mbori ziazia toro, watadu zaaza ome, nga ga Mbori ome mangapai. Vurube ga Mbori ziazia toro, ko ima rengba ka bi na ka manga ai pai, rogo ai ba ti ai regbo, zanga ko du adu rogo gu ba re.—Atambuahe 139:7.
Iraira berãpai: Atambuahe 139:8 nayugo gupai nga Mbori rogo arago dũ ho si aya ni wẽ: “Ka mi dakpa ku ngbangbaturũ yo, mo kina yo! Ka mi mbakadi gi barame Baatoro kpikpi aboro yo, mo ngére, mo kina yo!”
Rengo: Gi veresi re afuranga tipa gu ba du Mbori rogoho te. Si mangisunge na afugo masaku ka yugo gupai na ni nga, ba ho du ni batuturũhe fu Mbori nga gu rengbe ka sa gupai nga ka ko undongo rani ya te.
a Yekova nga rimo Mbori a wa Baibiri na yuguhe.