Ya Mo Mbori Nga Ndikidi Boro?

Agu akaragapai aboro naafuhe nga:

◼ “Ko na arago dunduko, na rogo ahe dunduko. Ko wakina wege.”

◼ “Ko nga gu ome duna tatamana ayengo be boro ya.”

Ginipai Yesu agumbaha tipa gipai re?

◼ “Rogo ga Buba bambu dungu banye du yo.” (Yoane 14:2) Ka pepai nimasaku, Yesu afura tipa Mbori wa gu boro du kporo adu beni watadu ba ní araka rogoho.

◼ “Mi aye yo du Buba ni, ki ye ku zegino; were, mi naguari zegino, ki ndu koyo du Buba ni.” (Yoane 16:28) Yesu aatinga kango gupai nga Mbori nga ndikidi boro naraka araka te.

YESU aayanga wee Mbori nga kungbo ome te. Kuba gure, ko anaafura afura na Mbori na kini kpari fuko. Dedede, ko anaayamba Mbori nigu bako du ngbangbaturũ yo, nga gu fugo naayugopa gu beedi ngbanya nadu dagbako na Mbori.—Matayo 6:14, 26, 32.

Kina rengo du ngaha nga, “a nga boro [ho] sa nabi Mbori wa sa te” mbiko “Mbori nga Toro.” (Yoane 1:18; 4:24) Ono gure ayugongo gupai nga Mbori zanga kpoto te. Ziazia Kekeapai naya furani wee: “Singia boro borose du ho, boro toro du ho a.” (1 AKorindo 15:44) Ya mo Mbori na kpoto tiko nga ga toro?

Ii, si kina tiko. Ho i azingisi Yesu ni bekpio, ko ‘arimi ku ngbangbaturũ yo, ka ru ku barabangiri Mbori tipa rani.’ (AEbere 9:24) Gupai re nayugo nyanyakipa apai ue furani tipa Mbori. Bambataha nga, ba kina beko ko araka rogoho. Uehe nga, ko nga ndikidi boro, anga ko gbua nigu ome watadu gu boro naraka araka rogo aba dunduko te.

Wai tie duhe nga Mbori na ome kurii ahe dunduko? Mbori rengbe arengba ka keda gako ziazia toro watadu gako ome mangaapai kurogo gu ba ko aida ka kedaha kurogoho. Wakina gu baagude ninaamangasunge nyanyakii nibeni ka ngerafuo awirini, kinawo Mbori naamangasunge na gako ziazia toro tipa ka digiso gupai ko aida ka mangaha.—Atambuahe 104:30; 139:7.

Mbori nga ndikidi boro duna asinoko ti ni. Apai kinaho ko aida nani na agu akuraha kinaho ko asogaha. Ziazia Kekeapai nagumba gupai nga, Yekova nakpinyemu gako aboro akpi, ko nangi angi rogo gako mangaapai, ko nasoga irisokpiahe, na ngbaduko naima aima ho ko abi gbegberẽ mangaapai ni. (Bambata Pai 6:6; Pa Fu Rugute ni Ue he 16:22; 1 Abakindo 10:9; Atambuahe 104:31) Bambata Timoteo 1:11 naya tipa ko wee ko nga “betedi Mbori [watadu, gu Mbori duna ngbarago].” Sidu, Yesu ayawee ani rengbe arengba ka kpinyemu Mbori na kpotoraniyo dunduko!—Marako 12:30.a

[Gu rukutu kekeapai du bandu kpewaraga yo]

[Gu kpiahe du ti kpewaraga 5]

Wakina gu baagude ninaamangasunge nyanyakii nibeni ka ngerafuo awirini, kinawo Mbori amangasunge na gako ziazia toro ka digiso gupai ko aida ka mangaha